യുഎഇയില് വില്പ്പനയ്ക്കായുള്ള ആഭരണങ്ങളിലും വിലകൂടിയ ലോഹങ്ങളിലും ഔദ്യോഗിക മുദ്ര നിര്ബന്ധമാക്കി
യു.എ.ഇ മാര്ക്കറ്റില് വില്പനയ്ക്കായി എത്തുന്ന ആഭരണങ്ങള്, വിലകൂടി ലോഹങ്ങള്, കല്ലുകള് എന്നിവയില് ഔദ്യോഗിക മുദ്ര നിര്ബന്ധമാക്കി. രാജ്യത്തെ ഉപഭോക്താക്കളുടെ വിശ്വാസം വര്ധിപ്പിക്കുന്നതിന് വേണ്ടിയാണ് എമിറേറ്റ്സ്ഫസ്റ്റാന്ഡേഡൈസേഷന് മെട്രോളജി (എസ്മ) ഇതിനുള്ള നടപടി സ്വീകരിച്ചത്.
മൂല്യമേറിയ കല്ലുകള്, ലോഹങ്ങള് എന്നിവയുടെ കച്ചവടത്തിലും അവയിലെ മുദ്രണത്തിലും മേല്നോട്ടമേര്പ്പെടുത്തുന്നതിന് വിളക്കിച്ചേര്ക്കുന്ന വസ്തുക്കളുടെ ശതമാന നിരക്കിനും അതോറിറ്റി അംഗീകാരം നല്കിയിട്ടുണ്ട്. സാമ്പത്തിക മന്ത്രിയും എസ്മ ചെയര്മാനുമായ സുല്ത്താന് ബിന് സഈദ് ആല് മന്സൂറിയുടെ അധ്യക്ഷതയില് നടന്ന എസ്മ ഡയറക്ടര് ബോര്ഡ് യോഗത്തിലാണ് തീരുമാനം.
യു.എ.ഇ ഫെഡറല് നിയമ പ്രകാരം സ്വര്ണം, ആഭരണം എന്നിവയുടെ ഭാരം വര്ധിപ്പിക്കുന്നതിന് വേണ്ടി വിളക്കി ചേര്ക്കുന്ന വസ്തുക്കള് ഉപയോഗിക്കുന്നത് തടയപ്പെട്ടിട്ടുണ്ട്. സൗന്ദര്യവര്ധക വസ്തുക്കള്, രാസവസ്തുക്കള്, എണ്ണ, വാതകം മേഖലകളിലെ ഉല്പന്നങ്ങളുടെ ഗുണനിലവാരം ഉറപ്പാക്കുന്നതിന് എസ്മ ഡയറക്ടര് ബോര്ഡ് 16 മാനദണ്ഡങ്ങള് അംഗീകരിക്കുകയും ചെയ്തു.
യു.എ.ഇ മാര്ക്കറ്റിലെ ഉല്പന്നങ്ങളുടെ ഗുണമേന്മ ഉറപ്പുവരുത്തുന്നതിനും ഉപഭോക്താക്കളുടെ അവകാശം സംരക്ഷിക്കുന്നതിനും ദേശീയ സമ്പദ് വ്യവസ്ഥ ശാക്തീകരിക്കുന്നതിനും വേണ്ടിയാണിത്. മാനദണ്ഡങ്ങള് പാലിക്കപ്പെടുന്നുണ്ടെന്ന് ഉറപ്പാക്കാന് തദ്ദേശീയ, അന്തര്ദേശീയ സ്ഥാപനങ്ങളെ ചുമതലപ്പെടുത്തിയിട്ടുണ്ട്. സ്വര്ണാഭരണങ്ങളിലും വിലകൂടിയ ലോഹങ്ങളിലും ഔദ്യോഗിക മുദ്ര പതിപ്പിക്കുന്നത് ഉപഭോക്താക്കളെയും കച്ചവടക്കാരെയും തട്ടിപ്പുകളില് പെടാതെ സംരക്ഷിക്കുമെന്ന് സുല്ത്താന് ബിന് സഈദ് ആല് മന്സൂറി പറഞ്ഞു. ലോഹങ്ങളുടെ സംശുദ്ധതയെ കുറിച്ചുള്ള വിശ്വാസ്യത വര്ധിക്കും.
https://www.facebook.com/Malayalivartha
