ദുബായില്‍നിന്ന് മംഗളൂരുവിലേക്ക് ഇന്നലെ പുലര്‍ച്ചെ 3.40ന് പുറപ്പെടേണ്ടിയിരുന്ന സ്‌പൈസ് ജെറ്റ് എസ്.ജി. 60 വിമാനം വൈകീയത് പതിനാലര മണിക്കൂര്‍. കുടുംബവും കുട്ടികളുമായി നാട്ടിലേക്ക് തിരിച്ച നിരവധിപേര്‍ക്കാണ് വിമാനത്താവളത്തില്‍ ദുരിതമനുഭവിക്കേണ്ടി വന്നത്. ശനിയാഴ്ച രാത്രിയോടെ വിമാനത്താവളത്തില്‍ എത്തിയവരാണ് ഇവര്‍. പുലര്‍ച്ചെ വിമാനം പുറപ്പെടാത്തതിനെക്കുറിച്ച് അന്വേഷിച്ചപ്പോള്‍ ഉച്ചയ്ക്ക് രണ്ടരയ്ക്ക് പുറപ്പെടുമെന്നായിരുന്നു മറുപടി. ഉച്ചയോടെ പോലീസും വിമാനത്താവള അധികൃതരും എത്തി യാത്രക്കാര്‍ക്ക് ഭക്ഷണസൗകര്യം ഒരുക്കി.
എന്നാല്‍, യാത്ര പിന്നെയും വൈകുകയായിരുന്നു. ഇതിനിടെ വൈകീട്ട് അഞ്ചരയ്ക്ക് വിമാനം എടുക്കുമെന്ന് വിവരം ലഭിച്ചിരുന്നു. എന്നാല്‍, 6.05ന് ആണ് വിമാനം പറന്നത്. അബുദാബിയില്‍നിന്നും മറ്റ് എമിറേറ്റുകളില്‍ നിന്നുമെല്ലാം നാട്ടിലേക്ക് പോകാനായി ദുബായ് വിമാനത്താവളത്തില്‍ എത്തിയ ഒട്ടേറെപ്പേരുണ്ടായിരുന്നു യാത്രക്കാരുടെ കൂട്ടത്തില്‍. രോഗിയായ ഭാര്യയെ ഡോക്ടറെ കാണിക്കാന്‍ വേണ്ടി മാത്രം ദുബായില്‍നിന്ന് യാത്രതിരിച്ചയാളും കൂട്ടത്തിലുണ്ട്. നാല് ദിവസത്തേക്കാണ് ഇദ്ദേഹം അവധി എടുത്തിരിക്കുന്നത്. ഇതിനോടകം ഒരു ദിവസത്തെ അവധി നഷ്ടമായിക്കഴിഞ്ഞു.
ഡോക്ടറെ കാണാനുള്ള തീയതി ബുധനാഴ്ചത്തേക്ക് മാറ്റി. സന്ദര്‍ശക വിസയില്‍വന്ന് മടങ്ങുന്ന പ്രവാസികളുടെ പ്രായമായ അച്ഛനമ്മമാരും ഏറെ വിഷമത്തോടെയാണ് മണിക്കൂറുകള്‍ തള്ളിനീക്കിയത്.