പാറയിലിടിച്ച് തകര്‍ന്ന കപ്പലില്‍നിന്ന് 14 ഇന്ത്യന്‍ നാവികര്‍ ദുബൈ പോലീസിന്റെ സമയോചിതമായ ഇടപെടല്‍ മൂലം രക്ഷപ്പെട്ടു. ഇന്നലെ രാവിലെ 6.15ഓടെയാണ് പൊലീസ് ഓപറേഷന്‍സ് റൂമില്‍ അപകടം സംബന്ധിച്ച വിവരം എത്തിയത്. ഉടന്‍ കടല്‍-ആകാശ മാര്‍ഗങ്ങളിലൂടെ രക്ഷാപ്രവര്‍ത്തനം ആരംഭിക്കുകയായിരുന്നു. 35 മിനിറ്റ് നേരത്തെ രക്ഷാദൗത്യത്തിലൂടെയാണ് പൊലീസ് നാവികരെ രക്ഷിച്ചത്.

ശക്തമായ കാറ്റും തിരമാലയും കാരണം 'ഖദീജഫ7' എന്ന കപ്പലാണ് അപകടത്തില്‍ പെട്ടത്. ദേര ഐലന്‍ഡിലെ പാറയില്‍ ഇടിച്ചതിനെ തുടര്‍ന്ന് വെള്ളം അതിവേഗം കപ്പലിലേക്ക് കയറി തുടങ്ങിയിരുന്നു. തുടര്‍ന്നാണ് കപ്പല്‍ ജീവനക്കാര്‍ അപകട സന്ദേശമയച്ചത്.പൊലീസ് ഹെലികോപ്ടറാണ് കപ്പലിനെ കണ്ടെത്തിയത്. എന്നാല്‍, ഉയരത്തില്‍ പൊങ്ങിയ തിരമാല കാരണം രക്ഷാദൗത്യ ബോട്ടുകള്‍ക്ക് കപ്പലിന്റെ സമീപം ചെല്ലാന്‍ സാധിച്ചില്ല. തുടര്‍ന്ന് കപ്പലിലേക്ക് കയര്‍ എറിഞ്ഞുകൊടുത്ത് ഓരോരുത്തരെയായി ബോട്ടില്‍ എത്തിക്കുകയായിരുന്നു.

ശക്തമായ കാറ്റും തിരമാലയും കാരണം കപ്പല്‍ പാറയിലിടിച്ച് തകര്‍ന്നിരുന്നതായും എന്‍ജിന്‍ പ്രവര്‍ത്തനം നിലച്ചിരുന്നതായും ദുബൈ പൊലീസിലെ സമുദ്ര രക്ഷാദൗത്യ മേധാവി ലെഫ്റ്റനന്റ് കേണല്‍ അലി ആല്‍ നഖ്ബി പറഞ്ഞു. ജീവനക്കാര്‍ക്ക് കപ്പലിന്റെ നിയന്ത്രണം നഷ്ടമായിരുന്നതായും അദ്ദേഹം കൂട്ടിച്ചേര്‍ത്തു.
പൊലീസിന്റെ സമയോചിതമായ രക്ഷാപ്രവര്‍ത്തനത്തിന് ദുബൈയിലെ ഇന്ത്യന്‍ കോണ്‍സുലേറ്റ് നന്ദിയറിയിച്ചു.