മാര്‍ച്ചില്‍ നടക്കുന്ന അഞ്ചാമത് സൗദി ചലച്ചിത്ര മേളയില്‍ 340 ചിത്രങ്ങള്‍ മത്സരത്തിനെത്തും. രജിസ്റ്റര്‍ ചെയ്യാനുള്ള സമയപരിധി കഴിഞ്ഞ ദിവസം അവസാനിച്ചു. കഴിഞ്ഞ ചിലച്ചിത്ര മേളയേക്കാള്‍ 60 ശതമാനത്തിലധികം ചിത്രങ്ങളാണ് ഇത്തവണ മാറ്റുരക്കാനെത്തുന്നത്. സൗദിയുടെ മാറുന്ന സാഹചര്യങ്ങളെ വ്യക്തമാക്കുന്നതാണ് ഇതെന്നാണ് അധികൃതരുടെ വിലയിരുത്തല്‍.കള്‍ച്ചറല്‍ ആര്‍ട്‌സ് ആന്റ് അസോസിയേഷനും കിങ് അബ്ദുല്‍ അസീസ് സന്റെര്‍ ഫോര്‍ വേള്‍ഡ് കള്‍ച്ചറും സംയുക്തമായാണ് സൗദിയിലെ അഞ്ചാമത് ചലച്ചിത്ര മേള സംഘടിപ്പിക്കുന്നത്.

മാര്‍ച്ച് 21 മുതല്‍ 26 വരെ മേള അരങ്ങേറും. ആദ്യ മൂന്ന് സ്ഥാനങ്ങളിലെത്തുന്നവര്‍ക്ക് സ്വര്‍ണ പനയുടെ രൂപവും, ഫലകവും, കാഷ് അവാര്‍ഡുകളും ലഭിക്കും. 186 ഓളം ചെറു സിനിമകളും കുട്ടികള്‍ക്കായി 154 ആനിമേഷന്‍ സിനിമകളുമാണ് രജിസ്റ്റര്‍ ചെയ്തിരിക്കുന്നത്. 2008 ല്‍ ആണ് സൗദിയില്‍ ആദ്യമായി ചലച്ചിത്ര മേള സംഘടിപ്പിച്ചത്. ഇടക്ക് നിന്നുപോയ മേള ഇപ്പോള്‍ പൂര്‍വാധികം സജീവമാണ്.ചലച്ചിത്ര സംബന്ധമായ 10 സെമിനാറുകള്‍, 10 ശില്‍പശാലകള്‍ എന്നിവ മേളയുടെ ഭാഗമായി അരങ്ങേറും. മേളയില്‍ പ്രദര്‍ശിപ്പിക്കുന്ന ഓരോ ചിത്രത്തെ കുറിച്ചും ഓപ്പണ്‍ ഫോറവും ഒരുക്കും. വിവിധ അറബ് രാജ്യങ്ങളില്‍ നിന്നുള്ള ചലച്ചിത്ര പ്രതിഭകള്‍ മേളയില്‍ സാന്നിധ്യമാകും.
ഗ്രൂപ്പുകളായാണ് ചിത്രങ്ങള്‍ മാറ്റുരക്കുക. കുട്ടികളുടെ വിഭാഗം, ഡോക്യുമെന്ററി സാമൂഹ്യ പ്രതിബദ്ധത, തുടങ്ങി വിവിധ തലങ്ങളില്‍ ചിത്രങ്ങള്‍ക്ക് മല്‍സരിക്കാം. ഏറ്റവും നല്ല കഥക്കും, തിരക്കഥക്കും, ഛായാഗ്രാഹകനും, എഡിറ്റിംഗിനുമൊക്കെ സമ്മാനങ്ങള്‍ നല്‍കും. ലബനോന്‍ സംവിധായകന്‍ ആന്റണി ഖലിഫ, ഈജിപ്തിലെ ഫിലിം മേക്കര്‍ നസറുല്ല , മൊറോക്കന്‍ സംവിധായകന്‍ ഹഖീം ബെന്‍ അബ്ബാസ്, സൗദി സംവിധായിക ഹന അല്‍ ഉമൈര്‍ എന്നിവര്‍ സിനിമയുടെ മൂല്യ നിര്‍ണയം നടത്തും.

തെരഞ്ഞെടുക്കപ്പെടുന്ന സിനിമകള്‍ മാത്രമാണ് പൊതുജനങ്ങള്‍ക്കായി പ്രദര്‍ശിപ്പിക്കുക. മാറുന്ന കാലത്തെ സിനിമ സങ്കല്‍പങ്ങളും, സാധ്യതകളും, പ്രതീക്ഷകളുമൊക്കെ വിവിധ തലങ്ങളില്‍ മേളയില്‍ ചര്‍ച്ചയാകും. കേവലം ഒരു മേള എന്നതിലുപരി അറബ് മേഖലയില്‍ ചലച്ചിത്ര നിര്‍മാണ രംഗത്ത് പുത്തന്‍ പ്രവണതകള്‍ സൃഷ്ടിക്കുകയും യുവ സമൂഹത്തെ ഈ രംഗത്തേക്ക് ആകര്‍ഷിക്കുകയുമാണ് മേള ലക്ഷ്യം വെക്കുന്നത്.