ദുബൈയില്‍ ആഘോഷത്തിന്റെ ആഗോള ഗ്രാമം അടക്കരുതെന്ന് ആരാധകര്‍ ആവശ്യപ്പെട്ടതോടെ ഗ്ലോബല്‍ വില്ലേജ് അടക്കുന്നത് ഒരാഴ്ചത്തേക്കു കൂടി നീട്ടി. നാല്‍പ്പത്തെട്ട് മണിക്കൂറിനുള്ളില്‍ ഒന്നരലക്ഷം പേരാണ് ഈ ആവശ്യം ഉന്നയിച്ചത്. ഗ്ലോബല്‍ വില്ലേജ് കാലാവധി നീട്ടേണ്ടതുണ്ടോ എന്ന് അധികൃതര്‍ സമൂഹ മാധ്യമങ്ങളിലൂടെ ആരാഞ്ഞിരുന്നു. ഇതിനാണ് ഒന്നരലക്ഷം പ്രതികരണം ഉണ്ടായത്. വന്‍ പിന്തുണയാണ് കാലാവധി നീട്ടുന്നതിന് ലഭിച്ചത്. ഏപ്രില്‍ 13 ആണ് ഗ്ലോബല്‍ വില്ലേജ് സീസണ്‍ 23 അവസാനിക്കുക. സന്ദര്‍ശകരുടെ എണ്ണം വര്‍ധിച്ചതിനാലാണ് ഏഴു ദിവസത്തേയ്ക്ക് നീട്ടുന്നതെന്ന് അധികൃതര്‍ പറഞ്ഞു.

ശനിയാഴ്ച മുതല്‍ ബുധനാഴ്ച വരെ വൈകിട്ട് നാലു മുതല്‍ രാത്രി 12 വരെയും വ്യാഴം, വെള്ളി ദിവസങ്ങളിലും പൊതു അവധി ദിനങ്ങളിലും വൈകിട്ട് നാലു മുതല്‍ പുലര്‍ച്ചെ ഒന്നുവരെയുമാണ് ഗ്ലോബല്‍ വില്ലേജ് പ്രവര്‍ത്തിക്കുന്നത്. തിങ്കളാഴ്ചകള്‍ വനിതകള്‍ക്കും കുടുംബങ്ങള്‍ക്കും മാത്രമാണ്. ഗ്ലോബല്‍ വില്ലേജില്‍ ആകെ 160 ഔട്‌ലറ്റുകളാണുള്ളത്.
ഇന്ത്യയുടേതടക്കം ആകെ 27 പവലിയനുകളും പ്രവര്‍ത്തിക്കുന്നു. വിവിധ ഉത്പന്നങ്ങളുടെ വില്‍പന കൂടാതെ, 78 വ്യത്യസ്ത പ്രദേശങ്ങളില്‍ നിന്നുള്ള പരമ്പാരഗത ഭക്ഷണവും ഇവിടെ ലഭ്യമാണ്. ഇവക്ക് പുറമെ 60 റൈഡുകളും സ്‌കില്‍ ഗെയിമുകളും സര്‍ക്കസും ഗ്ലോബല്‍ വില്ലേജിലുണ്ട്. ഈ മാസം 20ന് രാജ്യാന്തര സന്തോഷദിനം, 21ന് മാതൃദിനം, 22ന് വര്‍ണങ്ങളുടെ ദിനം എന്നിവയാണ് ഗ്ലോബല്‍ വില്ലേജിലെ അടുത്ത ആഘോഷ പരിപാടികള്‍. അതിഥി സന്തോഷ സൂചികയില്‍ പത്തില്‍ ഒമ്പത് മാര്‍ക്കും നേടിയ ഗ്ലോബല്‍ വില്ലേജിന്റെ ഇീ സീസണ്‍ വന്‍ വിജയമായിരിക്കുകയാണ്.