ഏജന്റിന്റെ ചതിക്കുഴിയില് കുവൈറ്റ് ജയിലിലായ മകന്റെ മോചനത്തിനായി ഓഫീസുകള് കയറിയിറങ്ങി പിതാവ്
ഏജന്റിന്റെ ചതിയില്പെട്ട് കുവൈറ്റ് ജയിലിലായ മകന്റെ മോചനത്തിന് ഓഫിസുകള് കയറിയിറങ്ങുകയാണ് പിതാവ്. കഴിഞ്ഞവര്ഷം ജനുവരി അഞ്ചിനാണ് നായരമ്പലം സ്രാമ്പിക്കല് ക്ലീറ്റസിന്റെ മകന് ജോമോന് ( 24) സൂപ്പര്മാര്ക്കറ്റിലെ ജോലിക്കായി നെടുമ്പാശ്ശേരിയില്നിന്ന് കുവൈത്തിലേക്ക് പുറപ്പെട്ടത്.
വിമാനത്താവളത്തില് വെച്ച് ഏജന്റുമാരായ മണ്ണാര്ക്കാട് സ്വദേശികളായ ഫൈസല്, അബ്ദുല്സലാം എന്നിവര് ബാഗും മൊബൈലും ജോമോനെ ഏല്പ്പിച്ചു. കുവൈത്തിലെത്തിയാല് കൂട്ടാന് വരുന്ന ആള്ക്ക് ബാഗ് നല്കാനാണ് അവര് ജോമോന് പറഞ്ഞത്. പുറപ്പെടാനുള്ള സമയമായതിനാല് ബാഗ് തുറക്കാനോ നോക്കാനോ സാധിച്ചില്ല. പ്രധാന ഏജന്റായ ചെല്ലാനം സ്വദേശി ഷരുണാണ് ഇവരെ ജോമോന് പരിചയപ്പെടുത്തിയത്. കൈവശം അവര് തന്നത് കഞ്ചാവാണെന്നറിയാതെ ജോമോന് കുവൈത്തിലെത്തുകയും വിമാനത്താവളത്തിലെ പരിശോധനയില് കുടുങ്ങുകയുമായിരുന്നു.
വിമാനത്താവളത്തിലെത്തിയത് അറിയിച്ചിരുന്നെങ്കിലും രണ്ടാഴ്ചയോളം ജോമോനെ ബന്ധപ്പെടാന് വീട്ടുകാര്ക്ക് സാധിച്ചില്ല. പിന്നീടാണ് കഞ്ചാവ് കൈവശം വെച്ചതിന് അറസ്റ്റിലായ വിവരം അറിയുന്നത്. ഇപ്പോള് മര്കസി സെന്ട്രല് ജയിലില് ജുഡീഷ്യല് കസ്റ്റഡിയിലാണെന്നാണ് അറിയുന്നത്. കസ്റ്റഡിയിലായ ശേഷം ജോമോന് വിളിച്ചപ്പോഴാണ് ഏജന്റുമാര് ചതിച്ചത് വീട്ടുകാര് അറിഞ്ഞത്. ഇതിനിടെയില്് 2018 ഫെബ്രുവരി 17ന് നെടുമ്പാശ്ശേരി എയര്പോര്ട്ടിന് സമീപം കാറില് കഞ്ചാവുമായി ഏജന്റുമാരായ ഫൈസലിനെയും അബ്ദുല്സലാമിനെയും എക്സൈസ് അറസ്റ്റ് ചെയ്തത്. ഇവര് കുവൈത്തിലേക്ക് മയക്കുമരുന്ന് കടത്ത് നടത്തുന്ന സംഘത്തിലെ പ്രധാന കണ്ണികളാണെന്ന് അന്വേഷണത്തില് തെളിഞ്ഞിട്ടുണ്ട്.
വിവരങ്ങളെല്ലാം ഉള്പ്പെടുത്തി പ്രധാനമന്ത്രിക്കും എക്സൈസിനും നോര്ക്കയിലും ഇന്ത്യന് എംബസിയിലും പിതാവ് പരാതി നല്കി. എന്നാല്, ഒരുവര്ഷം കഴിഞ്ഞിട്ടും മകന് നിരപരാധിയാണെന്ന് തെളിയിക്കാനാകുന്നില്ല. മത്സ്യത്തൊഴിലാളിയായ ക്ലീറ്റസിന്റെ രണ്ടുമക്കളില് ഇളയവനാണ് ജോമോന്. ഐ.ടി.ഐ പഠനത്തിന് ശേഷമാണ് കുടുംബത്തിന് താങ്ങാവാനായി ഗള്ഫിലേക്ക് പോയത്.
https://www.facebook.com/Malayalivartha