മക്കളോടൊപ്പം ദമ്മാമിലേക്ക് പോകാന്‍ എത്തിയ യുവതിയുടെ പാസ്‌പോര്‍ട്ട് തിരുവനന്തപുരം വിമാനത്താവളത്തില്‍ എമിഗ്രേഷന്‍ ഉദ്യോഗസ്ഥന് രണ്ട് കഷണമാക്കി, പരാതിയുമായി യുവതി രംഗത്ത്
മക്കളോടൊപ്പം ദമ്മാമിലേക്ക് പോകാന്‍ എത്തിയ യുവതിയുടെ പാസ്‌പോര്‍ട്ട് തിരുവനന്തപുരം വിമാനത്താവളത്തില്‍ എമിഗ്രേഷന്‍ ഉദ്യോഗസ്ഥന് രണ്ട് കഷണമാക്കി. ദമ്മാമിലേക്ക് പോകാന്‍ മക്കളോടൊപ്പം എത്തിയ കിളിമാനൂര്‍ തട്ടത്തുമല വിലങ്ങറ ഇര്‍ഷാദ് മന്‍സിലില്‍ ഇര്‍ഷാദിന്റെ ഭാര്യ ഷനുജക്കാണ് ദുരനുഭവം ഉണ്ടായത് . മാര്‍ച്ച് 23ന് രാവിലെ എട്ട് മണിക്കാണ് സംഭവം നടന്നത്. നേരത്തെ മംഗലാപുരം എയര്‍പോര്‍ട്ടില്‍ പ്രവാസികള്‍ക്ക് ഇത്തരം പീഡനങ്ങള്‍ ഏല്‍ക്കേണ്ടി വന്നതായി പരാതി ഉയര്‍ന്നിരുന്നു. സമാന അനുഭവമാണിവിടെയും ഉണ്ടായത്.
സൗദിയിലുള്ള ഭര്‍ത്താവിന്റെ അടുത്തേക്ക് പോകാന്‍ മക്കളായ ഫാദില്‍, ഫാഹിം എന്നിവരോടൊപ്പമാണ് യുവതി തിരുവനന്തപുരം വിമാനത്താവളത്തിലെത്തിയത്. ഗള്‍ഫ് എയര്‍ വിമാനയാത്രക്ക് ബോര്‍ഡിങ് പാസ് വാങ്ങി എമിഗ്രേഷന്‍ നടപടികള്‍ക്കായി ഉദ്യോഗസ്ഥന് പാസ്‌പോര്‍ട്ട് കൈമാറിയതോടെ പ്രശ്‌നം തുടങ്ങി.
പാസ്‌പോര്‍ട്ട് വാങ്ങി നോക്കിയ ശേഷം 'എങ്ങോട്ടു പോകുന്നു, എന്തിനു പോകുന്നു തുടങ്ങിയ ചോദ്യങ്ങള്‍ പരുഷമായി ചോദിച്ച ശേഷം പാസ്‌പോര്‍ട്ട് ഉയര്‍ത്തിക്കാട്ടി നിങ്ങള്‍ക്ക് യാത്ര ചെയ്യാനാവില്ലെന്നും പാസ്‌പോര്‍ട്ട് കീറിയിരിക്കുകയാണെന്നും അറിയിച്ചു. യുവതി നോക്കുമ്പോള്‍ പാസ്‌പോര്‍ട്ട് അല്‍പം ഇളകിയ നിലയിലായിരുന്നു. തുടര്‍ന്ന് ഉദ്യോഗസ്ഥന് അടുത്തിരുന്ന സഹപ്രവര്‍ത്തകനോട് എന്തുവേണമെന്ന് തിരക്കി. അതു പ്രശ്‌നമാക്കെണ്ടന്ന് അദ്ദേഹം പറഞ്ഞുവെങ്കിലും കുറച്ചകലെയുള്ള മറ്റൊരു ജീവനക്കാരനോട് എന്തോ സംസാരിച്ചു മടങ്ങി വന്നു.
പൂര്‍ണമായും ഇളകി രണ്ടാക്കി മാറ്റിയ പാസ്‌പ്പോര്‍ട്ട് കാണിച്ചു. ഇതുപയോഗിച്ച് യാത്രാനുമതി നല്‍കാനാവില്ലെന്ന് ഉറപ്പിച്ചു പറഞ്ഞു. വിമാനത്താവളത്തില്‍ പ്രവേശിച്ചപ്പോള്‍ സെക്യൂരിറ്റി ഉദ്യോഗസ്ഥര്‍ പരിശോധിച്ച് തിരിച്ചു നല്‍കിയ പാസ്‌പോര്‍ട്ടിന് തകരാറൊന്നും ഉണ്ടായിരുന്നില്ലെന്ന് ഷനുജ അറിയിച്ചു. പിന്നീട് മുതിര്‍ന്ന ഉദ്യോഗസ്ഥരെത്തി ചര്‍ച്ച ചെയ്ത ശേഷം യുവതിയെയും കുട്ടികളെയും യാത്രക്ക് അനുവദിച്ചു. സംഭവത്തില്‍ ഇര്‍ഷാദ് കേന്ദ്രമന്ത്രി സുഷമ സ്വരാജിനും, മുഖ്യമന്ത്രി പിണറായി വിജയനും പരാതി അയച്ചു. ഡി.ജി.പിക്ക് പരാതി കൈമാറിയതായി മുഖ്യമന്ത്രിയുടെ മറുപടി ലഭിച്ചിട്ടുണ്ട്.
ഉദ്യോഗസ്ഥന്റെ പേരുവിവരങ്ങള്‍ ലഭിക്കാന്‍ ഇര്‍ഷാദ് തിരുവനന്തപുരം വിമാനത്താവളവുമായി ബന്ധപ്പെട്ടെങ്കിലും ഫലമുണ്ടായില്ല. അവിടുന്ന് അറിയിച്ചതനുസരിച്ച് എഫ്.എഫ്.ആര്‍.ഒ നരേന്ദ്രന് പരാതി അയച്ചിട്ടുണ്ട്. നേരത്തെ പലതവണ തിരുവനന്തപുരം വഴി ദമ്മാമിലേക്ക് യാത്ര ചെയ്ത ഷനുജക്ക് ആദ്യമായാണ് ദുരനുഭവം. സൗദി ടെലികോം കമ്പനിയില്‍ ജോലി ചെയ്യുന്ന ഇര്‍ഷാദ് ജുബൈലില്‍ ആണ് താമസിക്കുന്നത്.
https://www.facebook.com/Malayalivartha
