കടലില്‍ കുളിക്കുന്നതിനിടെ തിരയില്‍പെട്ട മകനെയും കൂട്ടുകാരെയും രക്ഷിക്കുന്നതിനിടെ പ്രവാസിക്ക്ദാരുണാന്ത്യം. കോഴിക്കോട് ഗാന്ധിറോഡ് കേരള സോപ്‌സിനു സമീപം കണ്ണന്‍കടവത്ത് കെ.ജി. പ്രതാപാണ് (47) മരിച്ചത്. ചൊവ്വാഴ്ച ഉച്ചക്ക് 12 മണിക്കായിരുന്നു അപകടം നടന്നത്. ഖത്തറില്‍നിന്ന് അവധിക്ക് നാട്ടിലെത്തിയ പ്രതാപ് 14കാരനായ മകന്‍ വിഘ്‌നേഷിനും അയല്‍വാസികളായ കൂട്ടുകാര്‍ക്കുമൊപ്പം കടലില്‍ പോയതായിരുന്നു. ലയണ്‍സ് പാര്‍ക്കിനടുത്തുള്ള കടല്‍തീരത്ത് കുളിക്കുന്നതിനിടെയായിരുന്നു മകനും കൂട്ടുകാരായ ശബരിനാഥ് (14), രാഹുല്‍ (13) എന്നിവരും തിരയില്‍പെട്ടത്. ഇവരെ രക്ഷിക്കാനുള്ള ശ്രമത്തിനിടെയായിരുന്നു അപകടം.സമീപത്തുള്ളവര്‍ വിവരമറിയിച്ചതിനെ തുടര്‍ന്ന് രക്ഷാബോട്ടുമായി പാഞ്ഞെത്തിയ ഇറോത്ത് വാട്ടര്‍ സ്‌പോര്‍ട്‌സിലെ ലൈഫ് ഗാര്‍ഡുകളാണ് കടലില്‍പെട്ട കുട്ടികളെ രക്ഷപ്പെടുത്തിയത്.
എന്നാല്‍, രക്ഷാപ്രവര്‍ത്തനത്തിനിടെ കടലില്‍ മുങ്ങിയ പ്രതാപിനെ ലൈഫ് ഗാര്‍ഡുകള്‍ കരക്കെത്തിച്ചെങ്കിലും മരിച്ചു. കടലില്‍ നന്നായി നീന്തി പരിചയമുള്ള പ്രതാപ് ചുഴിയില്‍പെട്ടാകാം മുങ്ങിയതെന്നാണ് നിഗമനം. ഭാര്യ: ശ്രീജ. മക്കള്‍: ശ്രീലക്ഷ്മി (പ്ലസ്‌വണ്‍ വിദ്യാര്‍ഥിനി, പ്രോവിഡന്‍സ് ഗേള്‍സ് സ്‌കൂള്‍), വിഘ്‌നേഷ് (ഒമ്പതാം ക്ലാസ് വിദ്യാര്‍ഥി, സന്റെ് ജോസഫ്‌സ് ബോയ്‌സ്). പിതാവ്: പരേതനായ ഗോപാലന്‍. മാതാവ്: ശോഭന. സഹോദരങ്ങള്‍: സാബു (മത്സ്യത്തൊഴിലാളി), കമല്‍ (ഖത്തര്‍), ജാന്‍സി. സംസ്‌കാരം ബുധനാഴ്ച രാവിലെ വെസ്റ്റ്ഹില്‍ ശ്മശാനത്തില്‍. ആറു വര്‍ഷമായി ഖത്തറില്‍ െ്രെഡവറായി ജോലി ചെയ്യുകയായിരുന്ന പ്രതാപ് മൂന്നാഴ്ച മുമ്പാണ് നാട്ടിലെത്തിയത്‌.