കമ്പനികളുടെ കമേഴ്സ്യല് ലൈസന്സിന് ആറുമാസം കാലാവധിയില്ലെങ്കില് തൊഴിലാളികളുടെ ഇഖാമ പുതുക്കാനാവില്ലെന്ന് കുവൈത്ത് സിറ്റി താമസകാര്യ വകുപ്പ്
കമ്പനികളുടെ കമേഴ്സ്യല് ലൈസന്സിന് ആറുമാസം കാലാവധിയില്ലെങ്കില് തൊഴിലാളികളുടെ ഇഖാമ പുതുക്കാനാവില്ലെന്ന് താമസകാര്യ വകുപ്പ്. തൊഴിലാളികളുടെ ഇഖാമ പുതുക്കുന്നതിന് ലൈസന്സ് കാലാവധി കൂടി മാനദണ്ഡമാക്കിയതോടെ ചെറുതും വലുതുമായ നിരവധി കമ്പനികളാണ് പ്രയാസത്തിലായത്. കമ്പനികളുടെ ലൈസന്സ് കാലാവധി ആറുമാസത്തില് കുറവാണെങ്കില് ജീവനക്കാരുടെ ഇഖാമ പുതുക്കിനല്കില്ലെന്നാണ് താമസകാര്യ വകുപ്പിന്റെ നിലപാട്.
ഇഖാമ നടപടികള്ക്കായി സമീപിക്കുന്ന ഇത്തരം സ്ഥാപനങ്ങളുടെ പ്രതിനിധികളെ താമസകാര്യ ഉദ്യോഗസ്ഥര് തിരിച്ചയക്കുകയാണ്. വാണിജ്യ മന്ത്രാലയത്തെ സമീപിച്ച് ലൈസന്സ് കാലാവധി നീട്ടിവാങ്ങാനാണ് താമസകാര്യ ഉദ്യോഗസ്ഥര് നിര്ദേശിക്കുന്നത്.വാണിജ്യ വ്യവസായ മന്ത്രാലയമാണ് സ്ഥാപനങ്ങള്ക്ക് ലൈസന്സ് അനുവദിക്കുന്നത്. മൂന്നുമുതല് അഞ്ചുവര്ഷം വരെയാണ് സാധാരണഗതിയില് വാണിജ്യ ലൈസന്സിന് കാലാവധി. കാലാവധി പൂര്ത്തിയാക്കിയാലോ തൊട്ടുമുമ്പോ മാത്രമാണ് പുതുക്കിനല്കുന്നത്.
എന്നാല്, ഇഖാമ നടപടികള്ക്ക് തടസ്സം നേരിട്ട സാഹചര്യത്തില് കാലാവധി അവസാനിക്കുന്നതിനുമുമ്പേ തന്നെ ലൈസന്സ് പുതുക്കി നല്കണമെന്നാവശ്യപ്പെട്ട് ഒട്ടേറെ സ്ഥാപനങ്ങള് വാണിജ്യ മന്ത്രാലയത്തെ സമീപിച്ചതായാണ് റിപ്പോര്ട്ടുകള്. ബാക്കി കാലാവധി പരിഗണിക്കാതെ പുതിയ ലൈസന്സ് അനുവദിക്കണമെന്നാണ് സ്ഥാപന ഉടമകളുടെ ആവശ്യം.
https://www.facebook.com/Malayalivartha
