നവീകരണത്തിനായി ദുബായ് അന്താരാഷ്ട്ര വിമാനത്താവളത്തിന്റെ ഒരു റണ്‍വേ ചൊവ്വാഴ്ച മുതല്‍ മേയ് 30 വരെ അടച്ചിടും. ഇതോടെ വിമാനങ്ങളുടെ എണ്ണത്തില്‍ 32 ശതമാനത്തിന്റെ കുറവുണ്ടാകും. ചില കമ്പനികള്‍ വലിയ വിമാനങ്ങള്‍ ഉപയോഗിക്കുമെന്നതിനാല്‍ സീറ്റുകളുടെ എണ്ണത്തില്‍ 26 ശതമാനത്തിന്റെ കുറവേ ഉണ്ടാകൂ. ഈ കാലയളവില്‍ അല്‍ മക്തൂം വിമാനത്താവളത്തില്‍നിന്ന് ദിവസവും ചുരുങ്ങിയത് 145 വിമാനങ്ങള്‍ സര്‍വീസുകള്‍ നടത്തും. എയര്‍ ഇന്ത്യ, എയര്‍ഇന്ത്യ എക്‌സ്പ്രസ്, ഇന്‍ഡിഗോ, സ്‌പൈസ് ജെറ്റ്, ഫ്‌ലൈ ദുബായ്, ഗള്‍ഫ് എയര്‍, നേപ്പാള്‍ എയര്‍ലൈന്‍സ്, കുവൈത്ത് എയര്‍വേസ് എന്നിവയുടെ സര്‍വീസുകളാണ് അല്‍ മക്തൂമിലേക്ക് മാറ്റിയിരിക്കുന്നത്.

ഫ്‌ളൈ ദുബായിയുടെ 42 റൂട്ടുകളിലേക്കുള്ള സര്‍വീസുകള്‍ അല്‍ മക്തൂം വിമാനത്താവളത്തിലേക്ക് മാറ്റും. കൊച്ചിയിലേക്കും കോഴിക്കോട്ടേക്കുമുള്ള സര്‍വീസുകളും ഇതില്‍ ഉള്‍പ്പെട്ടിട്ടുണ്ട്. എയര്‍ ഇന്ത്യ, എയര്‍ ഇന്ത്യ എക്‌സ്പ്രസ് വിമാനങ്ങളില്‍ ചിലത് ഷാര്‍ജ വിമാനത്താവളത്തിലേക്കാണ് മാറ്റുന്നത്. എയര്‍ഇന്ത്യ എക്‌സ്പ്രസിന്റെ കൊച്ചി സര്‍വീസ് ഷാര്‍ജയിലേക്ക് മാറ്റി.

എയര്‍ ഇന്ത്യയുടെ ദുബായില്‍ നിന്നുള്ള മുംബൈ, ചെന്നൈ, വിശാഖപട്ടണം, ഹൈദരാബാദ്, ബെംഗളൂരു, ഗോവ സര്‍വീസുകളും ഷാര്‍ജയിലേക്ക് മാറ്റി. സയമക്രമം അതേപോലെ നിലനിര്‍ത്തിയാണ് ഷാര്‍ജയില്‍നിന്ന് വിമാനങ്ങള്‍ പറക്കുക. കൊച്ചിയില്‍നിന്ന് ദുബായിലേക്കുള്ള സ്‌പൈസ് ജെറ്റ് വിമാനം രാത്രി 11.45ന് പുറപ്പെട്ട് പുലര്‍ച്ചെ രണ്ടിന് അല്‍ മക്തൂം വിമാനത്താവളത്തിലെത്തും.
ദുബായ്‌കൊച്ചി സര്‍വീസ് പുലര്‍ച്ചെ 3.05ന് പുറപ്പെട്ട് 8.40ന് എത്തിച്ചേരും. എമിറേറ്റ്‌സ് വിമാനങ്ങളുടെ സര്‍വീസില്‍ 25 ശതമാനം കുറവുണ്ടാകുമെന്ന് എമിറേറ്റ്‌സ് എയര്‍ലൈന്‍ അധികൃതര്‍ നേരത്തേ വ്യക്തമാക്കിയിട്ടുണ്ട്.