വിധിയുടെ കൊടുംക്രൂരത... പ്രവാസജീവിതം മതിയാക്കി നാട്ടില്‍ പോകാനിരുന്ന പാലക്കാട് സ്വദേശിയായ യുവാവിന് ദാരുണാന്ത്യം
സൗദി അറേബ്യയില്‍ വാഹനാപകടത്തില്‍ മലയാളി യുവാവിന് ദാരുണാന്ത്യം. അടുത്തയാഴ്ച ഫൈനല്‍ എക്‌സിറ്റില്‍ നാട്ടില്‍ പോകാനിരുന്ന പാലക്കാട് മങ്കര മാങ്കുറുശ്ശി സ്വദേശി തോണി പറമ്പില്‍ രാമന്‍ കുട്ടിയുടെ മകന്‍ വിനീതിനാണ് (31) ദാരുണാന്ത്യമുണ്ടായത്. റിയാദ് പ്രവിശ്യയിലെ ദവാദ്മി പട്ടണത്തില്‍ നിന്ന് 160 കിലോമീറ്ററകലെ നെസി പട്ടണത്തിന് സമീപം അബൂറഖബില്‍ ബുധനാഴ്ച രാവിലെ തൊഴിലാളികള്‍ സഞ്ചരിച്ച ഡബിള്‍ ഡോര്‍ പിക്കപ്പ് വാന്‍ മറിഞ്ഞാണ് അപകടം നടന്നത്. കൂടെയുണ്ടായിരുന്ന രണ്ട് ഉത്തര്‍പ്രദേശ് സ്വദേശികള്‍ക്കും ഒരു ബംഗ്ലാദേശിക്കും പരിക്കേറ്റു
ആശുപത്രികള്‍ക്ക് സാങ്കേതിക വിദഗ്ധരായ തൊഴിലാളികളെ സപ്ലൈ ചെയ്യുന്ന അല്‍മജാല്‍ അല്‍അറബി ഗ്രൂപ്പ് എന്ന കമ്പനിയിലെ ജീവനക്കാരാണ് ഇവരെല്ലാവരും. യു.പി സ്വദേശികളില്‍ ഒരാളാണ് വാഹനം ഓടിച്ചിരുന്നത്. ജോലിസ്ഥലത്തേക്ക് പോവുകയായിരുന്ന വാഹനം നിയന്ത്രണംവിട്ട് കീഴ്‌മേല്‍ മറിഞ്ഞാണ് അപകടം.ഗുരുതര പരിക്കേറ്റ വിനീത് സംഭവസ്ഥലത്ത് തന്നെ മരിച്ചു. ബാക്കി മൂന്നുപേരില്‍ അതീവ ഗുരുതര പരിക്കേറ്റയാളെ റിയാദിലെ ആശുപത്രിയിലും മറ്റൊരാളെ ദവാദ്മി ജനറല്‍ ആശുപത്രിയിലും താരതമ്യേന ചെറിയ പരിക്കേറ്റയാളെ നെസി ജനറല്‍ ആശുപത്രിയിലും പ്രവേശിപ്പിച്ചു.
റിയാദിലെയും ദവാദ്മിയിലെയും ആശുപത്രികളില്‍ കഴിയുന്നവര്‍ തീവ്രപരിചരണ വിഭാഗത്തിലാണ്. വിനീതിന്റെ മൃതദേഹം നെസി ആശുപത്രി മോര്‍ച്ചറിയില്‍. അപകടമുണ്ടായ ഉടനെ സ്ഥലത്തെത്തിയ പൊലീസാണ് പരിക്കേറ്റവരെയും മൃതദേഹത്തെയും ആശുപത്രിയിലെത്തിച്ചത്. മരണപ്പെട്ട വിനീത് നാലുവര്‍ഷം മുമ്പാണ് ഈ കമ്പനിയിലേക്ക് സാങ്കേതിക തൊഴിലാളിയുടെ വിസയിലെത്തിയത്. രണ്ട് വര്‍ഷം മുമ്പ് അവധിക്ക് നാട്ടില്‍ പോയി മടങ്ങി. അടുത്തയാഴ്ച ഇഖാമയുടെ കാലാവധി കഴിയും. അപ്പോള്‍ ഫൈനല്‍ എക്‌സിറ്റില്‍ നാട്ടിലേക്ക് മടങ്ങാനുള്ള തീരുമാനത്തിലായിരുന്നു. അതിനായി കമ്പനിയില്‍ രാജിനല്‍കി, എക്‌സിറ്റ് വിസക്ക് വേണ്ടിയുള്ള കാത്തിപ്പിലായിരുന്നു. അതിനിടയിലാണ് വിധിയുടെ ക്രൂരതയുണ്ടായത്.
അവിവാഹിതനാണ്. വിജയകുമാരിയാണ് അമ്മ. മൂന്ന് മക്കളില്‍ മൂത്തയാളാണ് വിനീത്. രണ്ടാമന്‍ ഒമാനില്‍ ജോലി ചെയ്യുന്നു. മൃതദേഹം നാട്ടില്‍ അയക്കുന്നതിന് ദവാദ്മി കെ.എം.സി.സി പ്രവര്‍ത്തകര്‍ രംഗത്തുണ്ട്.
https://www.facebook.com/Malayalivartha
