65 വയസ്സിന് മുകളിലുള്ളവര്‍ക്ക് വിസ നടപടികള്‍ക്ക് ബിരുദ വിദ്യാഭ്യാസ യോഗ്യത നിര്‍ബന്ധമാക്കും. മാന്‍പവര്‍ പബ്ലിക് അതോറിറ്റി ഇതുസംബന്ധിച്ച് ഉടന്‍ ഉത്തരവ് ഇറക്കിയേക്കും.
വിസ പുതുക്കാനും സ്വകാര്യ മേഖലയിലെ ഒരു കമ്പനിയില്‍നിന്ന് മറ്റൊന്നിലേക്ക് വിസ മാറ്റാനും നിയന്ത്രണം ബാധകമാവും.
നിലവില്‍ 65 വയസ്സ് കഴിഞ്ഞ 23,500 വിദേശികള്‍ രാജ്യത്ത് സ്വകാര്യ മേഖലയിലും 2250 പേര്‍ പൊതുമേഖലയിലും ജോലിചെയ്യുന്നുണ്ടെന്നാണ് പബ്ലിക് അതോറിറ്റി ഫോര്‍ സിവില്‍ ഇന്‍ഫര്‍മേഷന്റെ കണക്ക്. ഇതിനുപുറമെ, ഈ പ്രായപരിധി പിന്നിട്ട 2250 പേര്‍ ഗാര്‍ഹികത്തൊഴിലാളികളായും 9516 വീട്ടമ്മമാരും 488 വിരമിച്ചവരും 1094 തൊഴില്‍രഹിതരും രാജ്യത്തു കഴിയുന്നതായി റിപ്പോര്‍ട്ടില്‍ പറയുന്നു.

പ്രായപരിധി കഴിഞ്ഞവരില്‍ 10,217 പേര്‍ക്ക് ബിരുദമോ ഡിപ്ലോമയോ ഉണ്ട്. 8914 പേര്‍ നിരക്ഷരരാണ്. 8599 പേര്‍ക്ക് എഴുതാനും വായിക്കാനും അറിയാം. 6082 പേര്‍ക്ക് സെക്കന്‍ഡറി വിദ്യാഭ്യാസ യോഗ്യതയും 5618 പേര്‍ക്ക് ഇന്റര്‍മീഡിയറ്റും ഉണ്ട്.
ഉന്നത യോഗ്യതയുള്ളവരും ദീര്‍ഘകാലം സേവനം ചെയ്തുവരുന്നവരുമായ ആളുകളെ മാനുഷിക പരിഗണനകള്‍ വെച്ചും സേവനവും ആവശ്യകതയും കണക്കിലെത്ത് പ്രായം പരിഗണിക്കാതെ രാജ്യത്ത് തുടരാന്‍ അനുവദിക്കണമെന്നാണ് മാന്‍പവര്‍ പബ്ലിക് അതോറിറ്റി ബോര്‍ഡ് അംഗങ്ങളുടെ വിലയിരുത്തല്‍.