ഒമാനിലുണ്ടായ കനത്ത മഴയില് വെള്ളപ്പൊക്കവും ശക്തമായ മഴവെള്ളപ്പാച്ചിലും... ഒഴുക്കില് പെട്ട് കാണാതായ ആറംഗ ഇന്ത്യന് കുടുംബത്തെ കണ്ടെത്താന് കഴിഞ്ഞില്ല
ഒമാനിലുണ്ടായ കനത്ത മഴയില് വിവിധ ഭാഗങ്ങളില് വെള്ളപ്പൊക്കവും ശക്തമായ മഴവെള്ളപ്പാച്ചിലുമുണ്ടായി. വാദി ബനീ ഖാലിദില് ശനിയാഴ്ച വൈകീട്ട് ഒഴുക്കില് പെട്ട് കാണാതായ ആറംഗ ഇന്ത്യന് കുടുംബത്തെ ഇന്നലെയും കണ്ടെത്താന് കഴിഞ്ഞില്ല. സിവില് ഡിഫന്സ്, ആര്.ഒ.പി അംഗങ്ങള് ഇന്നലെ രാവിലെ മുതല് നടത്തിയ തിരച്ചിലില് പങ്കെടുത്തു.
ഞായറാഴ്ച പെയ്ത മഴയെ തുടര്ന്ന് വാദികളിലുണ്ടായ വെള്ളപ്പൊക്കത്തില് നിരവധി വാഹനങ്ങളാണ് കുടുങ്ങിയത്. ഈ വാഹനങ്ങളില് നിന്നെല്ലാമായി 20ലധികം പേരെ പൊലീസും സിവില് ഡിഫന്സും ചേര്ന്ന് രക്ഷിച്ചു. സമാഈലിലെ വാദി സുറൂറില് കുടുങ്ങിയ വാഹനത്തിലുണ്ടായിരുന്ന മൂന്നു പേരെ ആര്.ഒ.പി ഹെലികോപ്ടറിന്റെ സഹായത്തോടെയാണ് രക്ഷപ്പെടുത്തിയത്.നിസ്വ വാദി കര്ഷയില് ആറ് വിദേശികളാണ് വാദിയില് കുടുങ്ങിയത്.
വാദി അല് ഖൂദ്, യന്കല്, ഇബ്ര, ഇബ്രി, മുദൈബി തുടങ്ങിയ സ്ഥലങ്ങളിലെ വാദികളിലാണ് മറ്റുള്ളവര് കുടുങ്ങിയത്. തിങ്കളാഴ്ച ഉച്ചക്കു ശേഷം ദാഖിലിയ, ബാത്തിന, ശര്ഖിയ ഗവര്ണറേറ്റുകളുടെ ഭാഗങ്ങളിലാണ് കനത്ത മഴ പെയ്തത്. സമാഈല്, മുദൈബി, സിനാവ് അടക്കം സ്ഥലങ്ങളിലെ വാദികളിലടക്കം മഴയെ തുടര്ന്ന് അപകടകരമായ വിധത്തില് വെള്ളമുയര്ന്നു.
ഇതേത്തുടര്ന്ന് പല പ്രധാന റോഡുകളിലും ഗതാഗതം പൂര്ണമായും നിര്ത്തിവെച്ചു. റൂവിയടക്കം മസ്കത്തിന്റെ വിവിധ മേഖലകളില് സന്ധ്യയോടെ ചാറ്റല് മഴ പെയ്തു. സമാഈലിലെ വാദി ഔക്കില് കാര് ഒഴുക്കില് പെട്ടു. ഈ കാറിനകത്ത് ആളുകള് ഉള്ളതായി പറയപ്പെടുന്നു. ഇവരെക്കുറിച്ച വിവരങ്ങള് ലഭ്യമല്ല. ജഅ്ലാനില് ബനീ ബുആലിയില് മൂന്ന് വാഹനങ്ങള് ഒഴുക്കില് പെട്ടു. ഈ വാഹനങ്ങളില് ഉള്ളവരെ രക്ഷപ്പെടുത്താന് സിവില് ഡിഫന്സ് രാത്രിയും ശ്രമം തുടരുകയാണ്.
https://www.facebook.com/Malayalivartha