ബ്രിട്ടണില് കൊറോണ വൈറസിന്റെ പുതിയ വകഭേദം കണ്ടെത്തിയത് ആശങ്കാജനകമായ വാര്ത്തയെന്ന് കുവൈറ്റിലെ ഇന്ത്യന് സ്ഥാനപതി
ബ്രിട്ടണില് കൊറോണ വൈറസിന്റെ പുതിയ വകഭേദം കണ്ടെത്തിയത് ആശങ്കാജനകമായ വാര്ത്തയെന്ന് കുവൈറ്റിലെ ഇന്ത്യന് സ്ഥാനപതി സിബി ജോര്ജ്. ബ്രിട്ടണില് കൊറോണ വൈറസിന്റെ പുതിയ വകഭേദം കണ്ടെത്തയതിന്റെ പശ്ചാത്തലത്തിലായിരുന്നു അദ്ദേഹത്തിന്റെ പ്രതികരണം. എംബസിയുടെ ഓപ്പണ് ഹൗസില് സംസാരിക്കുകയായിരുന്നു അദ്ദേഹം. യുകെയില് വൈറസിന്റെ പുതിയ വകഭേദം കണ്ടെത്തിയ പശ്ചാത്തലത്തില് കുവൈറ്റ് ഉള്പ്പെടെയുള്ള വിവിധ രാജ്യങ്ങള് വിമാനത്താവളം അടച്ചു. നിരവധി ജനങ്ങളെയാണ് ഇത് ബാധിച്ചതെന്ന് സ്ഥാനപതി പറഞ്ഞു.
സാഹചര്യം മോശമാണെങ്കിലും നാം പ്രതീക്ഷ കൈവിടരുത്. കോണ്സുലര് സേവനം തടസമില്ലാതെ തുടരുന്നുവെന്ന് ഉറപ്പാക്കുകയാണ് മിഷന്റെ പ്രഥമ പരിഗണന. എംബസിയിലോ പാസ്പോര്ട്ട് ഓഫീസുകളിലോ കോണ്സുലര് സേവനം അവസാനിപ്പിക്കുന്ന സാഹചര്യമുണ്ടാകരുത്. എംബസിയിലും പാസ്പോര്ട്ട് ഓഫീസുകളിലും എത്തുന്നവര് കൊവിഡ് പ്രോട്ടോക്കോള് പാലിക്കണമെന്നും സിബി ജോര്ജ് പറഞ്ഞു.
കോണ്സുലര് ഓപ്പണ് ഹൗസ് എല്ലാ ദിവസവും തുടരുന്നുണ്ട്. ഇതുമായി ബന്ധപ്പെട്ട് എന്ത് വിഷയങ്ങള്ക്കും ഓപ്പണ് ഹൗസില് അമിതാഭ് രഞ്ജനെ സന്ദര്ശിക്കാം. അല്ലെങ്കില് ഞങ്ങള്ക്ക് ഇമെയില് അയക്കുകയും ചെയ്യാമെന്ന് സ്ഥാനപതി വ്യക്തമാക്കി.
പ്രധാനപ്പെട്ട എല്ലാ മെയിലുകളോടും ഫീഡ്ബാക്ക് ഫോമുകളിലെ അഭിപ്രായങ്ങളോടും തങ്ങള് പ്രതികരിക്കാറുണ്ട്. രണ്വീര് ഭാരതിയുടെ അവധിക്കാലത്ത് കോണ്സുലര് സര്വീസിന്റെ മേല്നോട്ടം അമിതാഭ് രഞ്ജന് നിര്വഹിക്കും.
കഴിഞ്ഞ ദിവസം താന് ആഭ്യന്തര മന്ത്രാലയത്തിലെ നാടുകടത്തല് കേന്ദ്രം സന്ദര്ശിക്കുകയും ഉന്നത ഉദ്യോഗസ്ഥരുമായി കൂടിക്കാഴ്ച നടത്തുകയും ചെയ്തെന്നും സ്വദേശത്തേക്ക് പുറപ്പെടുന്നതിന് ഇന്ത്യന് തടവുകാര്ക്ക് സഹായം ചെയ്യുന്നതിന് അധികാരികള്ക്ക് നന്ദി അറിയിക്കുകയും ചെയ്തെന്നും സിബി ജോര്ജ് വ്യക്തമാക്കി.
ഭക്ഷണം, വിമാന ടിക്കറ്റുകള്, രോഗികള്ക്കുള്ള യാത്രാ ക്രമീകരണം എന്നിവ ഉള്പ്പെടെ അര്ഹരായ എല്ലാവര്ക്കും ഐസിഡബ്ല്യുഎഫിന്റെ സഹായം നല്കുന്നത് തുടരുന്നു. ജയിലുകള്, നാടുകടത്തല് കേന്ദ്രങ്ങള്, പൊലീസ് സ്റ്റേഷനുകള് എന്നിവ എംബസി ഉദ്യോഗസ്ഥര് പതിവായി സന്ദര്ശിക്കാറുണ്ടെന്നും വരും ദിവസങ്ങളിലും ഇത് തുടരുമെന്നും അദ്ദേഹം വ്യക്തമാക്കി.
എമര്ജന്സി സര്ട്ടിഫിക്കറ്റുകള്ക്കായുള്ള അപേക്ഷകള് ലഭിക്കുന്നുണ്ട്. ഒരു ദിവസം തന്നെ എമര്ജന്സി സര്ട്ടിഫിക്കറ്റുകള് വിതരണം ചെയ്ത് എംബസിയിലേക്ക് ഒന്നിലധികം സന്ദര്ശനം നടത്തേണ്ടി വരുന്നത് ഒഴിവാക്കുന്നതിനാണ് തങ്ങളുടെ ശ്രമമെന്നും സിബി ജോര്ജ് വ്യക്തമാക്കി.
നിരവധി എമര്ജന്സി സര്ട്ടിഫിക്കറ്റുകള് ഇനിയും അപേക്ഷകര് കൈപ്പറ്റാനുണ്ടെന്നും അത് അപേക്ഷകര് സ്വീകരിക്കണമെന്നും അദ്ദേഹം പറഞ്ഞു.
എംബസിയിലേക്ക് പ്രവേശിക്കുന്നതിന് ഒരു ഇന്ത്യക്കാരനും നിയന്ത്രണമേര്പ്പെടുത്തിയിട്ടില്ല. അടിയന്തിര സേവനങ്ങള്ക്കായി ഓഫീസ് സമയത്തിന് ശേഷവും അവധി ദിവസങ്ങളിലും ആര്ക്കും വരാവുന്നതാണ്.
ഓപ്പണ് ഹൗസുകളില് ഏത് പരാതിയും അഭിപ്രായവും നിര്ദ്ദേശവും ഉന്നയിക്കാം. പരിഹരിക്കപ്പെടാത്ത പ്രശ്നങ്ങള്ക്ക് മുന്ഗണന നല്കുമെന്നും എല്ലാ ആശങ്കകളും എംബസി പരിഹരിക്കുമെന്നും സ്ഥാനപതി ചൂണ്ടിക്കാട്ടി.
കുവൈറ്റിലെ ജെഇഇ പരീക്ഷാ കേന്ദ്രം, എഞ്ചിനീയര്മാരുടെ പ്രശ്നം തുടങ്ങിയ വിവിധ വിഷയങ്ങളില് തങ്ങള് പുരോഗതി കൈവരിച്ചു. 'കുവൈറ്റിലെ തൊഴില് നിയമങ്ങളും വിദേശ ജോലിയും' എന്നതായിരുന്നു ഇത്തവണത്തെ ഓപ്പണ് ഹൗസിന്റെ വിഷയമെന്നും സ്ഥാനപതി കൂട്ടിച്ചേര്ത്തു.
https://www.facebook.com/Malayalivartha
