മൾട്ടിപ്പിൾ മൈലോമ ചികിത്സാ രംഗത്തെ വിദഗ്ദ്ധർ അണിനിരക്കുന്ന ഇന്ത്യൻ മൈലോമ കോൺഗ്രസിന് അമൃത ആശുപത്രിയിൽ തുടക്കമായി.സമ്മേളനത്തിന്റെ ഉദ്ഘാടനം അമൃത സ്കൂൾ ഓഫ് നാനോ സയൻസ് ആൻഡ് മോളിക്യുലാർ മെഡിസിൻ വിഭാഗം ഡീൻ പ്രൊഫസർ ശാന്തികുമാർ നായർ നിർവഹിച്ചു. ഇന്ത്യൻ മൈലോമ അക്കാദമിക് ഗ്രൂപ്പ് ( ഇമേജ് ) പ്രസിഡന്റ് ജനറൽ ഡോ. വേലു നായർ, സെക്രട്ടറി ഡോ. ഉദയ് യാനമന്ദ്ര, സംഘാടക സമിതി അധ്യക്ഷനും അമൃത ആശുപത്രി ക്ലിനിക്കൽ ഹെമറ്റോളജി വിഭാഗം മേധാവിയുമായ ഡോ. നീരജ് സിദ്ധാർത്ഥൻ എന്നിവരും ചടങ്ങിൽ പങ്കെടുത്തു. മൈലോമ ചികിത്സാ രംഗത്തെ ഭാവി പ്രവർത്തനങ്ങൾ ലക്ഷ്യമിട്ടുള്ള 'വിഷൻ 2030' സമ്മേളനത്തിന്റെ ഭാഗമായി അവതരിപ്പിച്ചു.

മൈലോമ ചികിത്സയിൽ ഇമ്മ്യൂണോതെറാപ്പി, സ്റ്റെം സെൽ ട്രാൻസ്പ്ലാന്റേഷൻ, അത്യാധുനിക രോഗനിർണ്ണയ രീതികൾ എന്നിവയിലുണ്ടായ മാറ്റങ്ങൾ സമ്മേളനം ചർച്ച ചെയ്യും. ലോകപ്രശസ്ത മൈലോമ വിദഗ്ധരായ ഡോ. വിൻസെന്റ് രാജ് കുമാർ, ഡോ. ഷാജി കുമാർ, ഡോ. നിഖിൽ സി. മുൻഷി തുടങ്ങി 15-ഓളം രാജ്യാന്തര ഫാക്കൽറ്റികൾ സമ്മേളനത്തിൽ വിവിധ വിഷയങ്ങളിൽ പ്രബന്ധങ്ങൾ അവതരിപ്പിക്കും.

 ആദ്യദിനത്തിൽ ഹൈ-റിസ്ക് സ്മോൾഡറിംഗ് മൈലോമ ചികിത്സയെക്കുറിച്ച് നടന്ന ഗൗരവകരമായ സംവാദവും വിദഗ്ദർ നയിച്ച ക്ലാസ്സുകളും ഏറെ ശ്രദ്ധിക്കപ്പെട്ടു. മൂന്ന് ദിവസം നീണ്ടുനിൽക്കുന്ന ഈ രാജ്യാന്തര സമ്മേളനം ജനുവരി 11 ഞായറാഴ്ച സമാപിക്കും. ഞായറാഴ്ച രാവിലെ രോഗികൾക്കും അവരുടെ കുടുംബാംഗങ്ങൾക്കും വിദഗ്ധ ഡോക്ടർമാരുമായി നേരിട്ട് സംവദിക്കാനുള്ള പ്രത്യേക സെഷനും കോൺഗ്രസിന്റെ ഭാഗമായി ഒരുക്കിയിട്ടുണ്ട്.