ഖത്തറില്‍ ആദ്യ വാനര വസൂരി കേസ് സ്ഥിരീകരിച്ചതായി ആരോഗ്യ മന്ത്രാലയം അറിയിച്ചു. യു.എ.ഇയ്ക്കും സൗദിക്കും പിന്നാലെയാണ് ഇപ്പോൾ ഖത്തറിലും വാനര വസൂരി റിപ്പോർട്ട് ചെയ്യുന്നത്. വിദേശത്തു നിന്നും മടങ്ങിയെത്തിയ വ്യക്​തിയിലാണ്​ രോഗം കണ്ടെത്തിയത്​. രോഗിയുമായി സമ്പര്‍ക്കം പുലര്‍ത്തിയ വ്യക്തികളെ തിരിച്ചറിഞ്ഞ്​ ഇവരുടെ ആരോഗ്യ സ്ഥിതി 21 ദിവസത്തേക്ക്​ നിരീക്ഷിക്കും.

​രോഗിയെ ആശുപത്രി ഐസൊലേഷനില്‍ പ്രവേശിപ്പിച്ച്‌​ ആവശ്യമായി ചികിത്സ നല്‍കിയതായി അറിയിപ്പില്‍ വ്യക്തമാക്കി. രോഗം എളുപ്പത്തില്‍ തിരിച്ചറിയാനും, നി​യന്ത്രിക്കുന്നതിനും ആവശ്യമായ മുന്‍കരുതലുകള്‍ സ്വീകരിച്ചതായി മ​ന്ത്രാലയം വ്യക്തമാക്കി. രോഗ നിര്‍ണയത്തിന്​ ദേശീയ ലബോറട്ടറികള്‍ സജ്ജമാക്കിയതിനൊപ്പം രോഗ നിയന്ത്രണത്തിനുള്ള മാര്‍ഗനിര്‍ദേശങ്ങളും ആരോഗ്യവിഭാഗം തയ്യാറാക്കിയിട്ടുണ്ട്​.

യാത്രാക്കാര്‍ ഉള്‍പ്പെടെയുള്ളവര്‍ ആരോഗ്യ നിര്‍ദ്ദേശങ്ങള്‍ പാലിക്കുകയും ആവശ്യമായ മുന്‍കരുതല്‍ സ്വീകരിക്കുകയും ചെയ്യണം. വാനര വസൂരി സംബന്ധിച്ച്‌​ ചോദ്യങ്ങള്‍ക്കും സംശയങ്ങള്‍ക്കും 16000 നമ്പറില്‍ ബന്ധപ്പെടാവുന്നതാണ്​.

​ലോകാരോഗ്യ സംഘടനയുമായി ഏകോപിപ്പിച്ച്‌​ രാജ്യാന്തര തലത്തിലെയും മേഖലയിലെയും രോഗവ്യാപനം സംബന്ധിച്ച്‌​ സൂക്ഷ്മമായ നിരീക്ഷണം നടത്തുന്നതായും ആരോഗ്യ മന്ത്രാലയം വെബ്​സൈറ്റില്‍ വിശദമാക്കി. ലോകാരോഗ്യ സംഘടനയുടെ വ്യാഴാഴ്ചത്തെ കണക്കു പ്രകാരം 70 രാജ്യങ്ങളിലായി 14,000 വാനര വസൂരി കേസുകളാണ്​ സ്ഥിരീകരിച്ചത്​.