അബുദാബിയിലെ താമസക്കാർക്ക് ആശ്വാസ പ്രഖ്യാപനവുമായി അബുദാബി റിയൽ എസ്റ്റേറ്റ് സെന്റർ രംഗത്ത്. ഇനി ഒരു അറിയിപ്പ് ഉണ്ടാകുന്നത് വരെ യാതൊരു വിധത്തിലുള്ള വാടക വർധനവും പാടില്ലെന്ന് ഔദ്യോഗികമായി പ്രഖ്യാപിച്ചു. ഈ പ്രഖ്യാപനം നിലവിലെ പ്രവാസികൾക്ക് വലിയൊരു സഹായമാകുന്നതിനാൽ തന്നെ പൂർണ പിന്തുണയും അറിയിച്ചു.

അബുദാബിയിലെ റിയൽ എസ്റ്റേറ്റ് മേഖലയിലെ റെഗുലേറ്ററി അതോറിറ്റിയുടെ പുതിയ കരാർ അനുസരിച്ച് ഒരു വാടകക്കാരൻ പുതിയ ഫ്ലാറ്റിലേക്കോ ഓഫീസിലേക്കോ മാറുമ്പോഴും, നിലവിൽ താമസിക്കുന്ന കരാർ പുതുക്കുമ്പോഴും ഒരു കാരണവശാലും ഇനി വാടക കൂട്ടാൻ പാടില്ല.
അവസാനത്തെ കരാറിൽ എത്രയാണോ തുക കാണിച്ചിരിക്കുന്നത് അതുതന്നെയായിരിക്കും വാടക.

അതിനാൽ ഇനി യാതൊരു വിധത്തിലുള്ള അധിക തുകയും ഈടാക്കാൻ കെട്ടിട ഉടമകളെ അനുവദിക്കില്ല എന്നും ശക്തമായി പറഞ്ഞു. അബുദാബിയിലെ റിയൽ എസ്റ്റേറ്റ് മേഖല നല്ലൊരു നേട്ടം കൈവരിക്കുന്നതിനിടയിലാണ് ഈ തീരുമാനം വരുന്നത്. ഇത് ഒരു പക്ഷെ തിരിച്ചടിയായി മാറാൻ സാധ്യതയുള്ളതായാണ് വിദഗ്ദ്ധരുടെ അഭിപ്രായം.

നിലവിൽ താമസസ്ഥലങ്ങൾ, കൊമേഴ്‌സ്യൽ കെട്ടിടങ്ങൾ എന്നിവയ്ക്കുള്ള ആവശ്യം വലിയ രീതിയിൽ വർധിക്കുകയാണ്. ഇതിനൊപ്പം വിദേശ നിക്ഷേപകരുടെ എണ്ണവും റിയൽ എസ്റ്റേറ്റ് വിപണിയിൽ വൻതോതിൽ ഉയർന്നതായാണ് റിപ്പോർട്ടുകൾ വ്യക്തമാകുന്നത്. അതിനാൽ വിപണിയിൽ ആവശ്യക്കാർ കൂടുന്ന ഈ സാഹചര്യത്തിൽ വാടക കുതിച്ചുയരാനും സാധ്യതയുണ്ട്.

എന്നാൽ ഇക്കാര്യങ്ങൾ മുൻകൂട്ടി കണ്ടു കൊണ്ടാണ് ഭൂവുടമകളും വാടകക്കാരും തമ്മിലുള്ള ബന്ധം നിലനിർത്താൻ റെഗുലേറ്ററി അതോറിറ്റി ഈ അടിയന്തര നടപടി സ്വീകരിച്ചിരിക്കുന്നത്. ഉയർന്ന വാടക എപ്പോഴും സാധാരണക്കാരായ പ്രവാസികളുടെ കുടുംബ ബജറ്റിനെയും ബിസിനസ്സ് സ്ഥാപനങ്ങളുടെ പ്രവർത്തനത്തെയും സാരമായി ബാധിക്കുന്ന ഒന്നാണ്.

അതിനാൽ വാടക വർധനവ് താല്ക്കാലികമായി മരവിപ്പിക്കുന്നത് വഴി കുടുംബങ്ങൾക്കും ബിസിനസുകൾക്കും വലിയൊരു സാമ്പത്തിക സുരക്ഷിതത്വം തന്നെ നൽകുന്നതായാണ് വിദഗ്ദ്ധർ പറയുന്നത്. കൂടാതെ ജീവിതച്ചെലവുകളിൽ ഉണ്ടാകുന്ന പെട്ടെന്നുള്ള അധിക ചെലവുകളും മറ്റും കുറയ്ക്കാൻ ഇത് സഹായിക്കുകയും ചെയ്യും.

കൂടാതെ വീട്ടുവാടക ഉയരുന്നത് മൂലമുണ്ടാകുന്ന പണപ്പെരുപ്പം ഇല്ലാതാക്കാനും വിപണിയിലെ വിലക്കയറ്റത്തിനെതിരെ ഒരു പരിധി നിയന്ത്രിക്കാനും ഈ പുതിയ നയം സഹായിക്കും. അതേസമയം അബുദാബിയിലെ വീട് യൂണിറ്റുകൾക്കായുള്ള ആവശ്യം പ്രതിദിനം വർധിച്ചു കൊണ്ടിരിക്കുകയാണ്.

അതിനാൽ ഇത്തരമൊരു സാഹചര്യത്തിൽ വീട്ടു ചെലവുകൾ മറ്റ് സാമ്പത്തിക കാര്യങ്ങൾ എന്നിവ കൃത്യമായി നിലനിർത്താൻ ഈ തീരുമാനം വാടകക്കാരെ സഹായിക്കുമെന്ന കാര്യം ഉറപ്പാണ്. കൂടുതൽ പണം മറ്റുള്ള ആവശ്യങ്ങൾക്കായി മാറ്റിവെക്കാനും ഈ നീക്കങ്ങൾ ഒരു പരിധി വരെ സഹായിക്കുമെന്നാണ് സാമ്പത്തിക വിദഗ്ദ്ധരും അഭിപ്രായപ്പെടുന്നത്.