ദുബായില്‍ ഡ്യൂട്ടി ഫ്രീ മില്യണയര്‍ നറുക്കെടുപ്പില്‍ മലയാളിക്ക് 10 ലക്ഷം യു.എസ്. ഡോളര്‍ (ഏകദേശം ആറര കോടി രൂപ) സമ്മാനം. കോട്ടയം കറുകച്ചാല്‍ സ്വദേശി അജേഷ് പദ്മനാഭനെയാണ് സ്വപ്നതുല്യമായ ഭാഗ്യം തേടിയെത്തിയത്. 1000 ദിര്‍ഹം വിലയുള്ള 1584 നമ്പര്‍ ടിക്കറ്റ് മൂന്നാഴ്ച മുന്‍പ് ഓണ്‍ലൈന്‍ വഴിയാണ് അജേഷ് എടുത്തത്.

ചൊവ്വാഴ്ച ദുബായ് അന്താരാഷ്ട്ര വിമാനത്താവളത്തില്‍വെച്ചായിരുന്നു നറുക്കെടുപ്പ്. കഴിഞ്ഞ 10 വര്‍ഷമായി ഫെഡറല്‍ ഇലക്ട്രിസിറ്റി ആന്‍ഡ് വാട്ടര്‍ അതോറിറ്റിയില്‍ സ്‌റ്റോര്‍ കീപ്പറായി ജോലി ചെയ്യുന്ന അജേഷ് ഇടയ്ക്കിടെ നറുക്കെടുപ്പില്‍ ഭാഗ്യപരീക്ഷണം നടത്താറുണ്ട്. എന്നാല്‍, ആദ്യമായാണ് ഇത്രയും വലിയ തുക സമ്മാനമായി തേടിയെത്തുന്നത്.

ഭാര്യക്കും രണ്ടുമക്കള്‍ക്കുമൊപ്പം ഷാര്‍ജയിലാണ് താമസം. അച്ഛന്‍ നേരത്തെ മരിച്ചു. ഏകമകനായ അജേഷിനൊപ്പം ഷാര്‍ജയില്‍ കഴിയുന്ന അമ്മ ഇപ്പോള്‍ നാട്ടിലേക്ക് പോയിട്ടുണ്ട്. അമ്മ കാന്‍സര്‍ രോഗിയായതിനാല്‍ സമ്മാനത്തുക പാവപ്പെട്ട കാന്‍സര്‍രോഗികളുടെ ചികിത്സയ്ക്ക് കൂടി വിനിയോഗിക്കണമെന്നാണ് അജേഷിന്റെ ആഗ്രഹം.