മനോഹരമായ നൃത്തച്ചുവടുകളിലൂടെ ട്വിറ്ററിലും മറ്റ് സമൂഹ മാധ്യമങ്ങളിലും വലിയ ചലനമുണ്ടാക്കിയ മധ്യ വയസ്‌കനായ പ്രൊഫസര്‍ സഞ്ജീവ് ശ്രീവാസ്തവ വീണ്ടും ഞെട്ടിക്കുന്ന പ്രകടനവുമായി ട്വിറ്ററില്‍.

ഇത്തവണ ബോളിവുഡ് സൂപ്പര്‍താരം ഹൃതിക് റോഷന് വേണ്ടിയാണ് 46-കാരനായ ശ്രീവാസ്തവയുടെ പ്രകടനം. മധ്യപ്രദേശിലെ ഭോപ്പാലില്‍ ഒരു സ്വകാര്യ കോളജിലെ ഇലക്‌ട്രോണിക്‌സ് പ്രൊഫസറാണ് ശ്രീവാസ്തവ.

കടുത്ത ഗോവിന്ദ ഫാനായ അദ്ദേഹം മുമ്പ് ഗോവിന്ദയുടെ സ്‌റ്റെപ്പുകള്‍ അനുകരിച്ചായിരുന്നു പ്രശസ്തനായത്.

അദ്ദേഹത്തിന്റെ ഒരു ബന്ധുവിന്റെ വിവാഹ ചടങ്ങിനിടെ സ്‌റ്റേജിലേക്ക് കയറി നടത്തിയ പ്രകടനം ആരോ പകര്‍ത്തി ട്വിറ്ററില്‍ ഇട്ടതും ഇന്ത്യയാകമാനം വൈറലായി.

നൃത്തം പഠിക്കാത്ത ശ്രീവാസ്തവ മനോഹരമായി ഡാന്‍സ് ചെയ്യുന്നത് കണ്ട് സിനിമാക്കാര്‍ അടക്കം പ്രശംസയുമായി എത്തിയിരുന്നു.