എട്ടുകാലും വച്ചു ചുമ്മാതെ നടന്നുപോകുന്നത് കണ്ടാല്‍ തന്നെ പലര്‍ക്കും പേടിയാണ് എട്ടുകാലിയെ. അപ്പോള്‍പ്പിന്നെ അതിന് ചെന്നായുടെ മുഖവും കൂടിയുണ്ടെങ്കിലോ? എന്തു ചെയ്യാനാണല്ലേ! അത്തരത്തിലൊരു എട്ടുകാലിയെ അടുത്തിടെ ഗവേഷകര്‍ ലോകത്തിനു പരിചയപ്പെടുത്തി. തെക്കേ അമേരിക്കയില്‍ നിന്നുള്ള ഈ എട്ടുകാലിയുടെ പേരു കേള്‍ക്കാന്‍ പക്ഷേ രസമാണ്– ബണ്ണി ഹാര്‍വെസ്റ്റ്മാന്‍. Metagryne bicolumnata എന്നു ശാസ്ത്രനാമം.

എട്ടുകാലി ഉള്‍പ്പെടുന്ന അരക്ക്‌നിഡ് കുടുംബത്തില്‍ത്തന്നെയാണ് ഇതിന്റെയും സ്ഥാനം. പക്ഷേ എട്ടുകാലുകളൊക്കെ ഉണ്ടെങ്കിലും പൂര്‍ണമായും എട്ടുകാലിയെന്നു വിളിക്കാനാകില്ലെന്നാണു ഗവേഷകര്‍ പറയുന്നത്. മാത്രവുമല്ല 'ലുക്ക്' മാത്രമേയുള്ളൂ, ഈ എട്ടുകാലി ആളൊരു പാവമാണ്. ഒരു തരി വിഷം പോലും ദേഹത്തില്ല, ആര്‍ക്കും ഒരു ദ്രോഹവും ചെയ്യില്ല.

ഇക്വഡോറിലെ ആമസോണ്‍ മഴക്കാടുകളില്‍ നിന്നാണ് ഇതിനെ കണ്ടെത്തിയത്. ആന്‍ഡ്രിയാസ് കേയ് എന്ന ഫൊട്ടോഗ്രാഫര്‍ കഴിഞ്ഞ വര്‍ഷം ഇതിന്റെ ചിത്രം പകര്‍ത്തിയെങ്കിലും അടുത്തിടെയാണു കൂടുതല്‍ വിവരങ്ങള്‍ പുറത്തുവന്നത്. ചരിത്രം അന്വേഷിച്ചു ചെന്നപ്പോള്‍ ചില്ലറക്കാരനൊന്നുമല്ല കക്ഷി. ഏകദേശം 40 കോടി വര്‍ഷം മുന്‍പ് ഇവ ഭൂമിയിലുണ്ടായിരുന്നു. അതായത്, ദിനോസറുകള്‍ക്കും മുന്‍പ്! കറുപ്പും മഞ്ഞയും ഇളംപച്ചയും നിറഞ്ഞ ശരീരമാണ് ഇവയ്ക്കുള്ളത്. യഥാര്‍ഥ കണ്ണുകള്‍ക്കു മുകളില്‍ രണ്ടു ചെറിയ മഞ്ഞപ്പൊട്ടുകളുണ്ട്. അവ കണ്ണുകളും യഥാര്‍ഥ കണ്ണുകള്‍ മൂക്കുമാണെന്നു തോന്നിപ്പിക്കും. ഇതോടൊപ്പം പുറകിലായി രണ്ടു മുയല്‍ച്ചെവികളെപ്പോലുള്ള ഭാഗവും.

അതു കൂടിച്ചേരുന്നതോടെ ഒറ്റനോട്ടത്തില്‍ സംഗതി ഒരു ചെന്നായെപ്പോലെയായി! 'മുയല്‍ച്ചെവി' കാരണമാണ് ബണ്ണി എന്ന പേരു വീണത്. 'ഡാഡി ലോങ് ഹെഡ്‌സ്' എന്നും വിളിപ്പേരുണ്ട്.

സമൂഹമാധ്യമങ്ങളില്‍ ഇതിന്റെ ചിത്രം വന്നെങ്കിലും പലരും കരുതിയത് സംഗതി ഫോട്ടോഷോപ്പാണെന്നായിരുന്നു. എന്നാല്‍ പിന്നീട് ആന്‍ഡ്രിയാസ് തന്നെ കൂടുതല്‍ ചിത്രങ്ങള്‍ പുറത്തുവിടുകയായിരുന്നു. ഫോട്ടോയില്‍ വലുപ്പമൊക്കെ തോന്നുമെങ്കിലും നമ്മുടെ ചൂണ്ടുവിരലിന്റെ അത്രയേയുള്ളൂ ഈ ബണ്ണി ഹാര്‍വെസ്റ്റ്മാന്‍!