ആട് ഒരു ഭീകരജീവിയല്ല, നമ്മുടെ പ്രിയങ്കരിയാണ് എന്ന് വിളിച്ചു പറഞ്ഞ ആ കുട്ടികള്‍ ഇതാ; അവരുടെ ഊഷ്മളസ്‌നേഹത്തിന് സോഷ്യല്‍ മീഡിയയുടെ കയ്യടി
വീട്ടില്‍ വളര്‍ത്തിയിരുന്ന ആടിനെ വിറ്റെങ്കിലും അതിനെ ദിവസവും കാണാന്‍ അവസരം തരണമെന്ന് അപേക്ഷിച്ച് പുതിയ ഉടമയ്ക്ക് കത്തെഴുതിയ കുഞ്ഞുങ്ങളുടെ സ്‌നേഹവും അവരുടെ നന്‍മയും സൈബര്‍ ലോകത്ത് സജീവചര്‍ച്ചയായിരുന്നു. ഉടമസ്ഥന്‍ വിറ്റ ആട്ടിന്‍കുട്ടികളെ കാണാനായി വാങ്ങിയ ആളിന്റെ വീട് തേടിപിടിച്ച് ചെന്നു ആ കുട്ടികള്‍. എന്നാല്‍ ഉടമസ്ഥന്‍ ഇല്ലാതിരുന്നതിനാല്‍ കാണാന്‍ അനുവാദം ലഭിച്ചില്ല. ഇതേതുടര്‍ന്ന് ഒരു കത്ത് എഴുതിവെച്ചിട്ടാണ് ഇവര്‍ പോയത്. ആ കത്താണ് പിന്നീട് വൈറലായത്.
മലയാളി ഒന്നടങ്കം തേടിയ ആ കുട്ടികളെ കണ്ടെത്തി കുറിപ്പിട്ടിരിക്കുകയാണ് നിധിന്‍ എന്ന യുവാവ്.
കുറിപ്പ് വായിക്കാം: 'ഇതാണ് മലയാളികള്‍ തേടി നടന്ന ആ കുട്ടികള്‍. തങ്ങളുടെ പ്രിയപ്പെട്ട ആട്ടിന്‍ കുട്ടികളെ കാണുവാന്‍ അനുവാദം തരണമെന്ന ആവശ്യവുമായി രണ്ട് കുട്ടികള്‍ എഴുതിയ കത്ത് സോഷ്യല്‍ മീഡിയയില്‍ വൈറലായിരുന്നു. ആ കുട്ടികള്‍ക്ക് അഭിനന്ദനങ്ങളുമായി നിരവധി ആളുകള്‍ എന്നെ ബന്ധപ്പെട്ടിരുന്നു.
കൊല്ലം ശാസ്താംകോട്ട ബിഷപ്പ് എം എം സി എസ് പി എം സ്‌കൂളിലെ അഞ്ചാം ക്ലാസ് വിദ്യാര്‍ഥിനിയായ അലീന കോശി, നാലാം ക്ലാസ് വിദ്യാര്‍ഥി ജോര്‍ജി കോശി, ഒന്നാം ക്ലാസ് വിദ്യാര്‍ഥി ആരോണ്‍ എസ് മാത്യു എന്നീ കുട്ടികളാണ് ആ കത്തിന് പിന്നില്‍. ചക്കുവള്ളി തെക്കേഭാഗത്ത് വീട്ടില്‍ കോശിയുടെയും സുനി കോശിയുടെയും മക്കളാണ് ഈ കുട്ടികള്‍. ഇവര്‍ ബഹ്റൈനില്‍ താമസമായിരുന്നു. കഴിഞ്ഞ വര്‍ഷമാണ് കുട്ടികളെ നാട്ടിലെ സ്‌കൂളില്‍ ചേര്‍ത്തത്.
(ഒരു പരിചയക്കാരനിലൂടെ ഈ കുട്ടികളെ കണ്ടെത്തി അവരുടെ ആടിനെ കാണാനുള്ള അനുവാദം നിധിന്‍ വാങ്ങി നല്‍കി). ആ കുട്ടികള്‍ ഇപ്പോള്‍ ആട്ടിന്‍ കുട്ടികള്‍ക്കൊപ്പം ഈ വേനല്‍ക്കാലം അടിച്ചു പൊളിക്കുവാണ്. ഒരു നിമിഷത്തേക്ക് എങ്കിലും ബാല്യത്തിന്റെ മധുരമുള്ള ഓര്‍മകളിലേക്ക് മലയാളികളെ കൊണ്ടുപോകുവാനും സഹജീവി സ്‌നേഹത്തിന്റെ ആഴവും പരപ്പും നമുക്ക് കാണിച്ചു തരുവാനും ആ കത്തിലൂടെ ഈ കുട്ടികള്‍ക്ക് സാധിച്ചു. പ്രിയപ്പെട്ട കുഞ്ഞു മക്കള്‍ക്ക് ഒരായിരം ഉമ്മകള്‍.' നിധിന്‍ കുറിച്ചു.
https://www.facebook.com/Malayalivartha
