പതിനഞ്ചാം വയസിൽ തന്നെ ഇന്ത്യൻ ക്രിക്കറ്റിൽ വലിയ താരമായി വളർന്ന വൈഭവ് സൂര്യവംശിക്ക് ലഭിച്ച അപൂർവ അംഗീകാരത്തിൽ വിയോജിപ്പ് പ്രകടിപ്പിച്ച് ക്രിക്കറ്റ് ഇതിഹാസം സച്ചിൻ ടെണ്ടുൽക്കർ. ദുലീപ് ട്രോഫിയിൽ ഈസ്റ്റ് സോൺ ടീമിന്റെ വൈസ് ക്യാപ്റ്റനായി വൈഭവിനെ നിയമിച്ച തീരുമാനമാണ് സച്ചിൻ ചോദ്യം ചെയ്തത്. റെഡിറ്റിൽ ആരാധകരുമായി നടത്തിയ ചോദ്യോത്തര പരിപാടിയിലാണ് സച്ചിൻ തന്റെ നിലപാട് വ്യക്തമാക്കിയത്. പതിനഞ്ചാം വയസിൽ തന്നെ ഇത്ര വലിയ ഉത്തരവാദിത്തം നൽകുന്നത് അൽപം നേരത്തെയായിപ്പോയെന്നാണ് സച്ചിന്റെ അഭിപ്രായം. റെഡ് ബോൾ ക്രിക്കറ്റിൽ കൂടുതൽ മത്സരങ്ങൾ കളിച്ച് അനുഭവസമ്പത്ത് നേടാൻ വൈഭവിന് അവസരം നൽകണമെന്നും ഓരോ ഘട്ടവും പിന്നിട്ട് ക്രമേണ മുന്നോട്ടുപോകുന്നതാണ് ഉചിതമെന്നും സച്ചിൻ പറഞ്ഞു.

ദുലീപ് ട്രോഫിക്ക് മുമ്പ് ബിഹാറിനായി വെറും എട്ട് ഫസ്റ്റ് ക്ലാസ് മത്സരങ്ങൾ മാത്രമാണ് വൈഭവ് കളിച്ചിരുന്നത്. എന്നിട്ടും നൂറിലധികം ഫസ്റ്റ് ക്ലാസ് മത്സരങ്ങൾ കളിച്ച പരിചയമുള്ള അഭിമന്യു ഈശ്വറിനെപ്പോലുള്ള സീനിയർ താരങ്ങളെ മറികടന്നാണ് ഇഷാൻ കിഷന്റെ വൈസ് ക്യാപ്റ്റനായി വൈഭവിനെ നിയമിച്ചത്. ഈ തീരുമാനം നേരത്തെയും ക്രിക്കറ്റ് ലോകത്ത് ചർച്ചയായിരുന്നു. ടൂർണമെന്റിനിടെ ഇഷാൻ കിഷന് പരിക്കേറ്റപ്പോൾ ടീമിന്റെ നായകസ്ഥാനവും വൈഭവിന് ഏറ്റെടുക്കേണ്ടിവന്നു. ഐപിഎല്ലിലെ തകർപ്പൻ പ്രകടനങ്ങളിലൂടെ ശ്രദ്ധ നേടിയ താരം ഇന്ത്യൻ ടി20 ടീമിലും ഇടംപിടിച്ചിട്ടുണ്ട്. എന്നാൽ കഴിവും പ്രതിഭയും അംഗീകരിക്കുമ്പോഴും നേതൃത്വത്തിലേക്ക് ഇത്ര വേഗത്തിൽ ഉയർത്തേണ്ടതില്ലെന്നാണ് സച്ചിന്റെ നിലപാട്. യുവതാരത്തിന് കൂടുതൽ മത്സരപരിചയവും വളരാനുള്ള സമയവുമാണ് നൽകേണ്ടതെന്ന സച്ചിന്റെ ഉപദേശം ക്രിക്കറ്റ് ലോകത്ത് പുതിയ ചർച്ചയ്ക്ക് വഴിതുറക്കുകയാണ്.