അഞ്ചുവര്‍ഷങ്ങള്‍ക്ക് ശേഷം എത്തിയ തിരഞ്ഞെടുപ്പിനെ ഏറെ ആവശത്തോടെയാണ് എല്ലാവരും കണ്ടത്. പ്രവാസികളുള്‍പ്പടെ മുന്‍കൂട്ടി ടിക്കറ്റെടുത്ത് വോട്ട് ചെയ്യാന്‍ എത്തണം എന്ന ആഗ്രഹത്തിലായിരുന്നു. തിരഞ്ഞെടുപ്പ് ആവേശം മൂത്ത് എടുത്ത ടിക്കറ്റ് ഓണ്‍ലൈനില്‍ പോസ്റ്റ് ചെയ്ത ഒരു പ്രവാസിക്ക് വലിയ പണിയാണ് കിട്ടിയത്.

മാംഗളൂരു സ്വദേശിയായ ജോല്‍സന്‍ ലാബു എന്ന ഇരുപത്തിയൊമ്പതുകാരനാണ് ഈ ഓണ്‍ലൈന്‍ പോസ്റ്റ് കാരണം വെട്ടിലായത്. എയര്‍ ഇന്ത്യയില്‍ നാട്ടിലേക്ക് വരാന്‍ എടുത്ത ടിക്കറ്റ് പോസ്റ്റ് ചെയ്തതിനോടൊപ്പം ഇഷ്ടപ്പെടുന്ന പാര്‍ട്ടിക്ക് പരസ്യപിന്തുണയും വിഡിയോയിലൂടെ പ്രഖ്യാപിച്ചിരുന്നു.

മാര്‍ച്ച് 29-നാണ് ജോല്‍സന്‍ വിഡിയോ പോസ്റ്റ് ചെയ്ത്. വിഡിയോയില്‍ നിന്നും ടിക്കറ്റിന്റെ പിഎന്‍ആര്‍ നമ്പര്‍ മനസിലാക്കിയ ഒരു വിരുതന്‍ രണ്ട് മണിക്കൂറിനുള്ളില്‍ ഈ ടിക്കറ്റ് റദ്ദാക്കി. ഏപ്രില്‍ ഒന്നിനാണ് ലാബുവിനിത് മനസിലാകുന്നത്.

21,045 രൂപയായിരുന്നു ടിക്കറ്റിന്റെ വില. 9,000 രൂപ മാത്രമാണ് കമ്പനി ഇയാള്‍ക്ക് തിരികെ നല്‍കിയത്. ടിക്കറ്റ് റദ്ദാക്കിയത് അറിഞ്ഞ ദിവസം തന്നെ ലാബൂ വീണ്ടും ടിക്കറ്റ് ബുക്ക് ചെയ്തു. രണ്ടാമത് ഏതായാലും വിഡിയോ പോസ്റ്റ് ചെയ്ത് ആവേശം കാണിക്കാനൊന്നും ലാബു നിന്നില്ല.