ബിഗ് ടിക്കറ്റ് നറുക്കെടുപ്പില്‍ 1.5 കോടി ദിര്‍ഹം (ഏകദേശം 28.25 കോടി രൂപ) നേടിയ മലയാളി ആരാണെന്ന് ഒടുവില്‍ കണ്ടെത്തി. ഫലപ്രഖ്യാപനം കഴിഞ്ഞ് അധികൃതര്‍ പലതവണ ഫോണില്‍ ബന്ധപ്പെട്ടെങ്കിലും ആളെ കണ്ടെത്താന്‍ കഴിഞ്ഞിരുന്നില്ല. ഇതോടെ മാധ്യമങ്ങളിലും വാര്‍ത്ത നല്‍കി. ഒടുവില്‍ ഭാഗ്യവാനെ കണ്ടെത്തി. അയാളുടെ ഓഫിസില്‍ നേരിട്ടെത്തിയാണ് അധികൃതര്‍ വിവരം അറിയിച്ചത്.

പാലക്കാട് സ്വദേശി, കടവന്ത്രയില്‍ താമസിക്കുന്ന കെ.എസ്. ഷോജിതും സഹപ്രവര്‍ത്തകരായ 10 പേരും കൂടി ചേര്‍ന്നെടുത്ത ടിക്കറ്റിനാണ് ഒന്നാം സമ്മാനം അടിച്ചത്. ഷോജിത്തിന്റെ ഓഫിസില്‍ നേരിട്ടെത്തി അഭിനന്ദനം അറിയിച്ച അധികൃതര്‍ ഈ വിഡിയോ സമൂഹമാധ്യമങ്ങളില്‍ പങ്കുവച്ചിട്ടുണ്ട്.

ഏഴു വര്‍ഷമായി ഷാര്‍ജ വൈറ്റ് അലൂമിനിയം കമ്പനിയില്‍ സെയില്‍സ്മാനായ ഷോജിത് കമ്പനി ഉദ്യോഗസ്ഥരോടൊപ്പം ഔദ്യോഗിക ആവശ്യത്തിന് ഇറ്റലിയില്‍ ആയിരുന്നതിനാലാണു സമ്മാനവിവരം അറിയാതിരുന്നത്. ബിഗ് ടിക്കറ്റ് അധികൃതര്‍ പലവട്ടം വിളിച്ചിട്ടും മറുപടിയില്ലാത്തതിനെ തുടര്‍ന്ന് മാധ്യമങ്ങളില്‍ വാര്‍ത്ത നല്‍കിയിരുന്നു.