ഗര്‍ഭകാലം തന്റെയുള്ളില്‍ ഒരു കുഞ്ഞ് വളര്‍ന്നുകൊണ്ടിരിക്കുന്നു എന്ന അറിവ് അത്യാനന്ദവും ഉന്മേഷവും ഒരു സ്ത്രീയില്‍ ഉളവാക്കുന്ന കാലമാണ്. എന്നാല്‍ അമേരിക്കയില്‍ നിന്ന് പുറത്തുവന്ന ഒരു പ്രസവ വാര്‍ത്ത അങ്ങേയറ്റം കൗതുകം ജനിപ്പിക്കുന്നതാണ്.

ഡാനറ്റ് ഗ്ലിസ് എന്ന യുവതിയാണ് സംഭവകഥയിലെ നായിക. പെട്ടെന്ന് ഒരു ദിവസം ഡാനറ്റിന് കലശലായ വയറുവേദന. കട്ടിലില്‍ കിടന്നു നിലവിളിച്ച ഡാനറ്റിനെ ഭര്‍ത്താവ് ഓസ്റ്റിന്‍ ആശുപത്രിയിലെത്തിച്ചു. മൂത്രത്തില്‍ കല്ലാണെന്ന് ഉറപ്പിച്ചാണ് ഡാനറ്റ് ആശുപത്രിയിലെത്തിയത്.പക്ഷെ അപ്രതീക്ഷിത സംഭവങ്ങളാണ് പിന്നീട് നടന്നത്.

യുവതിയെ പരിശോധിച്ച ഡോക്ടര്‍ ആശ്ചര്യത്തോടെ പറഞ്ഞു, ഡാനറ്റ് 34 ആഴ്ച ഗര്‍ഭിണിയാണ്! ഡോക്ടറുടെ വാക്കുകേട്ട് ഡാനറ്റും ഞെട്ടി. ഗര്‍ഭകാലത്ത് സാധാരണ സ്ത്രീകള്‍ക്കുണ്ടാകുന്ന യാതൊരു ബുദ്ധിമുട്ടും ഡാനറ്റിനുണ്ടായിരുന്നില്ലത്രേ. വൈകാതെ ഡോക്ടര്‍മാര്‍ സിസേറിയന്‍ നടത്തി.

ഒന്നും രണ്ടുമല്ല മൂന്നു കുഞ്ഞുങ്ങളാണ് ഡാനറ്റിന്റെ വയറ്റിലുണ്ടായിരുന്നത്. രണ്ടു കുഞ്ഞുങ്ങളേ ഉള്ളുവെന്നാണ് ആദ്യം ഡോക്ടര്‍മാര്‍ കരുതിയത്. നാലു മിനിറ്റിന്റെ വ്യത്യാസത്തിലാണ് കുഞ്ഞുങ്ങള്‍ ജനിച്ചത്. രണ്ട് ആണ്‍കുഞ്ഞും ഒരു പെണ്‍കുഞ്ഞുമാണ് ഡാനറ്റിന് ജനിച്ചത്. ബ്ലേസ്, ജിപ്‌സി, നിക്കി എന്നിങ്ങനെയാണ് ദമ്പതികള്‍ കുഞ്ഞുങ്ങള്‍ക്ക് നല്‍കിയിരിക്കുന്ന പേരുകള്‍.

നാലു പൗണ്ട് (ഏകദേശം 1.8 കിലോഗ്രാം) ഭാരം ഓരോ കുഞ്ഞിനുമുണ്ടായിരുന്നു. അപ്രതീക്ഷിതമായി അച്ഛനും അമ്മയുമായതിന്റെ ത്രില്ലിലാണ് ഡാനറ്റും ഓസ്റ്റിനും.