സ്‌പെയിനിലെ പ്രശസ്തമായ എല്‍ ഗോര്‍ഡോ ക്രിസ്മസ് ബംപര്‍ ലോട്ടറിയുടെ നറുക്കെടുപ്പ് ലൈവായി റിപ്പോര്‍ട്ട് ചെയ്യുന്നതിനിടെ ഭാഗ്യശാലികളുടെ കൂട്ടത്തില്‍ തന്റെ പേരും ഉണ്ടെന്ന് കണ്ട് റിപ്പോര്‍ട്ടര്‍ തുള്ളിച്ചാടി. ആര്‍ടിവിഇ ചാനലിലെ റിപ്പോര്‍ട്ടറായ നതാലിയ എസ്‌ക്യുഡെറോയ്ക്കാണ് ലോട്ടറിയടിച്ചത്.

40 ലക്ഷം യൂറോ കിട്ടിയ വിജയികളുടെ പേരുകള്‍ വായിക്കുന്നതിനിടെയാണ് കൂട്ടത്തില്‍ നതാലിയ സ്വന്തം പേരു കണ്ടത്. ആദ്യമൊന്ന് ഞെട്ടിയ അവര്‍ പിന്നെ തുള്ളിച്ചാടി. ആഘോഷത്തിനിടെ തത്സമയം തന്റെ രാജിയും പ്രഖ്യാപിച്ചു.

എന്നാല്‍ ആവേശമടങ്ങിയപ്പോള്‍ ഒന്നുകൂടി നോക്കിയപ്പോഴാണ് സംഗതിയുടെ കിടപ്പുവശം മനസിലായത്. സമ്മാനം മറ്റു വിജയികളുമായി പങ്കിടേണ്ടതായിരുന്നു. അതായത്, 40 ലക്ഷം യൂറോയില്‍ വെറും നാലായിരം യൂറോ മാത്രമെ നതാലിയയ്ക്കു ലഭിക്കൂ.

ഇതോടെ നതാലിയ ട്വിറ്ററില്‍ ഖേദപ്രകടനവുമായി എത്തി. കുറച്ചുനാളുകളായി ചില സ്വകാര്യ വിഷമങ്ങളിലായിരുന്നുവെന്നും പെട്ടെന്ന് ഭാഗ്യം വന്നപ്പോള്‍ പരിസരം മറന്നുപോയെന്നുമാണ് നതാലിയയുടെ വിശദീകരണം.