മുത്തച്ഛന്റെ ക്രിസ്മസ് സമ്മാനം എന്നൊക്കെ പറഞ്ഞാല് ഇങ്ങനിരിക്കണം! തന്റെ പത്തു പേരക്കുട്ടികള്ക്ക് സമ്മാനമായി നല്കിയത് സ്കൂള് ബസ്!
അമേരിക്കയിലെ ഓറിഗണില് ഒരു മുത്തച്ഛന് വേറിട്ടൊരു സമ്മാനം നല്കി തന്റെ പത്തു പേരക്കുട്ടികളെ അത്ഭുതപ്പെടുത്തി. ഡഗ് ഹെയ്സ് എന്ന മുത്തച്ഛന് തന്റെ പേരക്കുട്ടികള്ക്ക് സമ്മാനമായി നല്കിയത് ഒരു സ്കൂള് ബസാണ്.
ഈ വര്ഷം സ്കൂള് ആരംഭിച്ചതു മുതല് കുട്ടികള് നേരിടുന്ന യാത്രാ ദുരിതങ്ങള് കണ്ടതിനെ തുടര്ന്ന് അതിന് അറുതി വരുത്തണമെന്ന തോന്നലുണ്ടായതാണ് ബസ് വാങ്ങിക്കാന് ഇടയാക്കിയതെന്ന് മുത്തച്ഛന് ഹെയ്സ് പറഞ്ഞു. തന്നെയുമല്ല, അവര്ക്ക് ജീവിതകാലം മുഴുവന് ഓര്മ്മിക്കാവുന്ന ഒന്നാവണം സമ്മാനം എന്നും തോന്നി.
ഹെയ്സിന്റെ കൊച്ചുമക്കളില് അഞ്ചുപേര്ക്ക് ഇതുവരെ സ്കൂളില് ചേരാന് പ്രായമായില്ലെങ്കിലും മറ്റു അഞ്ചു പേരും ഗ്ലാഡ്സ്റ്റോണിലെ പെഡിയ ക്ലാസിക്കല് ക്രിസ്ത്യന് സ്കൂളിലെ വിദ്യാര്ഥികളാണ്. ഈ അര്ദ്ധദിന-സ്കൂള് കിന്റര്ഗാര്ടന് മുതല് പ്ലസ്ടു വരെയുള്ള വിദ്യാര്ഥികള്ക്ക് പ്രത്യേകമായ ഒരു പാഠ്യപദ്ധതിയാണ് നല്കുന്നത്. അവര് അവിടെ ചെലവഴിക്കുന്ന നാലു മണിക്കൂറുകള്ക്ക് പുറമേ വീട്ടില് സ്വയം ചെയ്യാവുന്ന പഠന സമ്പ്രദായമാണ് സ്കൂള് നല്കിയിരിക്കുന്നത്.
തന്റെ വീട്ടില് നിന്ന് സ്കൂള് മൂന്നു മൈല് അകലെയാണെങ്കിലും, എല്ലാ കുട്ടികളും 20 മിനിറ്റ് ഡ്രൈവിനുള്ളിലാണ് താമസിക്കുന്നതെന്നും, അതിനാല് രാവിലെ കുട്ടികളെ പിക്ക്അപ് ചെയ്യാനും തിരിച്ചു വീട്ടിലേക്ക് കൊണ്ടുവരാനുമുള്ള റൂട്ട് തയ്യാറാക്കുന്നത് എളുപ്പമായിരിക്കുമെന്നും അദ്ദേഹം സിഎന്എന്നിനോട് പറഞ്ഞു.
ക്രിസ്മസിന് ഏതാനും ദിവസങ്ങള്ക്ക് മമ്പാണ് 'ഗ്രാന്ഡ് ഫാദര് എക്സ്പ്രസ്' എന്ന് പേരിട്ടിരിക്കുന്ന ബസ് ഹെയ്സ് കുട്ടികള്ക്ക് സമ്മാനമായി നല്കിയതെന്ന് കെജിഡബ്ല്യു ചാനല് റിപ്പോര്ട്ട് ചെയ്തു. ജനുവരിയില് സ്കൂള് തുറക്കുമ്പോള് കുട്ടികള് 'ഗ്രാന്ഡ് ഫാദര് എക്സ്പ്രസില്' യാത്ര ചെയ്യാന് ആവേശത്തോടെ കാത്തിരിക്കുകയാണെന്ന് റിപ്പോര്ട്ട് തുടര്ന്ന് പറയുന്നു.
ഈ വര്ഷം ആദ്യം ഭാര്യയുമായി നടത്തിയ സംഭാഷണത്തില് നിന്നാണ് ബസ് വാങ്ങാനുള്ള ആശയം വന്നതെന്ന് ഹെയ്സ് സിഎന്എന്നിനോട് പറഞ്ഞു. തന്റെ ലക്ഷ്യങ്ങളെക്കുറിച്ച് ചോദിച്ചപ്പോള്, തന്റെ കൊച്ചുമക്കളോടൊപ്പം കൂടുതല് സമയം ചെലവഴിക്കാന് ഒരു വഴി കണ്ടെത്തണമെന്ന് അദ്ദേഹം പറഞ്ഞു. അങ്ങനെ, എല്ലാ ദിവസവും രാവിലെ അവരെ സ്കൂളിലേക്ക് കൊണ്ടുപോകുക എന്ന ആശയമാണ് പരിഹാരമായി ഉയര്ന്നുവന്നത്.
അടുത്ത വര്ഷം രണ്ടു കുട്ടികള് കൂടി സ്കൂളില് ചേരും. അപ്പോള് മൊത്തം യാത്രക്കാരുടെ (കുട്ടികളുടെ) എണ്ണം ഏഴാകും. ക്രമേണ, കൊച്ചുമക്കളില് പത്തുപേരേയും എല്ലാ ദിവസവും 'മുത്തച്ഛന് എക്സ്പ്രസില്' സ്കൂളിലേക്ക് കൊണ്ടുപോകും.
പേരക്കുട്ടികളുമായി ഏറെ അടുക്കാനും അവരുമായി കൂടുതല് സമയം ചെലവഴിക്കാനും ഒരു വഴി കണ്ടെത്തിയ സന്തോഷത്തിലാണ് ഡഗ് ഹെയ്സ്.
https://www.facebook.com/Malayalivartha
