ഡെലിവറി ബോയി താരമായത് അപ്രതീക്ഷിത ചിത്രരചനയിലൂടെ!
ഓണ്ലൈന് ഭക്ഷണവിതരണ കമ്പനികളിലെ ഡെലിവറി ബോയ്കള് ഇന്ന് നഗരങ്ങളിലെ സാധാരണ കാഴ്ചയാണ്. ഭക്ഷണവിതരണം നടത്തുന്നവരില് നല്ലൊരു ശതമാനവും ഇത് പാര്ട്ട്ടൈം ജോലിയായി ചെയ്യുന്നവരാണ്. ഇത്തരത്തിലൊരു ഡെലിവറി ബോയിയാണ് ഇപ്പോള് സോഷ്യല് മീഡിയയിലെ താരം.
വിശാല് സംജിസ്കര് ഓണ്ലൈന് ഭക്ഷണവിതരണ കമ്പനിയായ സ്വിഗ്ഗിയുടെ മുംബൈ നഗരത്തിലെ ഡെലിവറി ബോയിയാണ് . കഴിഞ്ഞ ദിവസം നിഖില് ജോര്ജ് എന്നയാള് ഓര്ഡര് ചെയ്ത ഭക്ഷണം നല്കാനായി എത്തിയത് വിശാലിന്റെ ജീവിതം മാറ്റിമറിച്ചു.
ഭക്ഷണം നല്കുന്നതിനിടെ നിഖിലിനോട് വിശാല് ഒരു ചോദ്യം ചോദിച്ചു. താനൊരു ആര്ട്ടിസ്റ്റാണെന്നും പെയിന്റിംഗ് നടത്താനുണ്ടോയെന്നുമായിരുന്നു വിശാലിന്റെ ചോദ്യം. ഏതായാലും ഒരു പരീക്ഷണം നടത്താന് നിഖില് തയാറായി. പിന്നെ കണ്ടത് വിശാലിന്റെ അദ്ഭുതപ്പെടുത്തുന്ന പ്രകടനമാണ്.
വിശാല് പെയിന്റിംഗ് നടത്തുന്നതിന്റെ ചിത്രം നിഖില് ട്വിറ്ററില് പങ്കുവച്ചതോടെ മണിക്കൂറുകള്കം ആയിരക്കണക്കിന് ലൈക്കുകളും ഷെയറുകളുമാണ് ചിത്രത്തിന് ലഭിച്ചത്. നിരവധി ആളുകളാണ് വിശാലിന് ജോലി വാഗ്ദാനം ചെയ്തിരിക്കുന്നത്. പശ്ചിമ ബംഗാള്, മഹാരാഷ്ട്ര സര്ക്കാരുകളും സഹായം വാഗ്ദാനം ചെയ്തിട്ടുണ്ട്. വിശാലിന്റെ പെയിന്റിംഗുകളുടെ എക്സിബിഷന് നടത്താന് തയാറായി ലഖ്നൗവിലെ ഒരു വ്യാപാരിയും രംഗത്ത് എത്തിയിട്ടുണ്ട്.
മുംബൈയിലെ എവറസ്റ്റ് അഡ്വര്ടൈസിംഗ് എന്ന കമ്പനിയിലെ ജീവനക്കാരനാണ് വിശാല്. മുംബൈയിലെ ജീവിത ചെലവുകള് വര്ധിച്ചതോടെ കഴിഞ്ഞ വര്ഷമാണ് പാര്ട്ട്ടൈം ഡെലിവറി ബോയിയായി ജോലി ചെയ്യാന് തുടങ്ങിയത്. രാത്രി ഏഴോടെ തുടങ്ങുന്ന ഭക്ഷണ വിതരണ ജോലി അര്ധരാത്രി വരെ തുടരും. പുതിയ സംഭവവികാസങ്ങളുടെ പശ്ചാത്തലത്തില് ജീവിതം കൂടുതല് മെച്ചമാകുമെന്ന പ്രതീക്ഷയിലാണ് വിശാല്. ട്വിറ്ററിലെ പോസ്റ്റ് ഇത്രയും വൈറലാകുമെന്ന് പ്രതീക്ഷിച്ചില്ലെന്ന് വിശാല് മാധ്യമങ്ങളോട് പറഞ്ഞു.
https://www.facebook.com/Malayalivartha
