ചൈനക്കാരുടെ പേരിലാണ് ലോകത്തുണ്ടാക്കിയ ഏറ്റവും വലിയ കേക്കിന്റെ ലോക റെക്കോര്‍ഡ്. 3.18 കിലോമീറ്റര്‍ നീളത്തിലുള്ള കേക്കുണ്ടാക്കി നേടിയതാണ് ആ റിക്കോര്‍ഡ്. 

ചൈനക്കാരുടെ പേരിലുള്ള ആ റെക്കോര്‍ഡ് തൃശൂരങ്ങ് എടുത്തു! ഇരട്ടി നീളമുള്ള കേക്കാണ് തൃശ്ശൂരുകാര്‍ ഉണ്ടാക്കിയത്. 6.5 കിലോമീറ്റര്‍ വരും തൃശൂരിലെ കേക്കിന്റെ നീളം. ആയിരത്തിലേറെ വരുന്ന ഷെഫുമാരുടെ സംഘമാണ് ഇത് ഉണ്ടാക്കിയത്. 60 ലക്ഷം രൂപയാണ് ചെലവ്.

നാലു മണിക്കൂറെടുത്ത് പൂര്‍ത്തിയാക്കിയ കേക്കിന്റെ തൂക്കം ഇരുപതു ടണ്‍ വരും. ചോക്ലേറ്റു കേക്കാണ് നിര്‍മിച്ചത്. സംസ്ഥാനത്തെ ബേക്കറി ഉടമകളുടെ സംഘടനയായ ബേക്കേഴ്‌സ് അസോസിയേഷനാണ് കൂറ്റന്‍ കേക്ക് നിര്‍മിച്ചത്.

തൃശൂരില്‍ കഴിഞ്ഞ ഒരുമാസമായി നടക്കുന്ന രാത്രികാല ഷോപ്പിങ് ഫെസ്റ്റിവലിന്റെ സമാപനം കുറിച്ചായിരുന്നു കൂറ്റന്‍ കേക്ക് നിര്‍മാണം. തൃശൂര്‍ രാമനിലയം ഗസ്റ്റ് ഹൗസിന് മുമ്പില്‍ നിന്ന് കേക്ക് നിര്‍മാണം തുടങ്ങി. റീജനല്‍ തിയറ്റര്‍, സംഗീത നാടക അക്കാദമി, ലളിതകലാ അക്കാദമി, ജവഹര്‍ബാലഭവന്‍, കെ.എസ്.എഫ്.ഇ ആസ്ഥാന മന്ദിരം എന്നിവയ്ക്കു മുമ്പിലൂടെ എത്തി രാമനിലയം ഗസ്റ്റ് ഹൗസിന് മുമ്പില്‍ അവസാനിച്ചു. ഇങ്ങനെ, ഏഴു റൗണ്ടായാണ് കേക്കുണ്ടാക്കിയത്.

വമ്പന്‍ കേക്ക് നിര്‍മാണം നേരില്‍ കാണാന്‍ ആളുകള്‍ പ്രവഹിച്ചതോടെ നഗരത്തില്‍ തിരക്കായി. കേക്കിനു സമീപത്തു നിന്ന് സെല്‍ഫിയെടുക്കാന്‍ ആളുകള്‍ മല്‍സരിച്ചു.