പട്ടാളത്തൊപ്പി കണ്ടപ്പോള് വീടിന്റെ ഭിത്തിയില് മാപ്പെഴുതി മോഷ്ടാവ് സ്ഥലംവിട്ടു!
തൃപ്പൂണിത്തുറയ്ക്കു സമീപം തിരുവാങ്കുളത്തെ പാലത്തിങ്കല് ഐസക് മാണിയുടെ വീട്ടില് മോഷ്ടിക്കാനായി പൂട്ടുപൊളിച്ചു വീടിനുള്ളില് കയറിയപ്പോഴാണു പട്ടാളക്കാരന്റെ വീടാണ് അതെന്നു കള്ളന് അറിഞ്ഞത്. അതോടെ കള്ളന്റെ ഉള്ളിലെ രാജ്യസ്നേഹി ഉണര്ന്നു. വീട്ടില്നിന്ന് ഒന്നുമെടുത്തില്ലെന്നു മാത്രമല്ല, ഭിത്തിയില് മാപ്പും എഴുതിവച്ചു. നല്ല കള്ളന് അവിടംകൊണ്ടും നിര്ത്തിയില്ല. വീടിനു സമീപത്തെ ടയര് കടയില്നിന്നു മോഷ്ടിച്ച ബാഗും രേഖകളും തിരികെ ഏല്പിക്കാന് വീട്ടില് വയ്ക്കുകയുംചെയ്തു.
പക്ഷേ വീട്ടില്നിന്നിറങ്ങും മുമ്പ് ചെറിയൊരു പ്രലോഭനം കള്ളനെ കീഴടക്കി. സൈനികന്റെ മദ്യക്വാട്ടയില്നിന്നു രണ്ടു പെഗ് അടിച്ചശേഷമാണ് ആള് സ്ഥലംവിട്ടത്. സൈന്യത്തില്നിന്നു വിരമിച്ചയാളാണ് ഐസക്. കള്ളന് കയറിയപ്പോള് വീട്ടിലാരും ഉണ്ടായിരുന്നില്ല. വാതിലിന്റെ പൂട്ടുപൊളിച്ച് ഉള്ളില് കടന്ന മോഷ്ടാവ് ആസ്ബറ്റോസ് മേല്ക്കൂര വരെ പൊളിച്ചു സകലയിടത്തും അരിച്ചുപെറുക്കി.
ഇതിനിടെ വീട്ടിലുണ്ടായിരുന്ന സൈനികതൊപ്പി കണ്ട്, കയറിയ വീട് പട്ടാളക്കാരന്റേതാണെന്നു കള്ളന് മനസിലാക്കുകയായിരുന്നു. ഭിത്തിയില് മാപ്പ് എഴുതിവച്ച കള്ളന് ഒരു പട്ടാളക്കാരന്റെ വീടാണെന്നു തൊപ്പി കണ്ട് അവസാനനിമിഷമാണ് മനസിലായതെന്നും ക്ഷമിക്കണമെന്നും കുറിച്ചു.
സമീപത്തെ നാലു കടകളില് ഇയാള് മോഷണം നടത്തിയതിനു ശേഷമാണ് ഇവിടെ കയറിയത്. ഇതില് ടയര് കടയില്നിന്നു കവര്ന്ന ബാഗും രേഖകളും സൈനികന്റെ വീട്ടില് വച്ചാണു കള്ളന് മടങ്ങിയത്. എന്നാല് മറ്റു കടകളില്നിന്നു കവര്ന്ന 10,000 രൂപയോളം കള്ളന് കൊണ്ടുപോയി. തൃപ്പൂണിത്തുറ പോലീസ് സ്ഥലത്തെത്തി പരിശോധന നടത്തി.
https://www.facebook.com/Malayalivartha