അയ്യപ്പന് കത്തുകള്‍ എത്തിതുടങ്ങി; സന്നിധാനത്ത് മണ്ഡലകാലം തുടങ്ങുന്നതോടെ അയ്യപ്പന്റെ നാമധേയത്തിലുള്ള പോസ്റ്റ് ഓഫിസും പ്രവര്‍ത്തനം തുടങ്ങും. മകരവിളക്കും പടിപൂജയും കഴിഞ്ഞ് എല്ലാവരും മലയിറങ്ങുന്നതോടെ പോസ്റ്റ് ഓഫിസ് പൂട്ടി പോസ്റ്റ് മാസ്റ്ററും ജീവനക്കാരും മലയിറങ്ങും.

33 വര്‍ഷമായുള്ള പതിവാണിത്. ഇത്തവണ പോസ്റ്റ് മാസ്റ്ററുടെ പേരും അയ്യപ്പന്‍ എന്നാണെന്ന പ്രത്യേകതയുമുണ്ട്. വ്യാഴം, വെള്ളി ദിവസങ്ങളിലായി അമ്പതിലേറെ കത്തുകളാണ് സന്നിധാനത്തെ പോസ്റ്റ് ഓഫിസില്‍ എത്തിയത്.

വിവാഹ ക്ഷണക്കത്ത്, വീട് പാലുകാച്ചലിന്റെ അറിയിപ്പ് തുടങ്ങിയ ചടങ്ങുകളുടെ കത്തുകള്‍ ആദ്യം സന്നിധാനത്തേക്ക് അയക്കുന്നവരുമുണ്ട്. വഴിപാട്, നിയമന ഉത്തരവിന്റെ പകര്‍പ്പ് തുടങ്ങിയവയും വരും. ഇവ കൃത്യമായി ശേഖരിച്ച് കത്തുകള്‍ നടയില്‍ വെക്കും. സീസണല്ലാത്തപ്പോള്‍ പമ്പയില്‍ സ്വീകരിച്ച് അയ്യപ്പെന്റ സീല്‍ പതിപ്പിച്ച് എത്തിക്കും.

മുമ്പ് വണ്ടിപ്പെരിയാര്‍ പോസ്റ്റ് ഓഫിസിലായിരുന്നു കത്തുകള്‍ വന്നിരുന്നത്. അവിടെനിന്ന് കാല്‍നടയായി കാനനപാതയിലൂടെ ഇവിടെ എത്തിക്കുകയായിരുന്നു. ശബരിമലയിലെ പതിനെട്ടാംപടിയുടെ മുദ്രയുള്ള കത്തുകളാണ് എന്നതാണ് ഇവിടത്തെ പ്രത്യേകത. രാജ്യത്ത് മറ്റെവിടെയും ഇത്തരത്തില്‍ ഒരു മുദ്രയില്ല.

മേല്‍ശാന്തിയുടെ ഫോേട്ടാ പതിച്ച സ്റ്റാംപ് നല്‍കിയായിരുന്നു ഉദ്ഘാടനം. 200 രൂപ അടച്ചാല്‍ ആര്‍ക്കും അവരുടെ ഫോട്ടോ പതിച്ച സ്റ്റാമപ് ലഭിക്കും എന്നതാണ് ഇതിന്റെ പ്രത്യേകത.