ശത്രുവിനെ പരാജയപ്പെടുത്തിയാല്‍ മനുഷ്യനായാലും മൃഗമായാലും സന്തോഷം തോന്നുന്നതും ആഹ്ലാദം പ്രകടിപ്പിക്കുന്നതും സ്വാഭാവികമാണ്. എന്നാല്‍ തീരെ ചെറിയ ജീവികളില്‍ ഇത്തരം സന്തോഷ പ്രകടനങ്ങള്‍ ഇതുവരെ ശാസ്ത്രലോകം കണ്ടെത്തിയിട്ടില്ലായിരുന്നു. എന്നാല്‍ ഇപ്പോള്‍ ശത്രുവിനെ പരാജയപ്പെടുത്തിയിട്ട് നൃത്തം ചവിട്ടുന്ന ഒരു ഞണ്ടിനെ കണ്ടെത്തിയിരിക്കുകയാണ് ശാസ്ത്രലോകം. മാന്‍ഗ്രോവ് ക്രാബ് അഥവാ കണ്ടല്‍ ഞണ്ട് എന്ന ഇനത്തില്‍ പെട്ട ഞണ്ടുകളിലാണ് രസകരമായ ഈ കാര്യം ഗവേഷകര്‍ കണ്ടെത്തിയത്.

ഇണയ്ക്കു വേണ്ടി നടത്തിയ പോരാട്ടത്തിലാണ് ഒരു ഞണ്ടിനെ മറ്റൊരു ഞണ്ട് പരാജയപ്പെടുത്തിയതും മാളത്തില്‍ നിന്നുതുരത്തിയതും. മാളത്തില്‍ നിന്ന് എതിരാളിയെ തുരത്തി വിജയിയായ ഞണ്ട് ആദ്യം പുറത്തെത്തി.പിന്നീട് എതിരാളി ദൂരേയ്ക്കു ഭയന്നോടിയതോടെയാണ് ഹീറോ ഞണ്ട് വിജയത്തിന്റെ ചിഹ്നമായി ചില സ്‌റ്റെപ്പുകളിട്ടത്. ഇതിന് എതിരാളികളെ പോരിനു വിളിക്കുന്ന ഗൊറില്ലകളുടെ നെഞ്ചത്തടിച്ചുള്ള നൃത്തത്തിനോട് ഏറെ സാമ്യവുമുണ്ടായിരുന്നു.

ഞണ്ടുകളുടെ കാര്യത്തില്‍ ഗൊറില്ലകളില്‍ നിന്നു വ്യത്യസ്തമായി കാലുകള്‍ കൂടി ഈ നൃത്തത്തില്‍ പങ്കെടുക്കുന്നുണ്ടെന്നു മാത്രം. കാലുകളില്‍ ഇരുന്ന്് ഉയരുന്നതിനൊപ്പം കൈകളും ഉയര്‍ത്തിയാണ് ഞണ്ട് ആഹ്ലാദം പ്രകടിപ്പിക്കുന്നത്. ശത്രുവിനെ തുരത്തുന്നതില്‍ വിജയിച്ച ശേഷം മാന്‍ഗ്രൂവ് ക്രാബ് ഇനത്തില്‍ പെട്ട എല്ലാ ഞണ്ടുകളും ഇത്തരത്തില്‍ നൃത്തം ചവിട്ടാറുണ്ടെന്നും ഗവേഷകര്‍ കണ്ടെത്തി. ഗവേഷകര്‍ നിരീക്ഷിച്ച 16 ഞണ്ടുകളില്‍ 14 എണ്ണവും ഇങ്ങനെ നൃത്തം ചെയ്യുന്നതായി ഗവേഷകര്‍ കണ്ടെത്തിയിരുന്നു.

ആണ്‍ഞണ്ടുകള്‍ മാത്രമാണ് ഇങ്ങനെ നൃത്തം ചവിട്ടുക. ഒരു ഞണ്ട് തന്നെ പല തവണ നൃത്തം ചവിട്ടുന്നതായും ഗവേഷകര്‍ ശ്രദ്ധിച്ചു. പല സന്ദര്‍ഭങ്ങളിലായി 77 തവണയാണ് ഞണ്ടുകള്‍ സമാനമായ രീതിയില്‍ നൃത്തം ചവിട്ടുന്നതായി ഗവേഷകര്‍ നിരീക്ഷിച്ചത്.