മരണം തൊട്ടടുത്തെത്തിയിട്ടും അതില്‍ നിന്നും നെല്ലിടവ്യത്യാസത്തില്‍ രക്ഷപ്പെട്ട യുവാവിന്റെ വീഡിയോ ഇപ്പോള്‍ സോഷ്യല്‍ മീഡിയയില്‍ വൈറലാകുകയാണ്. ക്ഷണിക്കപ്പെടാതെ എവിടെയും ഏതുനേരത്തും കയറി ചെല്ലുന്ന രംഗബോധമില്ലാത്ത കോമാളിയാണ് മരണമെന്നാണ് പറയപ്പെടുന്നത്.

അനുവാദമില്ലാതെ കടന്നു വന്ന് ജീവനും കൊണ്ട് പറക്കുന്ന മരണത്തിന്റെ ദേവതയെ കബളിപ്പിച്ചവരും നിരവധിയാണ്. അത്തരത്തിലൊരു വാര്‍ത്തയാണ് ഉത്തര്‍പ്രദേശിലെ ഡിയോറിയ ജില്ലയില്‍ നിന്നും പുറത്തുവരുന്നത്.

ഡിയോറിയ ജില്ലയിലെ ബന്‍കത റെയില്‍വേ സ്‌റ്റേഷനില്‍ നവംബര്‍ 15-ന് നടന്ന സംഭവമാണ് ഇപ്പോള്‍ സോഷ്യല്‍ മീഡിയയില്‍ വൈറലായിരിക്കുന്നത്. ട്രെയിനില്‍ കയറാന്‍ ശ്രമിക്കുന്നതിനിടെ റെയില്‍വേ ട്രാക്കില്‍ ട്രെയിനിനടിയില്‍ പെട്ടുപോയ യുവാവിന്റെതാണ് വീഡിയോ. ട്രെയിന്‍ കയറാന്‍ ശ്രമിക്കുന്നതിനിടെ അബദ്ധത്തില്‍ അടുത്ത ട്രാക്കില്‍ കൂടി വരികയായിരുന്ന ചരക്കു തീവണ്ടിയുടെ മുന്നിലേക്ക് യുവാവ് വീഴുകയായിരുന്നു.

ട്രെയിന്‍ ഇപ്പോള്‍ തന്നെ ചതച്ചരച്ചുകൊണ്ടുപോകും എന്ന് കരുതി ഭയന്നുവിറച്ച യുവാവിന് എന്തെങ്കിലും ചെയ്യാന്‍ കഴിയുന്നതിന് മുമ്പു തന്നെ ട്രെയിന്‍ തൊട്ടടുത്ത് എത്തിയിരുന്നു. എന്നാല്‍ മനോധൈര്യം കൈവിടാതെ റെയില്‍വേ ട്രാക്കില്‍ തന്നെ യുവാവ് കമഴ്ന്നുകിടക്കുകയായിരുന്നു. മറ്റുള്ള യാത്രക്കാര്‍ പരിഭ്രമത്തോടെയാണ് രംഗം കണ്ടുനിന്നത്. എന്നാല്‍ ട്രെയിന്‍ കടന്ന് പോയതിന് ശേഷം കാര്യമായ പരിക്കുകളൊന്നും കൂടാതെ യുവാവ് എഴുന്നേറ്റ് പോകുന്നത് കണ്ട് അത്ഭുതത്തോടെയാണ് ചുറ്റുമുണ്ടായിരുന്ന യാത്രക്കാര്‍ നിന്നത്.

അതേസമയം ഇയാളുടെ പേരുവിവരങ്ങള്‍ ഇതുവരെ പുറത്തുവിട്ടിട്ടില്ല. കാഴ്ചക്കാര്‍ ആരോ പകര്‍ത്തിയ വീഡിയോ ആണ് ഇപ്പോള്‍ പ്രചരിക്കുന്നത്.