ഇന്ന് നടക്കുന്ന എന്തു കാര്യവും ഫെയ്‌സ്ബുക്കില്‍ ലൈവായിട്ട് കിട്ടാറുണ്ട്. ചിലസമയം ഈ ലൈവ് നമുക്ക് ദോഷത്തിനായും നല്ലതിനായും ഭവിക്കാറുണ്ട്. ഈയടുത്തിടെ ഫെയ്‌സ്ബുക്ക് ലൈവായി ആത്മഹത്യകള്‍ വരെ നടക്കുകയുണ്ടായി. ഈ ലൈവ് ചിലരെ രക്ഷിക്കാനും അതുപോലെ മോശമാക്കാനും ഇടയാക്കാറുണ്ട്. ഇവിടെയിതാ ഫെയ്‌സ്ബുക്ക് ലൈവ് ഒരു വീട്ടമ്മയുടെ ജീവന്‍ രക്ഷിച്ചിരിക്കുകയാണ്. ഫ്രാന്‍സിന്‍ സിംസ് ഗേയ്റ്റസാണ് ഫെയ്‌സ്ബുക്ക് ലൈവില്‍ വന്നത് മൂലം ജീവിതത്തിലേക്ക് മടങ്ങിയെത്തിയത്. തിങ്കളാഴ്ചയാണ് സംഭവം. ദിവസവും ഫെയ്‌സ്ബുക്കിലൂടെ പ്രാര്‍ത്ഥന നടത്തുന്ന യുവതിക്ക് സംഭവ ദിവസം നെഞ്ച് വേദന അനുഭവപ്പെടുകയായിരുന്നു.

ഉടന്‍ തന്നെ ഇവര്‍ വീഡിയോ കണ്ട് കൊണ്ടിരിക്കുന്നവരോട് തനിക്ക് വേണ്ടി പ്രാര്‍ത്ഥിക്കാന്‍ ആവശ്യപ്പെട്ടു. 'എനിക്ക് സഹായമൊന്നും വേണ്ട, പക്ഷെ എല്ലാവരും എനിക്ക് വേണ്ടി പ്രാര്‍ത്ഥിക്കണം' ഇതായിരുന്നു അവര്‍ പറഞ്ഞത്. എന്നാല്‍ പിന്നീട് യുവതി കൂടുതല്‍ അസ്വസ്ഥയാകുകയും ആരെയെങ്കിലും വിളിക്കൂ എന്ന പറയുകയുമായിരുന്നു. വീഡിയോ കണ്ട് കൊണ്ടിരുന്ന അയാല്‍വാസിയായ ഒരാള്‍ ഉടന്‍ തന്നെ ലീസിങ് ഓഫീസില്‍ വിവരമറിയിക്കുകയായിരുന്നു.

ഇവര്‍ ഫ്‌ലാറ്റിലെത്തി 911 എന്ന നമ്പറില്‍ വിളിക്കുകയും വേണ്ട സഹായങ്ങളുമായി പാരാമെഡിക്കല്‍ സംഘം പറന്നെത്തുകയുമായിരുന്നു. അതേസമയം ഇവരുടെ രക്ത സമ്മര്‍ദ്ദം അധികമായിരുന്നുവെന്ന് പരിശോധിച്ച ഡോക്ടര്‍ പറഞ്ഞു. രക്തം കട്ടപിടിച്ചിട്ടുണ്ടെന്നും സമയത്ത് ചികിത്സ നല്‍കാന്‍ കഴിഞ്ഞതിനാല്‍ തന്നെ രക്ഷപ്പെടുത്താന്‍ കഴിഞ്ഞെന്നും ഡോക്ടര്‍ വ്യക്തമാക്കി.