നന്ദി ദുബായ് പൊലീസ് ഒരായിരം നന്ദി; സഞ്ചാരിയുടെ മറന്നുവച്ച വാച്ച് തിരികെ നല്കാന് അവര് ബ്രിട്ടനില് എത്തി!
ദുബായ് പൊലീസിന്റെ നന്മയുടെ വാര്ത്തകള് മുന്പും നമ്മള് കേട്ടിട്ടുണ്ട്. ഒരു വിനോദ സഞ്ചാരി ഹോട്ടല് മുറിയില് മറന്നുവച്ച അവരുടെ വാച്ച് അവരുടെ നാടായ ബ്രിട്ടനില് നേരിട്ടുപോയി കൊടുത്ത പുതിയ വാര്ത്തയാണ് ഇപ്പോള് പുറത്തുവന്നിരിക്കുന്നത്. സംഭവം ഇങ്ങനെ: ദുബായ് യാത്രയ്ക്കിടെയാണ് ബ്രിട്ടീഷ് യുവതി 100,000 ദിര്ഹം വിലവരുന്ന റോളക്സ് വാച്ച് ഹോട്ടല് മുറിയില് മറന്നുവച്ചത്. റൂം ക്ലീനിങ്ങിന് എത്തിയ ജീവനക്കാര് ഇത് കാണുകയും പൊലീസില് ഏല്പ്പിക്കുകയുമായിരുന്നു.
റൂമില് താമസിച്ചിരുന്ന സ്ത്രീയെ പൊലീസ് ഫോണില് ബന്ധപ്പെട്ടു.അതറിഞ്ഞതോടെ നഷ്ടപ്പെട്ടുവെന്ന് കരുതിയ വാച്ച് തിരികെ ലഭിക്കുമെന്ന പ്രതീക്ഷയിലായി യുവതി. അടുത്ത തവണ ദുബായില് വരുമ്പോള് വാച്ച് നേരിട്ട് കൈപ്പറ്റാം എന്നായിരുന്നു യുവതിയുടെ മറുപടിയെന്ന് ദുബായ് പൊലീസ് ഉദ്യോഗസ്ഥന് കേണല് റാഷിദ് ബിന് സഫാന് പറഞ്ഞു. അടുത്തിടെയൊന്നും യുവതി ദുബായില് വരുന്നില്ലെന്ന് പിന്നീട് മനസിലാക്കിയ പൊലീസ്, വാച്ച് പാര്സല് അയച്ചു കൊടുക്കാം എന്ന തീരുമാനത്തില് എത്തി.
പക്ഷേ, എന്തെങ്കിലും കാരണവശാല് അത് നഷ്ടപ്പെട്ടുപോയാലോ എന്നു കരുതി പിന്മാറി. ഒന്പത് മാസത്തോളം പൊലീസ് ഫോളോഅപ് നടത്തി. യുവതി അടുത്തൊന്നും ദുബായില് എത്തില്ലെന്നായിരുന്നു ലഭിച്ചിരുന്ന മറുപടി. അതിനിടെയാണ്, ലണ്ടനില് ഒരു കോണ്ഫറന്സിന് ദുബായ് പൊലീസ് അധികൃതര്ക്ക് പോവേണ്ടിവന്നത്. ഈ യാത്രയില് യുവതിയുടെ വാച്ചുമായി പോകാമെന്നും അവരുടെ കയ്യില് നേരിട്ട് നല്കാമെന്നും ഒരു പൊലീസ് ഉദ്യോഗസ്ഥന് നിര്ദേശം വച്ചു.
ഇത് അംഗീകരിക്കപ്പെടുകയും ചെയ്തു. അങ്ങനെ റാഷിദിയ പൊലീസ് സ്റ്റേഷനിലെ ഡയറക്ടര്, ബ്രിഗേഡിയര് ജനറല് സയീദ് ഹമദ ബിന് സുലൈമാന് അല് മാലിക്ക് യുവതിയുടെ ബ്രിട്ടനിലെ വീട്ടില് നേരിട്ടു പോവുകയും മറന്നുവച്ച വാച്ച് തിരികെ നല്കുകയും ചെയ്തു. ദുബായ് പൊലീസിന്റെ വലിയ മനസിന് എങ്ങനെയാണ് നന്ദി പറയേണ്ടതെന്ന് അറിയില്ലെന്ന് യുവതി പ്രതികരിച്ചു.
https://www.facebook.com/Malayalivartha
