അമ്മയാകുന്നതിന്റെ സന്തോഷത്തിനൊപ്പം മറ്റൊരു അതിശയവാര്‍ത്ത കൂടി കിട്ടി ബെക്കിയ്ക്ക്. ഒറ്റ പ്രസവത്തില്‍ ജനിക്കാന്‍ കാത്തിരിക്കുന്നത്് മൂന്നു കുട്ടികളാണ്. ഡോക്ടര്‍മാര്‍ ആ വാര്‍ത്ത പറയുമ്പോള്‍ 23 വയസ്സുകാരി ബെക്കി ജോ അലന്റെ കണ്ണുകള്‍ സന്തോഷത്താല്‍ നിറഞ്ഞുപോയി. അത്ഭുതം ഒളിപ്പിക്കാനാവാതെ സ്തബ്ധയായി നിന്നു ഒരുനിമിഷം ബെക്കി.

അതിശയം അവിടെകൊണ്ടവസാനിച്ചില്ല. പ്രസവം കഴിഞ്ഞപ്പോള്‍ മറ്റൊരത്ഭുതം കൂടി കാത്തിരിപ്പുണ്ടായിരുന്നു.സാധാരണയായി കേള്‍ക്കാന്‍ ഇടയില്ലാത്ത അത്ഭുതം. മൂന്നു കുട്ടികളും അസാധാരണമായ രീതിയില്‍ സാദ്യശ്യമുള്ളവര്‍. ലക്ഷക്കണക്കിനു കുട്ടികള്‍ ജനിക്കുമ്പോള്‍പോലും സംഭവിക്കാത്ത അപൂര്‍വങ്ങളില്‍ അപൂര്‍വമായ സാദൃശ്യമാണിത്. കാരണം ഒരു ഭ്രൂണം ഒരു തവണ രണ്ടായി മുറിയുമ്പോഴാണ് സമാനഇരട്ടകളുണ്ടാകുന്നത്. എല്ലാ ഗര്‍ഭങ്ങളിലും അതു സംഭവിക്കുന്നില്ലെന്ന് നമുക്കറിയാമല്ലോ? അപ്രകാരം ഭ്രൂണം ഒരു തവണ മുറിയുന്നതുതന്നെ അപൂര്‍വ്വമാണെന്ന് മനസ്സിലാക്കാമല്ലോ? അപ്പോള്‍ സമാനമുഖമുള്ള മൂന്നുകുഞ്ഞുങ്ങള്‍ ഉണ്ടാകണമെങ്കില്‍ ഒരു ഭ്രൂണം രണ്ട് തവണ മുറിഞ്ഞ് മൂന്നു ഖണ്ഡങ്ങളാകണം.

ബെക്കി ജോ അലന്‍-ലിയാം ടേര്‍ണി ദമ്പതികള്‍ക്ക് ഒരു മകള്‍ കൂടിയുണ്ട്,ഇന്ത്യാന. രണ്ടു വര്‍ഷം മുമ്പ് ഇന്ത്യാനയോട് ദമ്പതികള്‍ ആ വലിയ വാര്‍ത്ത പങ്കുവച്ചു. ഇന്ത്യാന ഒരു വലിയ സഹോദരിയാകുന്ന വലിയ വാര്‍ത്ത. ഇംഗ്ലണ്ടില്‍ ലിവര്‍പൂളിനു തൊട്ടടുത്തു താമസിക്കുന്ന ബെക്കിയും ലിയാമും കൂടുതല്‍ കുട്ടികള്‍ക്കുവേണ്ടി ആഗ്രഹിച്ചിരുന്നു. പക്ഷേ ഒറ്റപ്രസവത്തില്‍ മൂന്നു കുട്ടികള്‍ എന്നത് അവരുടെ സ്വപ്നത്തിന് അപ്പുറമായിരുന്നു. അള്‍ട്രാ സൗണ്ട് സ്‌കാനിങ് റിപോര്‍ട്ട് കണ്ടപ്പോള്‍ മാത്രമാണ് അവര്‍ ആ വര്‍ത്ത മനസ്സിലാക്കിയതും വിശ്വസിച്ചതും.

ഗര്‍ഭത്തിന്റെ തുടക്കത്തില്‍തന്നെ അസ്വസ്ഥതകള്‍ അനുഭവിക്കേണ്ടിവന്നു ബെക്കിക്ക്. കൂടെക്കൂടെ വരുന്ന കടുത്ത തലവേദന. പതിവിലും നേരത്തെ സ്‌കാനിങ് നടത്താന്‍ നിര്‍ദേശിച്ചു ഡോക്ടര്‍മാര്‍. പരിശോധനയില്‍ ആ ഞെട്ടിക്കുന്ന വാര്‍ത്ത അവരെ കാത്തിരുന്നു: ജനിക്കാന്‍ തിടുക്കം കൂട്ടുന്ന മൂന്നു കുട്ടികളെക്കുറിച്ചുള്ള സന്തോഷവാര്‍ത്ത. ജീവിതത്തില്‍ ഞാന്‍ ഇതുപോലെ ഞെട്ടിയിട്ടില്ല.

ഞങ്ങളുടെ കുടുംബത്തില്‍ ഇതുവരെ മൂന്നുപേരെ ഒരുമിച്ചു പ്രസവിച്ച സംഭവവും ഉണ്ടായിട്ടില്ല. ഒരിക്കലും ചിന്തിച്ചിട്ടില്ലാത്ത ഒരു കാര്യം ഇപ്പോഴും അത്ഭുതത്തിന്റെ ചിറുകുകളിലാണ് അഭിമാനത്താല്‍ സന്തുഷ്ടയായ ബെക്കി ജോ.