എല്ലാ ഭാരവും ഇറക്കി വെച്ച് ശൂന്യാകാശത്തിലൂടെ സഞ്ചരിക്കാന്‍ ഒരവസരം ലഭിച്ചാല്‍ ആരാണ് വേണ്ടെന്ന് വയ്ക്കുന്നത്. അത്തരമൊരു അവസരം നല്‍കിയിരിക്കുകയാണ് ബെര്‍ലിനിലെ ഒരു ക്ലബ്. ലോകത്തിലെ മറ്റൊരു ക്ലബ്ബിനും അവകാശപ്പെടാന്‍ സാധിക്കാത്ത പുതുമയാണ് വേള്‍ഡ് ക്ലബ്ബ് ഡോം എന്ന നിശാ ക്ലബ് രംഗത്തെത്തിച്ചിരിക്കുന്നത്. വേള്‍ഡ് ക്ലബ്ബ് സീറോ ഗ്രാവിറ്റി ഡോം എന്ന പേരിലാണ് ഇവര്‍ ലോകത്തിന്റെ വിവിധ ഇടങ്ങളില്‍ നിന്ന് തെരഞ്ഞെടുത്തവര്‍ക്കായി നിശാ പാര്‍ട്ടി നടത്തിയത്. ശൂന്യാകാശം അല്ലെങ്കിലും ശൂന്യാകാശത്തെ പോലെ തന്നെ ഒഴുകി നടക്കാന്‍ ഈ പാര്‍ട്ടി അവസരം നല്‍കി. സീറോ ഗ്രാവിറ്റിയില്‍ ഒഴുകി നടന്ന് അവര്‍ ആടിത്തിമിര്‍ത്തു.

ഇവന്റ് കമ്പനിയായ ബിഗ് സിറ്റി ബീറ്റ്‌സ് യൂറോപ്യന്‍ സ്‌പേസ് ഏജന്‍സിയുമായി ചേര്‍ന്നാണ് ഇത്തരമൊരു വ്യത്യസ്ത പാര്‍ട്ടി സംഘടിപ്പിച്ചത്. ലോക പ്രസിദ്ധനായ ഡിജെ സ്റ്റീവ് അവോകിയെയും ഡബ്ല്യൂ ആന്‍ഡ് ഡബ്ല്യൂയെയും മറ്റ് 20 പേരെയും കൊണ്ടാണ് ജര്‍മ്മനിയിലെ അന്താരാഷ്ട്ര വിമാനത്താവളത്തില്‍ നിന്ന് ക്ലബ്ബ് സംഘം യാത്ര പുറപ്പെട്ടത്. 30000 അപേക്ഷകരില്‍ നിന്നാണ് 50 പേരെ തെരഞ്ഞെടുത്തത്.അമേരിക്ക, സ്‌പെയിന്‍ മൊറോക്കോ, ജര്‍മ്മനി, ഓസ്‌ട്രേലിയ എന്നിവിടങ്ങളില്‍ നിന്നുള്ളവരാണ് പാര്‍ട്ടിയില്‍ പങ്കുകൊള്ളാന്‍ ഭാഗ്യം നേടിയവര്‍. ഏകദേശം 90 മിനിറ്റ് നേരം ഇവര്‍ ബഹിരാകാശ യാത്രികരെപ്പോലെ ഒഴുകി നടന്നു.

നാല് മണിക്കൂര്‍ നീണ്ട പറക്കലില്‍ ശൂന്യാകാശ സമാനമായ അന്തരീക്ഷം സൃഷ്ടിച്ചാണ് അംഗങ്ങള്‍ക്ക് പ്രത്യേക പാര്‍ട്ടി ഒരുക്കിയത്. മുഴുവന്‍ പാര്‍ട്ടിയുടെയും വീഡിയോ ഫെയ്‌സ്ബുക്കില്‍ ലൈവായി കാണിച്ചിരുന്നു. 6000 ഡോളര്‍ മുടക്കി സീറോ ഗ്രാവിറ്റി പാര്‍ട്ടിയില്‍ ഇനിയും പങ്കുകൊള്ളാന്‍ ക്ലബ്ബ് അവസരം നല്‍കുന്നുണ്ട്.