മിക്കിയെ കുറിച്ച് കുറച്ചു കാലമായി ആളുകള്‍ മറന്നിരുന്ന ആ തമാശ വീണ്ടും ഇന്റര്‍നെറ്റിലെത്തി. ഡിസ്‌നി കഥാപാത്രങ്ങളില്‍ വച്ചേറ്റവും ജനപ്രിയമായ മിക്കി മൗസിനെ കുറിച്ചുള്ള ആ സംഗതി എന്താണെന്നോ?

മിക്കി മൗസിന് കഷണ്ടി ബാധിച്ചു കഴിഞ്ഞു എന്നു വിശ്വസിക്കാവുന്ന വിധത്തിലുള്ള ഒരു ഇമേജാണ് ഇപ്പോള്‍ പ്രചരിക്കുന്നത്. മിക്കി മൗസിന് കഷണ്ടി ബാധിച്ചിട്ട് വര്‍ഷങ്ങളായെന്നും നാട്ടുകാരെ വിദഗ്ദ്ധമായി കബളിപ്പിച്ച് വിലസുകയാണെന്നുമാണ് കുശുകുശപ്പ്! എടുത്തു മാറ്റാന്‍ കഴിയുന്ന തരത്തിലുള്ളതാണത്രേ മിക്കി മൗസ് ധരിക്കുന്ന എലിച്ചെവികള്‍. ആ ചെവികള്‍ ഉപയോഗിച്ചാണ് കഷണ്ടിയെ സമര്‍ത്ഥമായി മറയ്ക്കുന്നതത്രേ!

എടുത്തു മാറ്റാവുന്ന എലിച്ചെവികള്‍ കൈയ്യില്‍ ഊരിപ്പിടിച്ച്, കഷണ്ടിത്തല പുറത്തു കാട്ടി കൊണ്ട് മിക്കി നില്‍ക്കുന്നതായുള്ള ഒരു ഇമേജ് ഇന്റര്‍നെറ്റില്‍ പ്രചരിച്ചതോടെ അതേ കുറിച്ചുള്ള മെമെകളും ട്രോളുകളും ചര്‍ച്ചകളും കൊണ്ട് നിറഞ്ഞു ഇന്റര്‍നെറ്റ്. എന്നു മുതലാണ്, എപ്രകാരമാണ് കഷണ്ടി പിടിപെട്ടത് എന്നതിനൊക്കെ വിവിധ കാരണങ്ങളും ട്രോളര്‍മാര്‍ നിരത്തുന്നുമുണ്ട്.

യഥാര്‍ത്ഥത്തില്‍ മിക്കി മൗസിനെ കഷണ്ടിക്കാരനായാണോ ഡിസ്‌നി നിര്‍മ്മിച്ചത് എന്നതിന് യാതൊരു ഔദ്യോഗിക വിഷദീകരണവും ഇതുവരെ വന്നിട്ടില്ല. ഇനി അഥവാ അതു സത്യമാണെങ്കില്‍ അതിലും തമാശയ്ക്കു വകയുണ്ടെന്ന് കരുതിയാല്‍ മതി. അതു കൊണ്ട് മിക്കി മൗസ് ആരാധകര്‍ നെറ്റി ചുളിക്കേണ്ട, നിങ്ങളുടെ പ്രിയ കഥാപാത്രത്തിന് കഷണ്ടിയുള്ളതായി ഔദ്യോഗിക സ്ഥിരീകരണമായിട്ടില്ല!

സത്യം എന്തായാലും ഇന്റര്‍നെറ്റില്‍ ഇപ്പോള്‍ പ്രചരിച്ചു കൊണ്ടിരിക്കുന്ന ആ ചിത്രത്തെ കണ്ടില്ലെന്നു നടിക്കാനാവില്ല, എത്ര വലിയ മിക്കി ആരാധകനും!