ഗര്‍ഭിണിയായ യുവതി പൊതു ടോയ്‌ലെറ്റ് ഉപയോഗിക്കുന്നതിനിടെ കഠിനമായ വയറുവേദന ഉണ്ടായതിനെ തുടര്‍ന്ന് ടോയ്ലറ്റില്‍ നിന്ന് ഇറങ്ങിയ ഉടന്‍ ചെക്കപ്പിനായി പോയി. എന്നാല്‍ വയറുവേദന ഉണ്ടായത് തന്റെ കുഞ്ഞ് പുറത്തേക്ക് വരുന്നതു കൊണ്ടാണെന്ന് മനസിലാകാതിരുന്ന യുവതി കുഞ്ഞിന് ജന്മം നല്‍കിയത് ക്ലോസറ്റില്‍. കുഞ്ഞ് നേരെ സെപ്റ്റിക് ടാങ്കിലേക്ക് വീണു പോയി. ഇതൊന്നുമറിയാതെ യുവതി ചെക്കപ്പിനായി ഹോസ്പിറ്റലിലേക്ക് പോയെന്നാണ് ചൈനീസ് മാധ്യമങ്ങള്‍ റിപ്പോര്‍ട്ട് ചെയ്യുന്നത്.

ഇതിനിടയില്‍ അവിടെയുണ്ടായിരുന്ന ജോലിക്കാര്‍ സെപ്റ്റിക് ടാങ്കിനുള്ളില്‍ നിന്ന് കുഞ്ഞിന്റെ കരച്ചില്‍ കേട്ടപ്പോഴാണ് സംഭവം മനസിലായത്. ഉടന്‍ തന്നെ ഫയര്‍ഫോഴ്‌സിനെ വിവരം അറിയിച്ചു. അവരെത്തി സെപ്റ്റിക് ടാങ്ക് കുത്തിപ്പൊളിച്ച് കുഞ്ഞിനെ രക്ഷപെടുത്തി. കുഞ്ഞ് സെപ്റ്റിക് ടാങ്കില്‍ മുങ്ങിപ്പോയിരുന്നില്ല. അതിനാലാണ് ജീവന്‍ നഷ്ടപ്പെടാതിരുന്നതെന്ന് സുരക്ഷാ ഉദ്യോഗസ്ഥര്‍ പറഞ്ഞു.

കുഞ്ഞ് അമ്മയോടൊപ്പം ആശുപത്രിയില്‍ സുരക്ഷിതമായിരിക്കുന്നു. ഇരുപത് കാരിയായ യുവതിക്ക് കുഞ്ഞ് ജനിക്കാന്‍ പോവുകയാണെന്ന് മനസിലാകാതിരുന്നതിനാലാണ് അപകടമുണ്ടായതെന്ന് പൊലീസ് അറിയിച്ചു.