അന്റാര്‍ട്ടിക്കയില്‍ അപൂര്‍വ്വ പെന്‍ഗ്വിനുകളുടെ സൂപ്പര്‍ കോളനി കണ്ടെത്തിയിരിക്കുകയാണ് ഗവേഷകര്‍.പെന്‍ഗ്വിനുകള്‍ക്ക് വംശനാശം സംഭവിച്ചു കൊണ്ടിരിക്കുന്ന ഈ സമയത്ത് ഏറെ പ്രതീക്ഷ നല്‍കുന്ന വാര്‍ത്തയാണിത്.

ഇപ്പോള്‍ കണ്ടെത്തിയ പെന്‍ഗ്വിന്‍ കോളനിയില്‍ ഏഴു ലക്ഷത്തോളം പെന്‍ഗ്വിനുകളുണ്ടെന്നാണ് കണ്ടെത്തല്‍. ഈ മേഖലയില്‍ പഠനം നടത്തുന്ന യൂറോപ്യന്‍ ഗവേഷകരാണ് വംശനാശം നേരിടുന്നു എന്ന് കരുതപ്പെടുന്ന ആഡിലി പെന്‍ഗ്വിനുകളുടെ സംഘത്തെ കണ്ടെത്തിയത്.

മനുഷ്യരുടെ കടന്നുകയറ്റം താരതമ്യേന വളരെക്കുറവായ ഒരു ദ്വീപിലാണ് ഈ പെന്‍ഗ്വിനുകളുടെ കോളനി സ്ഥിതി ചെയ്യുന്നത്. പെന്‍ഗ്വിന്‍ കൂട്ടത്തിനു മുകളിലൂടെ ഡ്രോണ്‍ പറത്തിയാണ് ഗവേഷകര്‍ പഠനം നടത്തിയത്.

ആകെ 7,51,527 ജോടി പെന്‍ഗ്വിനുകളെ കണ്ടെത്താന്‍ അവര്‍ക്കു കഴിഞ്ഞു. മുന്‍പ് പതിനഞ്ച് ലക്ഷത്തോളമുണ്ടായിരുന്നു ഈ പെന്‍ഗ്വിന്‍ വിഭാഗം കാലവസ്ഥ വ്യതിയാനത്തെ തുടര്‍ന്ന് വംശനാശ ഭീഷണിയിലാണ്.