പൂച്ചയ്ക്ക് വച്ച കെണിയില്‍ വീണത് സിംഹം. യുണൈറ്റഡ് സ്‌റ്റേറ്റ്‌സിലെ യൂട്ടയിലാണ് സംഭവം. തണുപ്പുള്ള മലയോരമേഖലയാണ് യൂട്ട. പൂച്ചയെപിടിക്കാന്‍ കെണിയൊരുക്കിയപ്പോള്‍ സെക്യൂരിറ്റിഗാര്‍ഡ് ഒരിക്കലും കരുതിയില്ല, കുരുങ്ങുന്നത് സിംഹമായിരിക്കുമെന്ന്. അപ്രതീക്ഷിതമായി കിട്ടിയ ഇരയെ കണ്ട് സെക്യൂരിറ്റി ഭയന്നു.

കട്ടിരോമങ്ങളുള്ള ബോബ്ക്യാറ്റ് എന്ന പൂച്ചവര്‍ഗവും ചെന്നായുടെ വര്‍ഗത്തില്‍പ്പെട്ട കൊയോട്ട്‌സും നിരവധിയുള്ള സ്ഥലമാണിത്. ഇവയെ പിടിക്കാന്‍ വേണ്ടിയാണ് കുടുക്കുതയാറാക്കിയത്. അതില്‍ അവിചാരിതമായിട്ടാണ് പെണ്‍സിംഹം വീഴുന്നത്. സിംഹവും രക്ഷപെടാനുള്ള പരാക്രമങ്ങള്‍ കാണിക്കുന്നുണ്ടായിരുന്നു. കുപിതയായി ഗര്‍ജിച്ചുകൊണ്ട് കുടുക്കുമായി മണ്ണില്‍ ഉരുളുന്ന സിംഹത്തിന്റെ അടുത്തേക്ക് ധൈര്യം സംഭരിച്ച് സെക്യൂരിറ്റി എത്തി. വളരെ സാവധാനം കുടുക്ക് അഴിക്കാനായി അടുത്തു.

ആദ്യമൊക്കെ സിംഹം അക്രമകാരിയായി തന്നെ തുടര്‍ന്നു. തന്നെ രക്ഷിക്കാനാണ് സെക്യൂരിറ്റി വരുന്നതെന്ന് പതിയെ അതിനും മനസിലായതോടെ ശാന്തയായി. ഈ തക്കംനോക്കി കുടുക്കഴിച്ച് സിംഹത്തെ സ്വതന്ത്രയാക്കി കാട്ടിലേക്ക് തന്നെ തിരികെ അയച്ചു. വീഡിയോ കണ്ടവരെല്ലാം സെക്യൂരിറ്റിയുടെ ധൈര്യത്തെ ഇപ്പോള്‍ വാനോളം പുകഴ്ത്തുകയാണ്.