സഫാരി പാര്‍ക്കിലൂടെ സഞ്ചരിക്കുകയായിരുന്ന സംഘം ആനയുടെ മുന്നില്‍പ്പെടുന്നതിന്റെ വീഡിയോ ദൃശ്യങ്ങള്‍ ഭീതിപ്പെടുത്തുന്നതാണ്. ശ്രീലങ്കയിലെ യാലാ നാഷണല്‍ പാര്‍ക്കില്‍ നിന്നുള്ള ദൃശ്യങ്ങളാണിത്.

സഫാരി പാര്‍ക്കിലൂടെ പോകയായിരുന്ന ഒരു ജീപ്പിലെ സഞ്ചാരികളാണ് ആനയുടെ മുമ്പില്‍പെട്ടത്. ജീപ്പിനകത്ത് നിന്നും ഭക്ഷണപദാര്‍ത്ഥങ്ങളുടെ മണം വന്നതിനാലാണെന്ന് തോന്നുന്നു ആന ജീപ്പിനു സമീപമെത്തിയത്. സെക്കന്റുകള്‍ക്കകം അതിന്റെ നീണ്ട തുമ്പിക്കൈ ജീപ്പിനുള്ളിലേക്കിട്ടു. അതിനുള്ളിലെ യാത്രക്കാര്‍ നടുങ്ങി മരവിച്ചിരിക്കുകയാണ്. ആന ജീപ്പിന്റെ മുന്‍ സീറ്റെല്ലാം വലിച്ചു കീറുമ്പോഴും ചങ്കിടിപ്പോടെ യാത്രക്കാര്‍ ഉള്ളിലിരിക്കുന്നുണ്ടായിരുന്നു.

ലണ്ടനില്‍ നിന്നുള്ള 28-കാരി ബിയാന്‍കയും 28-കാരനായ അര്‍ജന്റീനക്കാരനായ സുഹൃത്തും 32-കാരനായ സ്‌പെയിന്‍കാരനായ സുഹൃത്തും മറ്റുചിലരുമാണ് ജീപ്പിലുണ്ടായിരുന്നത്. തുറന്ന ജീപ്പിലാണ് അവര്‍ സഫാരി പാര്‍ക്കിലൂടെ സഞ്ചരിച്ചത്. ഒരു കൊമ്പനാന മുന്നിലെത്തിയപ്പോള്‍ അതിനെ നല്ലതുപോലെ കാണാനായി അല്‍പമകലെയായി ജീപ്പ് നിര്‍ത്തി അതിനെ കണ്ടു കൊണ്ടിരിക്കുകയായിരുന്നു. പെട്ടെന്നാണ് ആന അവര്‍ക്കരികിലേക്ക് നടന്നു തുടങ്ങിയത്. ജീപ്പിനരികെ എത്തിയ ഉടനെ തുമ്പിക്കൈ അതിനുള്ളിലേക്ക് കടത്തിയത് ബിയാന്‍ക ഇരിക്കുന്നതിന് അരികിലൂടെ ആയിരുന്നുവെന്നും പേടിച്ച് പിന്നിലേക്ക് ഒതുങ്ങി കയറി ഇരുന്നതിനാല്‍ ദോഷമൊന്നും ഉണ്ടായില്ലെന്നും അല്ലെങ്കില്‍ അതിന്റെ കൊമ്പുകള്‍ ദേഹത്ത് കുത്തികയറുമായിരുന്നെന്നും ബിയാന്‍ക പറയുന്നു.

ഏതായാലും ജീപ്പിലുണ്ടായിരുന്ന ഭക്ഷണവും അതോടൊപ്പം സീറ്റും പ്ലാസ്റ്റിക് കവറുമെല്ലാം തിന്നതിനുശേഷമാണ് ആന സ്ഥലം വിട്ടത്. തിരികെ ഹോട്ടലിലെത്തിയ ബിയാന്‍കയോട് ഹോട്ടലുടമ പറഞ്ഞത്രേ, പ്രദേശവാസികള്‍ക്കെല്ലാം പരിചിതനാണ് ആ ആനയെന്നും, ആന കുട്ടിയായിരുന്ന കാലം മുതല്‍ സഞ്ചാരികള്‍ അതിന് ആഹാരം ഇട്ടു കൊടുക്കുക പതിവായിരുന്നെന്നും അതിനാല്‍ വാഹനങ്ങള്‍ കാണുമ്പോള്‍ ഇപ്പോഴും ഭക്ഷണത്തെ കുറിച്ച് അതിന് ഓര്‍മ്മ വരുന്നതിനാലാണ് വാഹനത്തോട് അടുത്ത് വരുന്നതെന്നുമാണ്. ഏതായാലും ജീവന്‍ രക്ഷപ്പെട്ടതിന്റെ ആശ്വാസത്തിലാണ് ബിയാന്‍കയും സംഘവും