മെക്‌സിക്കോയിലെ ഒരു കണ്‍വീനിയന്റ് സ്‌റ്റോറിലെ സിസിടിവിയില്‍ പതിഞ്ഞ ദൃശ്യങ്ങള്‍ ഒരേ സമയം ഭയവും ചിരിയും ഉളവാക്കും.

സ്‌റ്റോറിന്റെ ക്യാഷ് കൗണ്ടറിന് അടുത്തായി ഒരാള്‍ കൗബോയ് തൊപ്പിയൊക്കെ ധരിച്ചു നില്‍ക്കുന്നത് കാണാം.അപ്പോള്‍ സ്റ്റോറിന്റെ മുന്‍വാതിലില്‍ കൂടി മറ്റൊരാള്‍ കയറിവരുന്നുണ്ട്. ആ വന്ന ആള്‍ ജാക്കറ്റിനുള്ളില്‍ നിന്നും ഒരു റിവോള്‍വര്‍ എടുത്ത് കാഷ്യറുടെ നേര്‍ക്ക് ചൂണ്ടുന്നു. അവിടെ തന്നെ നില്‍ക്കുന്ന കൗബോയ് തൊപ്പിക്കാരനും പെട്ടെന്ന് തോക്കുധാരിയെ നോക്കുന്നു എന്ന് തിരിച്ചറിഞ്ഞതോടെ അയാള്‍ റിവോള്‍വര്‍ കാഷിയറിനു നേര്‍ക്കും കൗബോയ് തൊപ്പിക്കാരനു നേര്‍ക്കും മാറി മാറി നീട്ടുന്നു.

ഒരു തഴക്കവും വഴക്കവും ഉള്ള കള്ളന്റെ ലക്ഷണങ്ങളൊന്നും അയാള്‍ക്കുണ്ടായിരുന്നില്ല. ആകപ്പാടെ ഒരു പരിഭ്രമം. തന്റെ തോക്കു കണ്ട് ഭയപ്പെട്ട് എന്തെങ്കിലും തന്നാല്‍ പെട്ടെന്ന് പൊയ്‌ക്കൊള്ളാമെന്നു പറയുന്നത് പോലൊരു ഭാവം. അല്ലാതെ ഒരു ഭീകരന്റെ രീതിയൊന്നും ഉണ്ടായിരുന്നില്ല. എങ്കിലും അയാളുടെ കൈയ്യിലിരിക്കുന്നതു തോക്കല്ലേ, വശപ്പിശകായി അതിന്റെ ട്രിഗ്ഗര്‍ അമര്‍ന്നാല്‍ ഭീകരന്റെ തോക്കില്‍ നിന്ന് പുറപ്പെടുന്ന വെടിയുണ്ടയും , ഭീകരത തോന്നാത്ത പരിഭ്രമിച്ച കള്ളന്റെ തോക്കിലെ വെടിയുണ്ടയും ചെയ്യുന്ന ഫലം ഒന്നായിരിക്കും. അത് കൊണ്ട് അവന്റെ കൈയിലിരിക്കുന്ന തോക്കിനോട് കരുതലോടെ ഇടപെടണമല്ലോ?

എതായാലും അവിടെ നിന്ന കൗബോയ് തൊപ്പിക്കാരന് നേര്‍ക്ക് തോക്കു ചൂണ്ടിയപ്പോള്‍ അയാള്‍ സാവധാനത്തില്‍ സ്വന്തം മുഖത്ത് നിന്നും സണ്‍ഗ്ലാസ് എടുത്തു മാറ്റി. തോക്കുധാരി ഒന്ന് പതറി. ഇയാളിനി തന്നെ ആക്രമിയ്ക്കാനെങ്ങാനും പോകയാണോ എന്ന തോന്നലില്‍ ഒന്ന് കരുതലോടെ നിന്നു. അപ്പോള്‍ അതാ കള്ളന്റെ പുറകുവശത്തു കൂടെ ഒരു കസ്റ്റമര്‍ സ്‌റ്റോറിനുള്ളിലേയ്ക്ക് വരുന്നു. കള്ളന് അഭിമുഖമായി നിന്ന കൗബോയ് തൊപ്പിക്കാരന്‍ അത് കണ്ട് അങ്ങോട്ട് കണ്ണയച്ചു. അപ്പോള്‍ തന്റെ പിന്നില്‍ എന്തോ നടക്കുന്നുണ്ടെന്ന് കള്ളന് തോന്നി. അതെന്താണെന്നു നോക്കാനായി ഒന്ന് തലതിരിച്ചു നോക്കി. അത്ര സമയമേ കൗബോയ് തൊപ്പിക്കാരന് വേണ്ടിയിരുന്നുള്ളു.

സിനിമാ സ്‌റ്റൈലില്‍ ചാടി വീണു കള്ളനെ പൂണ്ടടക്കം പിടിച്ചു. അതിനിടെ അയാളുടെ കൈയ്യില്‍ നിന്നും തോക്കു തെറിച്ചു താഴെ വീണു. രണ്ടു പേരും കെട്ടിമറിഞ്ഞു യുദ്ധം ചെയ്യുന്നതിനിടെ സ്‌റ്റോറിലെ മറ്റൊരു സ്റ്റാഫ് ഓടിവന്നു തോക്കു എടുത്തുകൊണ്ടു പോയി. അതിനിടെ എങ്ങനെയോ കൗബോയ് തൊപ്പിക്കാരന്റെ പിടിവിടുവിച്ചു കള്ളന്‍ സ്റ്റോറിന്റെ അകത്തേക്കോടി, സാധനങ്ങള്‍ വച്ചിരിയ്ക്കുന്ന ഐ്‌ലിന്റെ മറുവശത്തുകൂടി ഓടി വീണ്ടും കാമറയ്ക്കു മുന്നിലെത്തുമ്പോള്‍ കള്ളന് ഉടുപ്പ് നഷ്ടമായിരുന്നു. അവന്‍ ഓടി മുന്‍വശത്തെ വാതിലില്‍ കൂടി പുറത്തിറങ്ങാനാണ് ശ്രമിയ്ക്കുന്നതെന്നു മനസ്സിലായതോടെ സ്‌റ്റോറിലെ ചില സ്റ്റാഫംഗങ്ങള്‍ അവന്റെ മുന്നിലേക്കോടി കയറി അവന്റെ വഴിമുടക്കിയതോടെ അവന്‍, അവന്റെ പിന്നാലെ ഓടിയെത്തിക്കൊണ്ടിരുന്നവരുടെ പിടിയിലാകുകയും ചെയ്തു. അപ്പോഴേയ്ക്കും ക്യാഷ് കൗണ്ടറില്‍ നിന്നും പൊലീസിന് ഫോണ്‍ ചെയ്തു തുടങ്ങിയിരുന്നു.

ഏപ്രില്‍ 23-ാം തീയതി പ്രാദേശിക സമയം 11 മണിയ്ക്ക് പകര്‍ത്തിയ ഈ ദൃശ്യങ്ങള്‍ റെഡിറ്റ്.കോമില്‍ പങ്കുവയ്ക്കപ്പെട്ടതാണ്.