നമ്മുടെ നാട്ടില്‍ ജീവിതത്തില്‍ ഒറ്റപ്പെട്ടു പോയവര്‍ക്കും ഉപേക്ഷിക്കപ്പെട്ടവര്‍ക്കും ആശ്രയമാണ് അനാഥാലയങ്ങള്‍. എന്നാല്‍ ആനകള്‍ക്ക് അനാഥാലയമുള്ള ഒരു അയല്‍രാജ്യം നമുക്കുണ്ട്. ഏതാണന്നല്ലേ? ശ്രീലങ്ക. ഒറ്റപ്പെട്ടും അമ്മയില്ലാതെയും കാട് നഷ്ടപ്പെടുന്ന ആനകള്‍ക്ക് സുരക്ഷിത താവളങ്ങളും നല്ല ഭക്ഷണവും നല്‍കി സുഖകരമായ ജീവിതവും അതിനൊപ്പം നല്ല സാഹചര്യങ്ങളും പ്രദാനം ചെയ്തു പോറ്റുക എന്ന മഹത്തരമായ ഒരു കാര്യത്തിനാണ് ശ്രീലങ്കന്‍ ഗവണ്മെന്റ് വര്‍ഷങ്ങളായി ശ്രമിച്ചുകൊണ്ടിരിക്കുന്നത്. ഈ കാഴ്ച കാണാന്‍ സ്വദേശികളും വിദേശികളുമടക്കം നിരവധിപേരാണ് ഇവിടെയെത്തുന്നത്.

ആനകള്‍ക്ക് വേണ്ടിയുള്ള ഈ അനാഥാലയം സ്ഥിതി ചെയ്യുന്നത് ശ്രീലങ്കയുടെ തലസ്ഥാനമായ കൊളംബോയില്‍ നിന്നും 90 കിലോമീറ്റര്‍ അകലെ കെഗല്ലേ ജില്ലയിലെ പിന്നാവാല എന്ന ഗ്രാമത്തിലാണ്. മഹാ ഒയാ നദിക്കരയിലെ 25 ഏക്കര്‍ തെങ്ങിന്‍തോപ്പാണ് ഇവിടെ ആനകളുടെ വസതി. 1975-ലാണ് ശ്രീലങ്കയിലെ വന്യജീവി സംരക്ഷണ വകുപ്പ് മാതൃകയാക്കപ്പെടേണ്ട ഇത്തരത്തിലൊരു സംരംഭത്തിന് മുന്നിട്ടിറങ്ങുന്നത്. 1978- ല്‍ ഇത് ദേശീയ ജന്തുശാസ്ത്ര വിഭാഗം ഏറ്റെടുക്കുകയും 1982-ല്‍ ആനകളെ പരിപാലിക്കുന്നതിനു മികച്ച രീതിയിലൊരു ക്രമം നടപ്പിലാക്കുകയും ചെയ്തു. ആനകള്‍ക്ക് സ്വാഭാവിക രീതിയിലുള്ള ജീവിതശൈലിയും നല്ല ഭക്ഷണവും അന്നുതൊട്ടിന്നോളം നല്‍കി പോരുന്നു. തുടങ്ങിയപ്പോള്‍ നാല് അനാഥ ആനകുഞ്ഞുങ്ങളാണ് ഉണ്ടായിരുന്നത്. ഇന്നത് നൂറെണ്ണത്തിലും അധികമായിരിക്കുന്നു.

ഏറെ രസകരമാണ് ആനകളുടെ ദിനചര്യ. മഹാ ഒയാ നദിയിലെ കുളിയോടെയാണ് ഒരു ദിവസം ആരംഭിക്കുന്നത്. കാലത്തു മാത്രമല്ല വൈകുന്നേരത്തും ആനകള്‍ക്ക് നീരാട്ട് പതിവാണ്. 76 കിലോഗ്രാമോളം ആനക്ക് ഭക്ഷിക്കാന്‍ കഴിയുന്ന പച്ചിലകളും രണ്ടു കിലോഗ്രാം അരിയുടെ തവിടും ചോളവും ഭക്ഷണത്തില്‍ ഉള്‍പ്പെടുത്തിയിട്ടുണ്ട്. ആനകളുടെ വംശവര്‍ധനവിനായി ശാസ്ത്രീയമായ രീതിയില്‍ പ്രജനനം നടത്തി ഇവിടെ ആനകുഞ്ഞുങ്ങള്‍ ഉണ്ടാകുകയും ചെയ്യുന്നുണ്ട്. സ്വാഭാവികമായ രീതിയില്‍ ഇണചേര്‍ന്ന് ആദ്യമായി ഇവിടെയൊരു ആനക്കുഞ്ഞുണ്ടാകുന്നത് 1984-ലാണ്. ഇന്നിപ്പോള്‍ മൂന്നു തലമുറ ആനകളാണ് ഈ ആന അനാഥാലയത്തിലെ അന്തേവാസികള്‍.

ബ്രിട്ടീഷ് അധിനിവേശമാണ് ശ്രീലങ്കയില്‍ ആനകളുടെ എണ്ണത്തില്‍ വലിയ കുറവുണ്ടാക്കിയത്. മുപ്പതിനായിരം ആനകളുണ്ടായിരുന്ന ശ്രീലങ്കന്‍ കാടുകളില്‍ വിരലില്‍ എണ്ണാവുന്ന ആനകളോളമാക്കി തീര്‍ത്തത് ആ ഭരണമാണ്. ആനകളുടെ വംശം തന്നെ അന്യമാകാതിരിക്കാനുള്ള ശ്രീലങ്കന്‍ ഗവണ്‍മെന്റിന്റെ പ്രവര്‍ത്തനങ്ങള്‍ മികച്ച രീതിയിലുള്ള ഫലമാണ് നല്‍കുന്നത്. മൂവായിരത്തിലധികം ആനകള്‍ ഇന്നിപ്പോള്‍ അവിടെയുണ്ട്.

കാലത്തു 8 .30 നാണ് പിന്നാവാലയിലെ സന്ദര്‍ശന സമയം ആരംഭിക്കുന്നത്. വൈകുന്നേരം 6 മണിക്ക് അടക്കുകയും ചെയ്യും. കാലത്തു 9. 15, ഉച്ചക്ക് 1. 15, വൈകുന്നേരം 5 മണി ഈ നേരങ്ങളിലാണ് ആനകള്‍ക്ക് ഭക്ഷണം നല്‍കുന്നത്. കാലത്തു 10 മണി മുതല്‍ തന്നെ നദിക്കരയില്‍ ആനകള്‍ കുളിക്കുന്നത് കാണുന്നതിനുള്ള സൗകര്യവുമുണ്ട്. വളരെ ചെറിയ ആനകുഞ്ഞുങ്ങള്‍ക്കു കുപ്പികളിലാക്കിയാണ് പാല്‍ നല്‍കുന്നത്. അവിടെത്തുന്ന സഞ്ചാരികളില്‍ താല്‍പര്യമുള്ളവര്‍ക്ക് ആനകുഞ്ഞുങ്ങള്‍ക്ക് കുപ്പിയില്‍ പാല് നല്‍കാവുന്നതാണ്. പക്ഷേ,അധികൃതരുടെ അനുമതി നേടമം.

ലോകത്തെല്ലായിടത്തു നിന്നും വലിയ അഭിനന്ദങ്ങളാണ് പിന്നാവാലയിലെ ഈ ആനകളുടെ അനാഥാലയത്തിനു ലഭിക്കുന്നത്. യാതൊരു തരത്തിലുള്ള അസ്വാതന്ത്രങ്ങളുമില്ലാതെ കാട്ടില്‍ എപ്രകാരമാണോ കഴിയുന്നത് അതുപോലെ തന്നെ ഈ വന്യമൃഗത്തെ ഇവിടെ സംരക്ഷിച്ചിരിക്കുന്നു എന്ന കാര്യം ശ്ലാഘനീയം തന്നെയാണ്.