മധ്യപ്രദേശിലെ സത്പുര ടൈഗര്‍ റിസേര്‍വിനരികെയുള്ള ധുണ്ഡി ഗ്രാമത്തിലെ ഒരു കിണറ്റില്‍ 3 വയസ്സ് പ്രായമുള്ള ഒരു പുള്ളിപുലിയെ ഗ്രാമീണരാണ് കണ്ടത്. 20 അടിയോളം ആഴമുള്ള കിണറ്റില്‍ വെള്ളത്തിന് മുകളില്‍ തല പൊന്തിച്ചു നില്‍ക്കാന്‍ പാടുപെടുകയായിരുന്നു പ്രസ്തുത പുലി.

ഗ്രാമീണര്‍ ഉടനെ തന്നെ വനപാലകരെ വിവരം അറിയിച്ചു. സ്ഥലത്തെത്തിയ അധികൃതര്‍ ഗ്രാമവാസികളുമായി ചേര്‍ന്ന് പുലിയെ കരയ്ക്ക് എത്തിക്കുന്നതില്‍ വിജയിച്ചു. 20 അടിയോളം ആഴമുള്ള കിണറിന്റെ താഴെ വരെ എത്തുന്ന ഒരു ഏണി നിര്‍മിക്കുകയായിരുന്നു അവര്‍ ആദ്യം ചെയ്തത്. മുള ഉപയോഗിച്ചായിരുന്നു അവര്‍ ഏണി നിര്‍മ്മിച്ചത്. 6 മീറ്ററോളം നീളമുണ്ടായിരുന്നു ആ ഏണിയ്ക്ക്.

വളരെ സൂക്ഷ്മതയോടെ അവര്‍ ആ ഏണി കിണറിനുള്ളിലേക്ക് ഇറക്കി വച്ച് കൊടുത്തു. എന്നിട്ടും ഉടനെ അതിലൂടെ കയറാന്‍ ശ്രമമൊന്നും നടത്താതെ പുലി വെള്ളത്തില്‍ കിടന്ന് കൈ കാലിട്ടിച്ചു കൊണ്ടിരിക്കുകയായിരുന്നു. ഏണി കിണറിനുള്ളിലേയ്ക് ഇറക്കിയിട്ട് ഗ്രാമീണരും വനപാലകരും സുരക്ഷിതമായ ഒരിടത്തേക്ക് മാറി.

പിന്നെയും കുറച്ചു സമയം കൂടി കഴിഞ്ഞിട്ടാണ് പുലി ഏണിയില്‍ കൂടി കയറി വരാനുള്ള ശ്രമം തുടങ്ങിയത്. ഒടുവില്‍ മുകളറ്റം എത്തിയപ്പോള്‍ അവിടെ ആരുമില്ല എന്ന് ഉറപ്പു വരുത്തിയതിനു ശേഷം പുലി ഇറങ്ങി ഒറ്റ ഓട്ടം വച്ച് കൊടുത്തു!

ഫോറസ്‌ററ് സര്‍വീസസ് അസിസ്റ്റന്റ് ഡയറക്ടറായ ലോകേഷ് നിരപുരേയെ ഗ്രാമീണര്‍ ബന്ധപ്പെട്ടപ്പോള്‍ തന്നെ കിണറിന്റെ ആഴത്തോളം പോന്ന ഒരു ഏണി ഉണ്ടാക്കാനാണ് അദ്ദേഹം ആവശ്യപ്പെട്ടത്. തുടര്‍ന്ന് അദ്ദേഹം നേരിട്ട് സ്ഥലത്തെത്തി. അദ്ദേഹം എത്തുമ്പോഴേയ്ക്കും ഏണി തയാറായി കഴിഞ്ഞിരുന്നു. നേരത്തെ ഗ്രാമവാസികള്‍ കയര്‍ ഇട്ടുകൊടുത്ത് നോക്കിയെങ്കിലും അത്രയും ഉയരത്തിലെത്തുവോളം അതില്‍ തൂങ്ങിപ്പിടിച്ച് കയറാന്‍ പുലിയ്ക്കായില്ല.

ഇപ്പോള്‍ ചൂട് കൂടിയ കാലാവസ്ഥ ആയതിനാല്‍ ദാഹം അകറ്റാനായി വെള്ളം അന്വേഷിച്ചാണ് വന്യ മൃഗങ്ങള്‍ ജനവാസമേഖലയിലേക്ക് എത്തുന്നത് എന്ന് അദ്ദേഹം പറഞ്ഞു. സത്പുര ടൈഗര്‍ റിസേര്‍വിനടുത്തുള്ള മറ്റൊരു ഗ്രാമമായ ചിന്ദ്വാരയില്‍ കിണറ്റില്‍ വീണ ഒരു പുലിയെ അടുത്തിടെ രക്ഷപ്പെടുത്തി വിട്ടിരുന്നു.