സംവിധായകന്‍ കരണ്‍ ജോഹര്‍, താനൊരു സ്വവര്‍ഗാനുരാഗിയാണെന്ന് ആദ്യമായി വെളിപ്പെടുത്തിയത് തന്റെ ആത്മകഥയിലൂടെയാണ്. പിന്നാലെ ലൈംഗികതയെപ്പറ്റി പൊതു ഇടങ്ങളില്‍ മടിയില്ലാതെ തുറന്നുസംസാരിക്കുകയാണ് കരണ്‍.

സ്വവര്‍ഗാനുരാഗിയെന്ന് വെളിപ്പെടുത്തുംമുന്‍പ് തന്നെ ഓണ്‍ലൈന്‍ ആക്രമണത്തിനും ട്രോളുകള്‍ക്കുമെല്ലാം കരണ്‍ വിധേയനായിട്ടുണ്ട്. ഈയടുത്ത് അര്‍ബാസ് ഖാനുമായുള്ള അഭിമുഖത്തില്‍ ട്രോളുകള്‍ ബാധിച്ചതെങ്ങനെയെന്ന് കരണ്‍ തുറന്നുപറഞ്ഞിരുന്നു. ''ആദ്യമൊക്കെ ട്രോളുകള്‍ കാണുമ്പോള്‍, ദേഷ്യം വരുമായിരുന്നു. അസ്വസ്ഥനാകുമായിരുന്നു. എന്നാല്‍ പിന്നീട് സാധാരണസംഭവമായി തോന്നി. ഇപ്പോള്‍ സുന്ദരമായ ആനന്ദാനുഭൂതിയിലാണ്. എല്ലാ ദിവസവും ഇതേ ആനന്ദത്തോടെയാണ് ഞാന്‍ ഉണരുന്നത്.

''എന്റെ ജീവിതത്തെക്കുറിച്ചും ലൈംഗികതയെക്കുറിച്ചും സംസാരിക്കണോ വേണ്ടയോ എന്ന് തീരുമാനിക്കുന്നത് ഞാനാണ്. അതെന്റെ മാത്രം കാര്യമാണ്. ഒരു ഘട്ടത്തില്‍ സ്വവര്‍ഗരതിയോട് ഭയമായിരുന്നു എനിക്ക്. എന്റെ ലൈംഗികാഭിമുഖ്യത്തെ കുറിച്ച് നിങ്ങള്‍ക്കു സംസാരിക്കാം, പക്ഷേ സ്വവര്‍ഗലൈംഗികതയെക്കുറിച്ച് മോശമായാണ് നിങ്ങള്‍ സംസാരിക്കുന്നതെങ്കില്‍ നിങ്ങള്‍ക്ക് കാര്യമായ പ്രശ്‌നങ്ങളുണ്ട്. അറിവില്ലാത്ത മനസ്സാണ് നിങ്ങളുടെ, അസംസ്‌കൃതമായ ചിന്തകളാണ് നിങ്ങളുടേത്, കരണ്‍ തുറന്നടിക്കുന്നു.

മോശം കമന്റുകളും ട്രോളുകളും തന്നെ ബാധിച്ചിരുന്നെന്ന് കരണ്‍ തുറന്നുപറയുന്നു. ''എന്നെക്കുറിച്ച് സംസാരിച്ചുകൊള്ളൂ, എനിക്ക് പ്രശ്‌നമില്ല. പക്ഷേ എനിക്കെന്തോ അസുഖമുണ്ട്, പ്രശ്‌നമുണ്ട് എന്നൊക്കെയുള്ള സംസാരങ്ങള്‍ അത്ര സുഖമുള്ളതല്ല. ഞാനൊരു സ്വവര്‍ഗ്ഗാനുരാഗിയായതുകൊണ്ട് മിണ്ടാതിരിക്കണം എന്നാണ് നിങ്ങള്‍ കരുതുന്നത്. അങ്ങനെയെങ്കില്‍ നിങ്ങളും മിണ്ടാതിരിക്കണം, കാരണം നിങ്ങള്‍ക്കൊരു ജീവിതമില്ല. (വാടക ഗര്‍ഭപാത്രത്തിലൂടെ കരണിന് ഒരു മകനും മകളും ഉണ്ട്.)

സ്വവര്‍ഗാനുരാഗം പ്രമേയമാക്കി സിനിമയെടുക്കണമെന്ന് ആഗ്രഹമുണ്ടെന്ന് ഒരിക്കല്‍ കരണ്‍ വെളിപ്പെടുത്തിയിരുന്നു. ''മുന്‍ നിര സംവിധായകരില്‍ ഒരാള്‍ എന്ന നിലക്ക് എനിക്കീ വിഷയത്തില്‍ സിനിമയെടുക്കാം. സ്വവര്‍ഗാനുരാഗികളെക്കുറിച്ച് സിനിമയെടുക്കാന്‍ അതിയായ ആഗ്രഹമുണ്ട്. മുന്‍നിര നായകന്മാര്‍ തന്നെ ആ സിനിമയില്‍ വരണം. നടന്മാരുടെ കാര്യത്തില്‍ വ്യക്തതയില്ലെങ്കിലും അങ്ങനെയൊരു സിനിമ ചെയ്യണമെന്ന ആഗ്രഹമുണ്ട്''-കരണ്‍ പറഞ്ഞു.