വിവാഹശേഷം വരനെയും വധുവിന്റേയും വാഹനത്തിന് മുന്നിൽ സുഹൃത്തുക്കൾ നടത്തിയ ബൈക്ക് റാലിയ്ക്കിടെ അപകടം. പോക്കറ്റ് റോഡിൽ നിന്നും പ്രധാന റോഡിലേക്ക് കയറിയ ബൈക്ക് റാലിയിലേക്ക് വേഗത്തിലെത്തിയ കാർ പാഞ്ഞു കയറുകയായിരുന്നു. ഇടിയിൽ ബൈക്കിൽ സഞ്ചരിച്ചവർ തെറിച്ചുവീഴുന്നതും ദൃശ്യങ്ങളിൽ കാണാം. മയ്യിച്ചയിൽ ഇന്നലെ വൈകീട്ടാണ് അപകടമുണ്ടായത്. വിവാഹത്തിന്റെ ഭാഗമായി ബൈക്കുകള്‍ കൊണ്ട് നടത്തിയ വാഹന പ്രകടനത്തിനിടയിലേക്ക് കാർ ഇടിച്ചു കയറുകയായിരുന്നു.

അപകടത്തിൽ 4 പേർക്ക് പരിക്കേറ്റു. ഗുരുതരമായി പരിക്കേറ്റ ഒരാളെ മംഗലാപുരത്തെ ആശുപത്രിയിലേക്ക് കൊണ്ട് പോയി. അഖിലേഷ്, അമൃത് രാജ്, ജിത്തു, അനിൽകുമാർ എന്നിവർക്കാണ് പരിക്കേറ്റത്. കാർ ഡ്രൈവർ ഫോൺ ഉപയോഗിച്ച് ഡ്രൈവ് ചെയ്തതതാണ് അപകട കാരണമെന്നാണ് വിവാഹത്തിന് വാഹന പ്രകടനം നടത്തിയവര്‍ ആരോപിക്കുന്നത്. മയ്യിച്ചയിലെ ഓഡിറ്റോറിയത്തില്‍ നിന്ന് വിവാഹ ചടങ്ങുകള്‍ കഴിഞ്ഞ് വധൂ വരന്മാരോടൊപ്പം വാഹനങ്ങള്‍ കാര്യങ്കോടുള്ള വരന്‍റെ വീട്ടിലേക്ക് മടങ്ങും വഴിയാണ് അപകടമുണ്ടായത്. സോഷ്യൽ മീഡിയയിൽ ചർച്ചയായ വീഡിയോ കാണാം...