ലോക്ഡൗണ് : പൂവാറിലെ വീട്ടില് പിതാവ് മരിച്ചു; മുംബൈയിലെ മധ്യറെയില്വേ ആസ്ഥാനത്ത് അന്നും ഡ്യൂട്ടിക്കെത്തി മകന്!
ലോക്ഡൗണ് പ്രഖ്യാപിച്ചിരിക്കെ പലയിടങ്ങളില് കുടുങ്ങിക്കിടക്കുന്ന നൂറുകണക്കിനു റെയില്വേ ജീവനക്കാരുടെ വേദനയാണോ സ്വന്തം പിതാവ് മരണമടഞ്ഞിട്ടും ഒരു നോക്ക് കാണാന് യോഗമില്ലാത്തതിന്റെ വേദനയാണോ വലുതെന്ന് തീരുമാനിക്കാനുള്ള നിയോഗം ഉണ്ടായപ്പോള്, മധ്യറെയില്വേയിലെ ചീഫ് കണ്ട്രോളറായ തിരുവനന്തപുരം സ്വദേശി ജോയി വര്ഗീസ് സ്വന്തം വേദന കടിച്ചമര്ത്താനായിരുന്നു തീരുമാനിച്ചത്.
പൂവാറിലെ വീട്ടില് പിതാവ് മരിച്ചുകിടക്കെ, പലയിടങ്ങളിലായി കുടുങ്ങിക്കിടക്കുന്ന റെയില്വേ ജീവനക്കാരും അവരുടെ കുടുംബങ്ങളും രക്ഷതേടി കണ്ട്രോള് റൂമിലേക്ക് വിളിക്കുന്ന ഫോണുകളെല്ലാം ക്ഷമയോടെ സ്വീകരിക്കാന് പതിവുപോലെ ബാഗുമെടുത്ത് മുംബൈ സയണിലെ വീട്ടില് നിന്ന് മധ്യറെയില്വേ ആസ്ഥാനമായ സിഎസ്എംടിയിലെ ഓഫിസിലെത്തി.
ജീവനക്കാരെയും ട്രെയിനുകളെയും സുരക്ഷിത സ്ഥലങ്ങളിലെത്തിക്കാനുള്ള ജോലിക്കിടെ, ജോയിയുടെ കണ്ണില് നിന്ന് ഊര്ന്നിറങ്ങിയ കണ്ണീര് അധികമാരും കണ്ടിട്ടുണ്ടാവില്ല. ട്രെയിനുകളിലെയും, മധ്യറെയില്വേ പരിധിയില് കുടുങ്ങിയ മറ്റു ട്രെയിനുകളിലെയും ജീവനക്കാരുടെ സുരക്ഷയും ഏകോപനവുമാണ് ജോയിയുടെ ചുമതല. ഏതൊക്കെ ട്രെയിനുകള് എവിടെ കിടക്കുന്നു എന്നു സംബന്ധിച്ച രേഖകളും തയാറാക്കണം.
ജോയി വര്ഗീസ് വീട്ടില് നിന്നു ജോലിക്ക് ഇറങ്ങാനിരിക്കെയാണ് വ്യാഴാഴ്ച രാവിലെ മരണവാര്ത്തയറിഞ്ഞത്. എല്ലാ യാത്രാമാര്ഗങ്ങളും അടഞ്ഞിരിക്കെ മുംബൈയില് നിന്നു തിരുവനന്തപുരത്തേക്കുള്ള യാത്ര അസാധ്യമായി. സഹോദരന്മാരില് ഒരാള് രാജസ്ഥാനിലും മറ്റൊരാള് ദുബായിലുമാണ്. മൂന്ന് ആണ്മക്കള്ക്കും വ്യാഴാഴ്ച പിതാവിന്റെ സംസ്കാരത്തില് പങ്കെടുക്കാനായില്ല. മൂന്നു സഹോദരിമാരും കുടുംബവുമാണ് അന്ത്യയാത്ര നല്കാനുണ്ടായത്. അമ്മ ബെര്ലിന് 3 വര്ഷം മുന്പു മരണമടഞ്ഞിരുന്നു.
പിതാവ് തിരുവനന്തപുരം പൂവാര് കല്ലടമുക്ക് ജോബി ഭവനില് വി. വര്ഗീസ് പശ്ചിമ റെയില്വേയില് ഗാര്ഡായിരുന്നു. ലോക് ഡൗണിനെത്തുടര്ന്ന് അധികം പേര്ക്ക് ജോലിക്ക് എത്താന് കഴിയാത്ത സാഹചര്യമാണ് മുംബൈയില്. വ്യാഴാഴ്ചയും ഇന്നലെയും രാവിലെ ഏഴു മുതല് 12 മണിക്കൂറാണ് ജോയി ജോലി ചെയ്തത്. ഒരുപാടു കാലം ഒട്ടേറെ യാത്രക്കാര്ക്കു കരുതല് പകര്ന്ന റെയില്വേ ഗാര്ഡായ പിതാവിനുള്ള ഏറ്റവും അനുയോജ്യമായ യാത്രയയപ്പ് ഇതായിരിക്കണം.
https://www.facebook.com/Malayalivartha