എന്റെ കൊലയാളിയുടെ കണ്ണുകളില് നോക്കി എനിക്ക് മരിക്കണം, വധശിക്ഷ നടപ്പാക്കുന്നതിന് മുമ്പ് തന്റെ അവസാനത്തെ ആഗ്രഹം പ്രകടിപ്പിച്ച് ഓസ്ട്രേലിയന് യുവാവ്
എന്റെ കൊലയാളിയുടെ കണ്ണുകളില് നോക്കി എനിക്ക് മരിക്കണം, ആ കണ്ണൂകളില് ദയയുണ്ടോ എന്ന് എനിക്ക് അറിയണം നാളെ ഇന്തോനേഷ്യന് ജയിലില് തൂക്കിലേറ്റുന്ന മയൂരന് സുകുമാരന്റെ വാക്കുകളാണിത്. എട്ടു കിലോ ഹെറോയിന് കടത്താന് ശ്രമിച്ചതിനെ തുടര്ന്നാണ് ഓസ്ട്രേലിയന് സ്വദേശികളായ ആന്ഡ്രൂ ചാനും, മയൂരന് സുകുമാരനും ഇന്തോനേഷ്യയില് പിടിയിലാകുന്നത്. ഈ കേസില് ഇവരുടെ വധശിക്ഷ നാളെ രാവിലെ ബാലി ജയിലില് നടക്കും. ഇപ്പോള് നുസക്കന്ബാന്ഗന് ഐലന്റിലെ ബെസി ജയിലില് വികാരനിര്ഭരമായ നിമിഷങ്ങളാണ് അരങ്ങേറുന്നത്.
ഇരുവരുടേയും കുടുംബാംഗങ്ങള് അവസാനമായി തങ്ങളുടെ പ്രിയപ്പെട്ടവരെ കാണാന് ജയിലിലെത്തിയിരിക്കുകയാണ്. സുകുമാരന്റെ അമ്മയും സഹോദരിയും അടക്കമുള്ള കുടുംബാംഗങ്ങളാണ് ജയിലില് എത്തിയിരിക്കുന്നത്. അമ്മയെ കെട്ടിപ്പിടിച്ച് സുകുമാരന് യാത്രമൊഴി ചൊല്ലുകയായിരുന്നു. അതേസമയം തന്റെ കാമുകി ഫെബ്യാന്തി ഹെറിവില്ലയെ ചാന് ജയിലില് വച്ച് വിവാഹം കഴിക്കുകയും ചെയ്തു. ബാലിയില് നിന്ന് ഓസ്ട്രേലിയയിലേക്ക് 8.3 കിലോഗ്രാം ഹെറോയിന് കടത്താന് ശ്രമിക്കുന്നതിനിടെയാണ് 2005ല് ആന്ഡ്രൂ ചാനും മയൂരന് സുകുമാരനും പിടിക്കപ്പെടുന്നത്. ഇവരെക്കൂടാതെ നൈജീരിയ, ബ്രസീല്, ഘാന, ഫിലിപ്പൈന്സ് എന്നിവിടങ്ങളില് നിന്നുള്ള മയക്കുമരുന്ന് കേസിലെ പ്രതികളും വധശിക്ഷയ്ക്കായി കാത്തിരിക്കുന്നുണ്ട്. ചാനിനേയും സുകുമാരനെയും വധശിക്ഷയില് നിന്ന് ഒഴിവാക്കണമെന്ന് ഓസ്ട്രേലിയ അടക്കം നിരവധി രാജ്യങ്ങള് ആവശ്യപ്പെട്ടെങ്കിലും നാളെത്തന്നെ വധശിക്ഷ നടപ്പാക്കുമെന്നു തന്നെയാണ് സൂചന. വധശിക്ഷ നടപ്പാക്കരുതെന്ന് യുഎന് പ്രതിനിധികളും ആവശ്യപ്പെട്ടിട്ടുണ്ട്. വധശിക്ഷകള്ക്ക് അടിയന്തിരമായ മൊറോട്ടോറിയം പ്രഖ്യാപിക്കാനും യുഎന് നിര്ദേശിച്ചിട്ടുണ്ട്.
അതേസമയം ബാലി നൈന് കേസിലെ പ്രതികളുടെ അപ്പീല് സ്വീകരിക്കാന് ഇന്തോനേഷ്യന് കോണ്സ്റ്റിറ്റിയൂഷണല് കോടതി സമ്മതിച്ചു. എന്നാല് ഇത് വളരെ വൈകിപ്പോയെന്നു പറയാം. രണ്ടാഴ്ചയ്ക്ക് ശേഷം അപ്പീല് പരിഗണിക്കാമെന്നാണ് കോടതി അറിയിച്ചതെന്ന് ഇവരുടെ അഭിഭാഷകന് ലിയോനാര്ഡ് അര്പാന് അറിയിച്ചു. ബുധനാഴ്ച അതിരാവിലെ അരങ്ങേറുന്ന വധശിക്ഷയ്ക്കുള്ള എല്ലാവിധ തയ്യാറെടുപ്പുകളും നടന്നുകഴിഞ്ഞുവെന്ന് ജയില് അധികൃതര് വ്യക്തമാക്കിയിട്ടുണ്ട്. വെടിവച്ചാണ് പ്രതികളെ വധശിക്ഷയ്ക്കു വിധേയമാക്കുന്നത്. ജഡങ്ങള് വയ്ക്കുന്നതിനായി ശവപ്പെട്ടികള് വരെ ജയിലിലെത്തിക്കുന്ന നടപടിക്രമങ്ങള് പൂര്ത്തീകരിച്ചിട്ടുണ്ട്. അതേസമയം വധശിക്ഷ നടപ്പാക്കുന്ന സമയത്ത് കണ്ണുമൂടിക്കെട്ടണമെന്നുള്ള നിര്ദ്ദേശം പാലിക്കാന് സുകുമാരന് വിസമ്മതിച്ചിട്ടുണ്ടെന്നും റിപ്പോര്ട്ടുകളുണ്ട്. വെള്ളവസ്ത്രം ധരിപ്പിച്ച് കറുത്ത തുണികൊണ്ട് തലമൂടിയാണ് വധശിക്ഷ നടപ്പാക്കുന്നത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha