കേരളം അപകടമുനമ്പില്; അപകടം തിരിച്ചറിഞ്ഞ് പ്രതിപക്ഷം; സമരങ്ങള് അവസാനിപ്പിച്ച് യു.ഡി.എഫ്; നിയന്ത്രണങ്ങള് കടുപ്പിച്ച് സര്ക്കാര്; നാളെ സര്വ്വകക്ഷി യോഗം; കേരളത്തില് കോവിഡ് രോഗമുക്തി നിരക്കിലെ വേഗതക്കുറവ് ആശങ്കപ്പെടുത്തുന്നത്
കേരളത്തിലെ നിലവിലെ കോവിഡ് സാഹചര്യം ഭയപ്പെടുത്തുന്നതാണ്. ഈ സത്യം കേരളത്തിലെ ഭരണ-പ്രതിപക്ഷങ്ങള് തിരിച്ചറിഞ്ഞിരിക്കുന്നുവെന്നും വേണം മനസിലാക്കാന്. കഴിഞ്ഞ ദിവസങ്ങളില് സംസ്ഥാനത്ത് പ്രതിദിന രോഗബാധ 7000 ത്തിന് മുകളിലാണ്. വലിയ ജാഗ്രത പുലര്ത്തേണ്ട സാഹചര്യമാണുള്ളതെന്നും മരണസംഖ്യ ഉയര്ന്നേക്കാവുന്ന സാഹചര്യമാണെന്നും ജാഗ്രത കൈവെടിയരുതെന്നും ആരോഗ്യമന്ത്രി ഇന്നലെ മുന്നറിയിപ്പ് നല്കിയിരുന്നു. തിരുവനന്തപുരത്ത് 1000 ത്തിന് മുകളിലാണ് പ്രതിദിന രോഗബാധ. ഒരാഴ്ചക്കിടെ മാത്രം 6550 പേര്ക്കാണ് തിരുവനന്തപുരത്ത് കൊവിഡ് സ്ഥിരീകരിച്ചത്. ആവശ്യത്തിന് ആരോഗ്യ പ്രവര്ത്തകരില്ലാതിരിക്കുകയും ആശുപത്രികളും കൊവിഡ് സെന്ററുകളും നിറയുകയും ചെയ്യുന്ന സാഹചര്യത്തില് ജില്ല കടുത്ത പ്രതിസന്ധിയിലേക്ക് നീങ്ങുകയാണ്. സ്വര്ണ്ണക്കടത്ത്, ലൈഫ് മിഷന്, ജലീല് വിഷയങ്ങളില് കൂടുതല് സമരങ്ങള് നടന്നത് തിരുവനന്തപുരത്തായിരുന്നു. സമരങ്ങളുടെ പേരില് ജനങ്ങള് നിയന്ത്രണങ്ങള് ലംഘിച്ചതും രോഗികളുടെ എണ്ണമുയര്ത്താനിടയാക്കിയെന്ന് സിപിഎം ആരോപിച്ചിരുന്നു. അതേസമയം രോഗപ്രതിരോധത്തിന് സര്ക്കാര് നടത്തുന്ന എല്ലാ നടപടികളുമായി സഹകരിക്കുമെന്ന് പ്രതിപക്ഷ നേതാവ് രമേശ് ചെന്നിത്തല വ്യക്തമാക്കി. ഇതിന്റെ ഭാഗമായി സംസ്ഥാന സര്ക്കാരിന്റെ യുഡിഎഫും പോഷകസംഘടനകളും നടത്തി വന്നിരുന്നു പ്രക്ഷോഭങ്ങള് താത്കാലികമായി നിര്ത്തി വയ്ക്കുന്നു. കോവിഡ് വ്യാപനം രൂക്ഷമായ സാഹചര്യത്തിലാണ് ആള്ക്കൂട്ടസമരങ്ങള് താത്കാലികമായി നിര്ത്തിവയ്ക്കുന്നതെന്നും സര്ക്കാരിനെതിരായ പ്രതിഷേധം ഇനിയും തുടരുമെന്നും രമേശ് ചെന്നിത്തല അറിയിച്ചു.
സംസ്ഥാനത്തെ എല്ലാ ജില്ലകളിലും സെക്രട്ടേറിയറ്റ് കേന്ദ്രീകരിച്ച് പ്രത്യേകിച്ചും യുഡിഎഫ് അതിശക്തമായ സമരമാണ് കഴിഞ്ഞ ആഴ്ചകളില് നടത്തിയത്. പലപ്പോഴും ഈ സമരങ്ങള് പോലീസ് നടപടിയിലും സംഘര്ഷത്തിലുമാണ് അവസാനിക്കാറുള്ളത്. സ്വര്ണക്കടത്ത്, ലൈഫ് മിഷന്, സ്പ്രിംഗഌ തുടങ്ങി വിവിധ വിഷയങ്ങളില് സര്ക്കാരിനെ കടന്നാക്രമിച്ചു കൊണ്ട് യുഡിഎഫ് സമരം നടത്തിയിരുന്നു. യുഡിഎഫും ബിജെപിയും സംസ്ഥാന വ്യാപകമായി നടത്തുന്ന പ്രതിഷേധസമരങ്ങള് സംസ്ഥാനത്തെ കോവിഡ് വ്യാപനത്തിന് കാരണമാകുന്നതായി മുഖ്യമന്ത്രിയും സിപിഎമ്മും നിരന്തരം വിമര്ശിച്ചിരുന്നു. കോവിഡ് വ്യാപനം മുന്നിര്ത്തി സര്ക്കാര് സമരങ്ങള്ക്കെതിരെ പ്രചരണം ശക്തമായതും തിരുവനന്തപുരത്തെ പ്രതിദിന കോവിഡ് കേസുകള് ആയിരം കടക്കുകയും ചെയ്ത സാഹചര്യത്തിലാണ് സമരം നിര്ത്തിവയ്ക്കുക എന്ന തീരുമാനത്തിലേക്ക് യുഡിഎഫ് എത്തിയത്. കെ.എസ്.യു സംസ്ഥാന അധ്യക്ഷന് കെ.എം.അഭിജിത്തിന്റെ കോവിഡ് പരിശോധനയുമായി ബന്ധപ്പെട്ടുണ്ടായ വിവാദങ്ങളും ഈ തീരുമാനത്തിലേക്ക് യുഡിഎഫിനെ എത്തിക്കുകയായിരുന്നു.
സംസ്ഥാനത്ത് കോവിഡ് കേസുകള് ക്രമാതീതമായി ഉയരുന്ന സാഹചര്യത്തില് മുഖ്യമന്ത്രി പിണറായി വിജയന് സര്വ്വകക്ഷി യോഗം വിളിച്ചിട്ടുണ്ട്. നാളെ വൈകിട്ട് നാല് മണിക്കാണ് യോഗം ചേരുക. രോഗവ്യാപനം അതിരൂക്ഷമായ തിരുവനന്തപുരത്ത് കടുത്ത നിയന്ത്രണങ്ങള് ഏര്പ്പെടുത്തണമെന്ന് ജില്ലാ ഭരണകൂടത്തിന്റെ തീരുമാനം. ജില്ലയില് അവശ്യസേവനങ്ങള് മാത്രമേ അനുവദിക്കാവൂവെന്ന് സംസ്ഥാന സര്ക്കാരിന് ശുപാര്ശ നല്കി. രോഗവ്യാപനം നിയന്ത്രണവിധേയമാകും വരെ അവശ്യ സേവനങ്ങള് മാത്രമായി ഒതുക്കണം. പൊതുഗതാഗതം അനുവദിക്കരുത്. സര്ക്കാര് സ്വകാര്യ സ്ഥാപനങ്ങളില് അമ്പത് ശതമാനം ജീവനക്കാര് മാത്രമേ അനുവദിക്കാവൂ. മ്രൈകോ കണ്ടെയ്മെന്റ് സോണുകള് ഫലപ്രദമല്ലാത്തതിനാല് വാര്ഡ് തലത്തില് തന്നെ കണ്ടെയ്മെന്റ് സോണുകള് പ്രഖ്യാപിക്കണമെന്നും ജില്ലാ ഭരണകൂടം ശുപാര്ശ ചെയ്തിട്ടുണ്ട്. ഇന്ന് നടക്കുന്ന ഉന്നതല യോഗത്തില് ഈ ശുപാര്കളെല്ലാം പരിഗണിക്കും.
അതെസമയം രാജ്യത്തെ കോവിഡിന്റെ പുതിയ ഹോട്ട്സ്പോട്ടായി കേരളം മാറികഴിഞ്ഞു. കോവിഡിന്റെ അതിവേഗ വ്യാപനത്തില് അക്ഷരാര്ത്ഥത്തില് ഞെട്ടിയിരിക്കുകയാണ് സംസ്ഥാനം. കേരളത്തില് സെപ്തംബര് മാസത്തിലാണ് ഇതുവരെ ഏറ്റവും അധികം കോവിഡ് രോഗബാധ റിപ്പോര്ട്ട് ചെയ്തിട്ടുള്ളത്. ഒരു ലക്ഷമാകാന് ഒരാളുടെ കുറവ് മാത്രമേയുള്ളു. 99,999 പേര്ക്കാണ് സംസ്ഥാനത്ത് കോവിഡ് ഏറ്റവും അധികം റിപ്പോര്ട്ട് ചെയ്തിട്ടുള്ളത്. സംസ്ഥാനത്താകെ വിവിധ ജില്ലകളിലായി 2,27,831 പേരാണ് നിരീക്ഷണത്തിലുള്ളത്. കോവിഡ് കേസുകള് മാത്രമല്ല, മൊത്തം മരണങ്ങളുടെ ഇരട്ടിയിലധികവും സെപ്തംബറിലെ ഈ 27 ദിവസങ്ങള്ക്കുള്ളിലാണ് ഉണ്ടായത്. ടെസ്റ്റ് പോസിറ്റിവിറ്റി നിരക്കില് കേരളം മുന്നില് തന്നെയാണ്. ഇന്നലെ സംസ്ഥാനത്തെ 100 പരിശോധനകളില് 13.87 രോഗികള് എന്നായിരുന്നു ടെസ്റ്റ് പോസിറ്റിവിറ്റി നിരക്ക്. കഴിഞ്ഞയാഴ്ച 11.57 ശതമാനം ആയിരുന്നു. കര്ണാടകയും മഹാരാഷ്ട്രയും ആണ് ഇതില് കേരളത്തിന് മുകളിലുള്ളത്. ചികിത്സയിലുള്ളവരുടെ നിരക്ക് രാജ്യത്ത് 15.96 ആണ്. സംസ്ഥാനത്ത് 32.34 ആണ്. സംസ്ഥാനത്ത് കോവിഡില് നിന്നും രോഗമുക്തി നേടുന്നത് സാവധാനമെന്ന് കണക്കുകള്. ദേശീയ തലത്തില് 82 ശതമാനമാണ് രോഗമുക്തി നിരക്ക്. എന്നാല്, സംസ്ഥാനത്ത് 67 ശതമാനമാണ് രോഗമുക്തി നിരക്ക്. കര്ശനമായ ഡിസ്ചാര്ജ് പ്രോട്ടോക്കോള് ഉള്ളതിനാലാണ് രോഗമുക്തി നിരക്ക് ഉയരുന്നത് സാവധാനം ആയിരിക്കുന്നതെന്നും സംസ്ഥാന ആരോഗ്യ വകുപ്പ് പറയുന്നുണ്ട്.
https://www.facebook.com/Malayalivartha